以賽亞書 45章1節 到 45章8節   背景資料  上一筆  下一筆
第四十四章28節是為第四十五章做簡單ê紹介,其中記載上帝teh-beh揀選波斯帝國皇帝塞魯士成做祂羊群ê牧者,而且為以色列人民回鄉後重建家園出力,chit件記事tī歷代志下第三十六章22到23節已經有清楚記載。Tī以斯拉記第一章有清楚記載塞魯士bat下命令,並且歸還所有巴比倫帝國皇帝當年摧毀耶路撒冷kah聖殿ê時,所掠奪ê所有聖物。

Chit段詩歌表達一個非常重要ê觀念:上帝揀選某人á是某一個國家完成祂ê計畫、旨意,並m̄是因為in有甚麼特別要件,卻是因為上帝拯救ê計畫。因為án-ne,受揀選者,無法度因為án-ne而驕傲。Koh講,chit段經文mā講出一個領導者、當權者認清,並m̄是因為家己有甚麼偉大,卻是因為上帝賦予伊ê使命kah責任,ná親像主人kā看顧羊群ê責任付託hō͘顧羊人。相對tī揀選塞魯士來負起牧養ê工作,mā是teh表明上帝看tio̍h祂所揀選ê子民受難,並無縮tńg來祂ê手,mā無棄sak in。咱thang tùi chia確信,一個kah上帝有約ê基督徒,上帝永遠bē bē記得、棄sak。只要人知影悔改,上帝永遠phah開祂ê雙手,隨時準備伸手救助。

第1到4節,chit段經文特別講「上帝膏立塞魯士」,當聖經用「膏立」用這名詞ê時,有含上帝特別揀選ê旨意。既然是上帝所膏立ê君王,mā表示上帝beh賜hō͘ chit-ê人能力、權柄,然後「差伊去削減諸王ê權力」,借用伊ê手hō͘所有被掠到外國去做奴隸ê以色列子民ē-tàng回鄉重建家園。M̄-nā án-ne,上帝iáu koh khah「親自」為伊「開路」,並且koh伸手為伊「削平大細山岡」,而且「攻破銅門」,hō͘伊ē-tàng完成上帝所付託hō͘祂ê旨意。Koh講,chia mā特別提起上帝揀選塞魯士皇帝,並m̄是因為伊「認bat」上帝,卻是上帝「認bat」伊。這mā講出上帝揀選甚麼人當祂ê奴僕,是上帝家己teh決定,而且chit種決定並m̄是根據人ê條件á是標準。

第5節,tùi chit句「我是上主」、「我以外無別ê上帝」,就thang看出先知以賽亞信息lóng kā重心lóng khǹg tī chiah-ê基礎信仰上,chiah-ê句話koh一pái重複tī第6節、第14節、第18節、第21節、第22節。聖經一再提供一個重要信息:上帝揀選ê奴僕,上帝會伊賜力量,hō͘伊thang排除所有困難,完成上帝所付託ê使命。

第6到7節,「普天下」、「tùi日出到日落之地」、「造光明」kah「造烏暗」,kah「降福」kah「降禍」等用語lóng tī說明上帝是宇宙萬物ê主宰。Chit兩節表明ê就是:賞賜性命ê是上帝,結束性命ê主權mā tī上帝手中。因為性命lóng是tùi上帝來,mā會tńg來到上帝手中。Ná親像約伯所講ê「上主賞賜ê,上主koh收tńg來」仝款(參考約伯記一:21)。

第8節,chit節ē-sái講是tùi第四十四章22節開始到第四十五章7節ê總結。主要teh說明,上帝照祂ê旨意做tāi-chì,進行祂拯救ê工作。

重新查詢 專卷研經 以賽亞書系列
錯誤回報,請聯繫comm[@]fhl.net