Tī第7節講雅各帶去埃及ê有「kiáⁿ、孫á、cha-bó͘-kiáⁿ,kah孫女」,tùi第8節開始ê chit段經文,則詳細地kā第7節所提起ê chiah-ê kiáⁿ孫等等,in ê名一一登錄落來。
第8到15節,chit段族譜是雅各kah利亞所生ê六個kiáⁿ,以及cha-bó͘-kiáⁿ底拿等人ê名單,包括chiah-ê kiáⁿ所生ê kiáⁿ。共計33個人。
第16到18節,這是雅各kah利亞ê女婢悉帕所生ê kiáⁿ,kah chiah-ê kiáⁿ ê kiáⁿ。共計16個人。
第19到22節,這是雅各kah拉結所生ê兩個kiáⁿ約瑟kah便雅憫,以及in所生ê kiáⁿ,共計14個人。
第23到25節,是雅各kah拉結ê婢女辟拉所生ê kiáⁿ,kah in ê kiáⁿ。共計有7人。
第26到27節,chia講chiah-ê名單lóng只是「直系kiáⁿ孫,無包括新婦」在內,án-ne共計有66人。加上雅各kah約瑟,以及約瑟tī埃及所生ê,加起來共計70人。
M̄-koh若是注意一下,就會發現tī雅各kah利亞所生ê kiáⁿ kah孫á中,猶大ê兩個kiáⁿ珥kah俄南已經往生,並無到埃及去。Tio̍h加上雅各ê cha-bó͘-kiáⁿ底拿kah她ê丈夫chiah有33人。另外雅各kah悉帕所生ê kiáⁿ、孫á中間,mā一定tio̍h kā悉帕所生ê cha-bó͘-kiáⁿ西拉加入去,chiah夠額16人。
|