Ná親像頭前已經有提起過ê，作者路加beh表明ê是tī使徒保羅身上，thang看tio̍h kah彼得仝款ê能力，而彼得是tùi耶穌身上領受了koh活升天chìn前，賞賜hō͘ in聖神ê能力（參考一：8）。

第7到8節，「禮拜六暗時」chit句話提供了一個重要ê訊息：信徒聚會ê時間已經tùi原本安息日tī會堂，改為「禮拜六暗時」à。猶太人算每日ê時間，是tùi下晡六點開始算一工ê開始。安息日是tùi禮拜五下晡六點開始到禮拜六下晡六點止。因為án-ne，所謂「禮拜六暗時」，意思就是過了安息日。而且chia講tio̍h in聚會ê時間真長，一直到天亮。Mā thang看出使徒保羅tī外面邦地區傳道，漸漸發展出kah猶太人聚會時間區隔出來。

第9到12節，chia記載使徒保羅mā有能力hō͘死去ê人koh活起來。作者用這故事teh表達一個信息：只要有聖神同在，即使死去ê人mā會koh活。Chia講有一個「iáu推古ê少年人坐tī窗口」，因為聽福音ê信息到倦tah-tah愛睏，結果tùi三樓掉了落去，大家發見伊死去，m̄-koh使徒保羅hō͘這少年人koh活起來。第10節記載使徒保羅ê做法真親像先知以利亞仆tī死去ê gín-á身上（參考列王記上十七：21），mā kah先知來便利沙ê方式仝款（參考列王記下四：34）。

第11節，chia提起使徒保羅「擘開餅食了」，真可能就是kā猶太人Pôaⁿ過節暗頓改變成做kah耶穌ê性命相連結ê聖餐（參考哥林多前書十一：23—26）。