启示录 7章1节 到 7章8节   背景资料  上一笔  下一笔
Chit章ē-sái讲是另外「插入」ê一章经文,因为chit章经文编辑tī-chia,hō͘第六章记载第六印phah开了后,一定tio̍h到第八章1节chiah会koh再看tio̍h第七个印被phah开ê记载。Chit章主要teh描述末后ê日子会出现ê景象,chit-ê景象ná亲像tī第六章17节所提起ê:「因为in震怒ê大日子到à;甚么人ē-tàng khiā得tòa?」上帝ê惩罚确实真严厉,无人thang抵挡á是免除。M̄-koh,hiah-ê持守信仰到最后ê人,上帝tī in身上lóng做记号,有chiah-ê印记ê人chiah ē-tàng「khiā得tòa」。

    Chit章thang分做两个段落,其一就是第1到8节,讲tio̍h有关「被盖印」ê总数,另外一则第9到17节有关tùi「各国家、各部落、各民族、各语言来ê」,in lóng身穿白袍。Ē-tàng看出来,除了以色列民族被拯救之外,mā有非以色列民族之「各国、各族」ê人民被列入拯救ê范围。这mā说明耶稣tī山上宝训中所提起ê,上帝是疼所有ê人(参考约翰福音三:16)。Á使徒保罗ê观念中mā提起「上帝beh人人得救」(参考提摩太前书二:4),换句话讲,无论是犹太人á是外邦人,lóng是上帝所拯救ê对象,chit对今á日ê基督徒kah世界有极大ê意义。

    Tùi chit章就thang看tio̍h启示录tī编辑上有一个真特别ê手路,就是用「七」为一个循环ê数目;每pái有「七」ê数字出现,tī第六kah第七之间就会出现「插入」ê资料,就是tī第「七」个异象beh出现chìn前,随时koh引发另外一个「七」ê异象出来。Chit种编辑方式除了Tī chit章之外,mā同时出现tī第十章1节到第十一章13节中。

    Chit段经文就是插入ê第一段落,谈及以色列十二个支派中被拯救ê人数,每一个支族lóng有详细ê叙述。

    第1节,chia出现「四个天使」、「四极」、「四面」等「四」ê数字,chit-ê数目Tī圣经中有特殊意义,有含「适当」、「tú好」ê意思。

    「地ê四极」,thang表示全世界ê意思。其背景kah一间厝有四支柱子支撑仝款,地需要有四个「极」来支持它,这mā kah东、西、南、北等四个方向ê观念有关。

    「四面ê风」,tī耶利米书第四十九章36节则代表「毁灭ê气力」,mā是受tio̍h上帝差遣ê使者(参考耶利米书四:11—12、五十一:1—2)。旧约ê先知ài用「风」来表示上帝ê奴仆,á是上帝ê工具(参考以赛亚书六十六:15,约拿书四:8,那鸿书一:3,撒迦利亚书九:14)。

    第2到3节,「另外一个天使」tùi「东方」出来,chit位天使带来ê是好消息,伊手上「捧tio̍h永远活ê上帝ê印」,而chit-ê印beh盖tī上帝奴仆ê「额」头壳顶。古早时ê「印」thang用来teh代表主人、君王(参考创世记三十八:18、25,以斯帖记三:12、八:10,但以理书六:17,路加福音十五:22→经文中ê手指是带有印记ê手指,thang用来确定身分)。

    第4到8节,chit段经文讲tio̍h以色列民族总共计十四万四千人,被盖上「印」记,chit-ê数目是以色列十二个支族,每一个支族有一万二千名。chit-ê数字是根据象徵tio̍h「圆满」ê十二乘上「圆满」ê十二,共计一百四十四,然后koh再乘上「一千」。Á这「一千」表示ê意义乃是「无限ê圆满」状况。Á值得注意ê,是每一个支族受拯救ê人数lóng仝款是一万二千名,却m̄是照人口ê比例分配。Chia ê十二支派,并m̄是根据族谱ê秩序,却是用「犹大」支派为先,表示犹大chit支派已经得tio̍h继承ê主权。Koh讲,chia无提起「但」支派,却是提起玛拿西(第6节),ē-sái讲是已经有约瑟了,因为án-ne,正确ê写法应该是「但」,却m̄是玛拿西chiah-tio̍h。会有省略「但」支族ê人,可能是kah创世记第四十九章17节提起ê「但」了后裔,后来背叛上帝有关(参考士师记十八:27—31,列王记上十二:29—30)。Tī历代志上第四到七章ê族谱中,mā欠缺「但」族人ê记录(参考历代志上七:12 b)。

重新查询 专卷研经 启示录系列
错误回报,请联系comm[@]fhl.net