耶利米书 20章7节 到 20章18节   背景资料  上一笔  下一笔
Chit段经文是先知耶利米teh向上帝表白伊心内ê感受,表明tùi伊被上帝呼召了后,受tio̍h排斥、侮辱ê痛苦,mā因为án-ne伊诅咒家己出世ê日子。

第7节,先知耶利米认为家己是hō͘上帝说服去传讲信息,伊认为上帝呼召伊,m̄-koh并无出手保护伊,反tńg是hō͘伊hō͘人「戏弄」,甚至是「kui工kā伊当做笑柄」看待,hō͘伊感觉非常无奈。

第8节,因为犹大同胞并无想beh听伊传讲ê信息,因为án-ne,每pái伊开嘴传达上帝信息后,「lóng是招惹讥讽、藐视」,意思是kā伊当做疯子看待,讲伊不正常。

第9节,chit节thang参考耶利米书第五章14节。

因为上帝ê话ná亲像一股炭火tī伊ê心中火烧(参考以赛亚书六:6—7)。心ê火热,逼kah先知耶利米全身lóng m̄爽快,无传讲上帝ê信息,就无法度忍受chit种痛苦,「憋不住」上帝beh伊讲ê话。

第10到11节,chit两节是相对句型。当真chē人lóng用耳语谣传伊是「恐怖」份子,包括伊「知己ê朋友lóng等tio̍h」看伊「身败名裂」,这表示先知耶利米已经陷入孤寂。即使是án-ne,先知耶利米iáu是确信上帝会kah伊「同在」,这mā是伊虽然面临chit种恶质环境,iáu-koh继续传达上帝信息ê原因。因为上帝真清楚向伊表明beh kah伊同在(参考一:8、19),hō͘ chiah-ê想beh陷害伊、孤立伊ê人lóng蒙羞。

第12节,thang参考耶利米书第十一章20节。

先知耶利米深信拣选伊ê上帝是一位「按公道判断」,而且是「视透人ê心肠」ê上帝,他一定会为受tio̍h迫害、冤屈ê人伸冤。因为án-ne,伊ài kā所有受tio̍h ê屈辱交hō͘上帝审理。

第13节,先知耶利米确信上帝会kā伊「tùi邪恶人手中抢救」出来。因为伊是上帝忠实ê奴仆。

第14节,先知耶利米teh「诅咒」家己出世ê日子,这kah圣经时代ê人,对性命ê出世态度完全颠倒。Tùi先知耶利米会诅咒家己出世ê日子,就ē-tàng想像会tio̍h伊心中是jōa-ni̍h-á哀伤、艰苦心。Chit种诅咒家己生日ê方式,其实mā是古代人表达性命苦难ê一种方式。

第15节,先知耶利米m̄-nā诅咒家己ê出世,mā诅咒hit位去向in父亲报喜ê hit-ê人。因为chit-ê报喜ê人领了in父亲hō͘伊ê奖赏,m̄-koh伊出世却是一个痛苦ê性命。

第16节,「被上主所毁灭ê城」,指ê乃是所多玛城kah蛾摩拉城ê毁灭。Tī这节诗歌中,先知耶利米koh一pái表示siōng好lóng听bē-tio̍h有人传达婴á出世ê消息,ná亲像所多玛城kah蛾摩拉城被毁灭仝款,mā像「战争」ê时,hiah-ê人只听tio̍h「喊hoah」ê声音,án-ne,就koh再听bē-tio̍h有人去通报任何喜讯了。

第17到18节,先知耶利米讲家己宁可死tī母亲ê胎腹中,以老母ê腹肚作「坟墓」。伊怀疑性命ê出世,只为tio̍h beh「经历辛劳、悲伤」,koh tī「侮辱中消耗」性命ê岁月?若án-ne,这是真悲惨ê事。伊对上帝创造性命ê本意提出怀疑。

重新查询 专卷研经 耶利米书系列
错误回报,请联系comm[@]fhl.net