创世记 6章1节 到 6章8节   背景资料  上一笔  下一笔
Chit段是siōng早期「耶和华文献」ê资料。创世记chit本经册是teh讲述人犯罪,以及上帝ê拯救恩典ê册。因为án-ne,每一个故事ê开始到结束是用chit种结构:人犯罪,上帝受气,会惩罚;m̄-koh上帝有恩典,tī伊ê惩罚中,上帝mā会怜悯人ê软弱。因为án-ne,人ê性命会得thang生存落去。

第1节开始就讲tio̍h「人口开始增多,分布全世界」。Chit句话已经说明上帝有赐福,mā是上帝原本创造时就赐福hō͘人类ê恩典(参考一:28)。

第2到4节,「神子」,原本用ê「神」字,是复数ê。表示真chē ê神ê意思,是teh指hiah-ê khiā tī上帝左右ê众天使(参考列王记上廿二:19—22、约伯记一:6—12、诗篇八十二:1)。Chiah-ê「神子」kah hit位创造ê主宰、独一ê神无仝。第3节特别强调人因为tiāⁿ-tiāⁿ犯罪,因为án-ne上帝特别缩短了人tī世间ê岁月,tùi第五章所讲ê用百计算,缩成siōng koân年限「一百二十岁」,chit-ê岁数mā是东方社会公认siōng koân ê年限,ná亲像台语所讲ê「活到百二」仝款。

第4节提起「巨人」,tio̍h怎样解释in tú-tio̍h身材高大ê「巨人」问题,thang参考民数记十三:31—33,撒母耳记上第十七章 4到7节,记载大卫王kah巨人歌利亚ê战争,描述歌利亚ê身高、型态已经超过以色列人ê经验,soah hō͘ in产生惊惶。另外一点tio̍h处理ê是:天顶灵界侵犯人类ê世界,致使上帝ê不满。因为án-ne,hō͘人koh khah痛苦,因为上帝ê灵永远离开了人类。Chia说明一件重要ê信息:规律、限制。上帝造人以及万物时,是tī一定ê空间中。Pôaⁿ过应该有ê空间对性命就是一种生存ê危险(第十一章1到9节巴别塔ê故事koh一pái表达了chit种讯息)。因为he是违背上帝旨意ê。因为án-ne,人kah「神子」通婚,hō͘人超越人ê界限,带来ê就是性命ê负担,m̄是赐福。

第5节,「人类ta̍k个邪恶,头尾心怀恶念」,chit句话成做上帝beh毁灭大地先做一个伏笔。Chit节讲上帝「看见」,这是teh指长期观察后所得ê。亲像上帝观察以诺,伊一世人lóng是kah上帝交往,chiah会得thang hō͘ 上帝接去。

第6节,chia ê「后悔」一词,是teh指上帝痛心、艰苦心(忧伤)ê意思。上帝会án-ne悲伤,是因为人类逼他做他siōng无欢喜做ê事――审判人类。因为审判人类会koh牵连到hō͘人类生存ê土地受伤。换句话讲,审判人类,等于是上帝对家己创造ê宇宙万物kā in否定仝款。这就kah-ná人否定了家己所努力、用心工作ê结果时,hit种心中ê艰苦心是仝款ê。

第7节,chit节kā以后ê大水故事做序言。说明大水ê由来乃是因为上帝惩罚ê缘故。因为人受造是为tio̍h beh管理万物,chit-má人既然无法度管理家己,受造ê万物一定会失序,因为án-ne,万物连带受拖累。Chiah-ê观念lóng kah第三章17节ê「土地会因为你违背命令来受诅咒」ê讲法是一致ê。

第8节,「上主kah意挪亚」tī犯罪到「人类ta̍k个邪恶」ê时,独独挪亚是上帝所欢喜ê对象,这就为kui个拯救工作先埋落来伏笔。因为挪亚hō͘ 上帝欢喜,伊就成做上帝拣选kah立约ê对象。


重新查询 专卷研经 创世记系列
错误回报,请联系comm[@]fhl.net