列王纪上 15章1节 到 15章8节   背景资料  上一笔  下一笔
列王记作者tùi第十四章开始,撰写王国历史ê特色,就是绍介南、北两国ê君王治国之情景交替编撰做伙,而且lóng有一定ê格式,亲像:「以色列王XXX在位第X年,XXX登基做犹大王。」这是绍介犹大王用ê句话。仝款ê,绍介北国以色列王ê时,就会án-ne写tio̍h:「犹大王XXX在位ê第X年,XXX登基作以色列王。」

列王记上第十五章分别记载犹大亚比雅(第1到8节)kah雅撒(第9到24节)chit两个王,然后绍介以色列拿答(第25到32节)kah巴沙(第33到34节)chit两个王。

Chit段经文是记载犹大王罗波安死后,伊ê kiáⁿ亚比雅继承伊ê王位。作者只有短短ê八节篇幅记载亚比雅当犹大王ê事迹。仝款ê记事mā记载tī历代志下第十三章1节到第十四章1节。Tùi历代志下第十三章ê资料就会知影,亚比雅执政期间bat kah北国以色列ê耶罗波安王有过一场大战。北国出兵八十万,南国出兵四十万,tú好是北国ê一半。M̄-koh,南国犹大走chhōe上帝ê帮助,tī祭司pûn号筒声中,上帝出力协助南国犹大,hō͘兵员只有一半ê南国犹大大胜北国以色列ê八十万大军,并且iáu消灭了北国以色列五十万精兵。Koh khah重要ê是,chit pái战役,犹大王亚比雅占领了北国ê城市:伯特利、耶沙拿、以弗伦,kah附近庄头。

第1到2节,chit两节记载亚比雅登基作犹大ê王,m̄-koh伊统治ê时间真短,只有短短「三年」而已。比起伊ê老父罗波安统治耶路撒冷长到十七年,确实是短了真chē。其实,认真讲起来,伊在位尚且不满三年,只有两年gōa而已。

Ē-sái讲是第2节chia有点á问题,因为chia讲亚比雅ê母亲叫「玛迦,是押沙龙ê cha-bó͘-kiáⁿ」。M̄-koh根据撒母耳记下第十四章27节ê记载,押沙龙有三个kiáⁿ,一个cha-bó͘-kiáⁿ,而这cha-bó͘-kiáⁿ ê名叫「她玛,非常súi」。Án-ne,玛迦kah她玛应该是仝一个人。M̄-koh若koh再对照历代志下第十三章2节ê记载,玛迦是「基比亚城乌列ê cha-bó͘-kiáⁿ」。Án-ne看起来,比较正确ê看法是:乌列娶押沙龙ê cha-bó͘-kiáⁿ她玛,然后生玛迦。所以,玛迦应该讲是押沙龙ê孙女。

第3节,列王记作者ài用「无亲像伊a祖大卫hit种一心一意忠于上主—伊ê上帝」chit种句型,来形容历代君王是m̄是顺从上帝ê旨意。Á大卫是成做列王记作者衡量一个君王ê标准。无达tio̍h chit-ê标准,就是弃sak上帝,去拜偶像神明。

第4到5节,chit两节特别提起大卫,表示大卫因为对上帝忠实,因为án-ne上帝应允大卫ê kiáⁿ孙ē-tàng继续统治耶路撒冷,虽然大卫ê kiáⁿ孙一再悖逆上帝ê旨意,m̄-koh上帝iáu是赏赐hō͘亚比雅有一个kiáⁿthang继承伊ê王位,这mā讲出上帝永远信守应允。Chia特别指出大卫有做错一件非常错误ê事,就是有关「赫人乌利亚」ê事件(参考撒母耳记下第十一章)。作者认为chit件事以外,大卫并无弃sak上帝ê旨意。

第6到8节,第6节只提起tī亚比雅活teh ê时chūn,伊ê老父「罗波安kah耶罗波安」之间常有战事(参考十四:30),tī历代志下第十三章则有提起罗波安用少tī耶罗波安一倍ê军力,phah败北国以色列,并且kā伊庞大军队之精兵「消灭了」chē kah「五十万」。Á chit种战事,并无因为时间ê消失去,以及北国以色列bat有过惨败而收敛,亚比雅iáu是tio̍h不时kah耶罗波安统治ê北国以色列发生战争,这可能mā是致使伊chiah统治三年就往生ê原因。伊ê kiáⁿ亚撒继承伊作犹大ê王。

重新查询 专卷研经 列王纪上系列
错误回报,请联系comm[@]fhl.net