Chit段经文是记载玛拿西支族ê族谱。Chit份族谱thang参考民数记第廿六章29到34节，以及约书亚记第十七章1到3节。

值得注意ê，是chit支族被分做两部分，一是tī约旦河东岸，kā它称做东玛拿西支族；另外一个是tī约旦河西岸，kā它称做西玛拿西支族。而且tī历代志上第五章23到24节mā有记载东玛拿西支族ê族谱。因为án-ne，chia ê族谱应该是只有西玛拿西族谱ê。

第14到15节，chia非常特别，一开始就讲「玛拿西ê细姨」生两个kiáⁿ。这已经teh暗示，tī东玛拿西支族是bó͘所生ê kiáⁿ孙，而tī约旦河西边ê玛拿西支族则由细姨所生ê kiáⁿ孙传承落来。Á继续写落来族谱是tùi第二kiáⁿ玛吉，m̄是tùi大kiáⁿ亚斯列。

Tī第15节特别有两件事tio̍h注意，就是提起玛吉「hō͘户品kah册品各娶一个bó͘」，这读起来真清楚，伊是为kiáⁿ娶新妇。Tī希伯来文圣经mā是án-ne。M̄-koh tī有ê翻译本，lóng是用玛吉娶bó͘叫玛迦。

另外一点，就是chit节记载「玛吉ê第二kiáⁿ西罗非哈。西罗非哈只有cha-bó͘-kiáⁿ。」chit句话mā为民数记第廿七章1到11节，以及第三十六章有关继承财产ê问题连结起来。

第16到17节，chia记载玛吉ê kiáⁿ孙，mā lóng是基列ê kiáⁿ孙，回应了第14节所提起ê「玛吉生基列」，而玛吉是玛拿西ê kiáⁿ，因为án-ne，基列就是玛拿西ê孙á。

第16到19节，chia特别提起「基列ê小妹哈摩利吉」生落来ê kiáⁿ孙。M̄-koh，圣经中无关系哈摩利吉ê任何资料。