羅馬書 4章1節 到 4章12節   背景資料  上一筆  下一筆
Tùi chit章ē-tàng看出使徒保羅kā kui個論述焦點lóng khǹg tī亞伯拉罕身上,伊強調一個中心思想:亞伯拉罕是因為「信上帝」,上帝chiah稱伊為「義人」(參考創世記十五:6)。伊信,是因為上帝hō͘伊ê應允,á chiah-ê應允是伊當時lóng看bē-tio̍h ê,一直到伊ê後代kiáⁿ孫約書亞ê身上chiah實現。Tùi亞伯拉罕到約書亞帶領以色列人進入迦南地,chit段時間真長,至少超過五百年以上,雖然亞伯拉罕看bē-tio̍h,mā摸bē-tio̍h,ē-sái講是伊確實相信,這是hō͘上帝認定伊是「義人」ê主要原因。Á m̄是因為亞伯拉罕有甚麼好行為,chiah得tio̍h上帝ê喜愛。使徒保羅ê chit-ê論點,mā是猶太人無法度否認ê。

Chit段經文有一個基本前提需要注意,當使徒保羅提出亞伯拉罕來做伊論述ê重點ê時,已經說明一項重要ê認bat:舊約kah新約之間有bē-tàng分割ê關係。

第1到4節,使徒保羅特別以亞伯拉罕為例,猶太人只要講tio̍h亞伯拉罕就會引認為榮。M̄-koh猶太人清楚知影,亞伯拉罕並m̄是因為有甚麼好行為á被揀選,kahhō͘ 上帝稱呼為義人,卻是因為伊信上帝對伊ê應允。Ná親像頭前已經講過ê,聖經只要講tio̍h「恩典」,就表示he是上帝白白ê賞賜,á m̄免人ê任何條件來換。因為án-ne,伊用大家生活上所熟悉ê,就是工人得tio̍h工資ê時,伊會認為he是伊應該得tio̍h ê。M̄-koh,如果是恩典就m̄是án-ne了;因為真正恩典是:原是不應該得tio̍h ê,卻tī lóng無條件之下得tio̍h,án-ne chiah是恩典真正意義。上帝ê救恩就是chit種恩典。

第5節,chit節ài beh特別注意,上帝會宣判一個罪人為無罪,是因為chit-ê人信上帝。因為án-ne,當上帝差遣伊ê kiáⁿ耶穌到世間來,甚麼人相信,甚麼人就會得tio̍h上帝赦免ê恩典。M̄-koh聖經真清楚講上帝bē kā不義ê人、犯罪ê人當做義人。換句話講,對tī有罪ê人,上帝一定會有公正ê審判、懲罰(參考出埃及記廿三:7),án-ne chiah ē-tàng顯示公義ê上帝ê特性。就是因為án-ne,上帝chiah會hō͘耶穌降生到世間來,為有罪ê人當贖罪祭。

第6到8節,大衛感覺家己是一個hō͘ 上帝赦免ê人,因為án-ne,chiah ē-tàng kah上帝有合宜ê關係。一個真正悔改ê人,是不會kah伊所得罪ê人討價iáu價,ná親像大衛知影家己m̄-tio̍h,伊無kah上帝計較,因為伊認為上帝iáu存留伊ê性命,就是極大ê恩典。第7到8 chit兩節是引用詩篇第三十二篇1到2節ê詩歌。使徒保羅引用chit兩節詩歌ê主要目的,是teh強調一個基本信念:若上帝chiâⁿ實beh追究人ê罪,無任何一個人ē-tàng安然khiā立tī上帝面前,這mā是伊tī第三章23節所強調ê:「人人lóng犯罪,虧欠了上帝ê榮耀。」

第9節,這是真重要ê一節,使徒保羅koh一pái提起上帝赦免ê恩典,m̄-nā tī猶太人中間,mā tī外邦人身上。這mā表示上帝ê疼,大大超過所有猶太人所想像ê範圍。使徒保羅koh一pái說明亞伯拉罕並m̄是完人,á是完全無犯罪,卻是有上帝賞賜hō͘伊特別恩典,因為伊對上帝有絕對ê信心,因為án-ne,上帝「就算伊為義人」。換句話講,亞伯拉罕kah所有外邦人仝款,lóng是罪人。
第10到12節,chit段經文強調一個認bat:亞伯拉罕並m̄是tī受割禮了後chiahhō͘ 上帝認為是義人,卻是tī伊受割禮chìn前就已經被認定à。所以,割禮m̄是伊成做義人ê條件。伊án-ne講,是beh說明割禮m̄是上帝kah一個人有合宜關係á無ê要件,這要件是在tī信耶穌。使徒保羅進一步說明,對猶太人來講,亞伯拉罕是in ê祖先,m̄-koh對外邦人來講,則傳承屬靈ê「父子」關係。

重新查詢 專卷研經 羅馬書系列
錯誤回報,請聯繫comm[@]fhl.net