羅馬書 10章1節 到 10章4節   背景資料  上一筆  下一筆
使徒保羅繼續講tio̍h猶太人kah上帝之間ê關係,伊iáu是一本初衷地強調:耶穌,chiah是人kah上帝之間建立合宜關係ê唯一途徑。對一個受過相當頂真法利賽派訓練ê使徒保羅(參考使徒行傳廿二:3、廿三:3)來講,這並m̄是一件簡單ê事。因為猶太法利賽派ê人是非常強調遵行摩西律法ê重要性,並且認為只有án-ne chiah ē-tàng hō͘人看tio̍h得救ê ǹg望,á使徒保羅因為遇tio̍h koh活ê耶穌,hō͘伊對性命ê得救有完全無仝ê體驗,mā因為án-ne,改變了伊本來ê性命觀念(參考腓立比書三:7—8)。一個得救ê人,就是性命態度改變ê人,會kā本來看做「貴重」、「好」、「價值」等,重新量、評估。「改變」性命ê態度kah觀念,這是非常重要ê信仰見證。Chiâⁿ如使徒保羅一再強調ê,tī耶穌內面,成做一個「新造ê人」(參考哥林多後書五:17),kah chit-ê世界ê腐敗有所距離、差別,因為心靈有更新ê心思意念(參考羅馬書十二:2,以弗所書四:23)。使徒保羅真清楚把握tio̍h伊討論ê主題──上帝tī耶穌內面ê恩典kah摩西律法之間ê差別。

使徒保羅明確指出猶太人ê問題,是無想beh靠上帝tī耶穌內面ê救恩,卻是想óa靠家己ê好行為來自救,伊指出chit種觀念、想法、作法,是錯誤 ê,無真正了解上帝ê救恩。

第1節,chit節thang參考第九章1到3節,koh一pái表明使徒保羅ê心境,伊是jōa-ni̍h-á期待家己ê猶太同胞ē-tàng信耶穌á重新kah上帝和好。為tio̍h án-ne,伊不斷來祈禱上帝ê靈ē-tàng感動猶太人ê心。

第2到3節,使徒保羅明確指出猶太人真正ê問題所在,就是對上帝真熱心,m̄-koh卻無一定是有「真知識」做基礎。Chia所講ê「真知識」是teh指tio̍h對耶穌ê認知來講,mā就是正確認bat耶穌是基督,是性命ê主,á m̄是óa靠摩西律法(參考使徒行傳廿二:3—5)。另外一點,使徒保羅已經指出猶太人ê問題是:認為只要藉tio̍h完成摩西律法,就ē-tàng修好kah上帝之間ê關係,m̄-koh卻bē記得上帝已經差遣耶穌成做拯救ê óa靠,m̄是用家己ê氣力,卻是知影謙卑tńg來到耶穌身上。伊tī chia指出「律法ê義」kah「信ê義」之間差別;前者說明人想beh用家己ê行為完成,後者明示人ê有限、軟弱,需要上帝ê救恩,á這救恩就tī耶穌身上,可惜ê是猶太人拒絕接受。

第4節,「終止」,指ê就是「完成」、「成全」、「結束」ê意思。Kā它比較馬太福音第五章17節,耶穌講:「M̄-thang 想講我來ê 目的是beh廢除摩西ê 律法á 是先知ê 教示。我來m̄ 是beh 廢除,是beh 成全。(全民版)」ē-tàng看出使徒保羅beh表明ê就是:tī耶穌內面已經完全了律法所需要ê一切。Tī伊ê內面,人就會發見律法真正內涵,而且koh khah容易kā它實踐出來。Tùi馬可福音第十章17到23節所記載,hit位財主來問耶穌有關永恆性命之道ê問題ê時,伊是自細漢就遵守摩西律法ê規定,m̄-koh伊卻無tùi摩西律法中看tio̍h、體驗tio̍h永恆性命之道,chiah會來問耶穌。這tú好teh說明:想靠摩西律法得tio̍h永恆性命ê想法是錯誤 ê。



重新查詢 專卷研經 羅馬書系列
錯誤回報,請聯繫comm[@]fhl.net