利未記 26章40節 到 26章46節 背景資料 上一筆 下一筆 |
Chit段講出tī先知文獻中一個共同ê特色,就是tī懲罰了後,上帝lóng是有憐憫、慈愛,對祂所揀選ê人民會施hō͘恩典kah拯救。Á chit項拯救ê行動是奠基tī「約」ê基礎上。 第40到42節,「Lín ê後代kā承認家己ê罪過」,這表示tī奴隸之地受苦ê時,tùi反省中知影家己嚴重得罪上帝,á會謙卑落來,chit時chūn,上帝會koh一pái記念以色列人民祖先亞伯拉罕、以撒、雅各等kah上帝之間所立ê約,決定伸手救助。 第43到45節,m̄-koh重新立約ê要件,就是beh先清除khiā起tī hit-ê地上ê以色列人民,hō͘ in去外國做奴隸,hō͘土地會得thang安息。 第44節是真重要ê一節,就是上帝並無會因為án-ne受氣就無koh chhap被掠到國外去ê以色列人民,祂會繼續看顧in、照顧in,ná親像過去tùi埃及帶領in出來仝款。只要時間到,就會koh一pái伸手救助in。 第46節,chit節ē-sái講是利未記結束loh。Chit節mā thang講是整段「聖潔法典」(第十七到廿六章)ê總結。 |