雅各書 3章1節 到 3章18節   背景資料  上一筆  下一筆
第三章到第四章lóng是談及生活上ê行為。作者特別tī第三章1到12節,以及第四章11到12節等等兩處經文lóng提起有關說話ê問題,這m̄-nā關係tio̍h對信仰ê認知問題,koh khah是關係tùi信心延伸出來到實際行動。

	聖經中除了箴言以外,會講tio̍h有關嘴舌問題ê,就是用約伯記kah詩篇為siōng chē,所談ê就是描述嘴舌對人造成ê利益kah傷害(參考約伯記二十:16、三十四:3,詩篇三十四:13、三十七:30,箴言六:16—19、十二:19)。

	雅各書ê作者Tī chit章中特別提起嘴舌ê事,就是希望大家tio̍h注意:tī一個信仰團契中,若是無注意hit-ê siōng微小ê事,就真容易造成極大ê傷害。Ná親像tī前一章作者所提起ê,hiah-ê卑微、貧困ê信徒進入教會參加聚會,卻受tio̍h冷漠ê款待,hit種傷害之結果是非常大ê。千萬m̄-thang看輕一個卑微ê人tī咱中間,ná親像m̄-thang疏忽嘴舌chit-ê微小ê器官tī咱身軀上仝款,小khóa一受傷,lóng會造成咱全身不爽快。仝款ê,tī一個以耶穌基督做中心ê信仰團契中,若是有一個卑微ê兄姊受tio̍h傷害,mā會大大影響kui個信仰團契。

    雅各書第三章之經文,主要提起兩個主題,其一就是講tio̍h嘴舌tī人ê言行舉止上帶來ê影響,其二就是有關屬天kah屬地ê智慧之間ê差別。
第1節,「教師」,這tī早期教會中扮演 ná親像猶太人拉比(教師)ê角色,in專門負責教導ê工作。因為「教師」ê角色kah地位崇高,因為án-ne,並m̄是每一個人lóng ē-tàng當教師。當教師若是犯錯,就「tio̍h比別人受koh khah嚴重ê裁判」,因為教師就是tī用言語教導人怎樣認bat上帝旨意kah教示,所以,伊ê錯誤教導所帶來ê影響非常大,伊所受ê批判mā比一般人嚴重。

第2到4節,作者開始tùi一個普遍ê哲理開始講起,chit-ê哲理就是tī chiah-ê世界上,chhōe bē-tio̍h「無過錯」ê人。箴言ê作者甚至講義人mā會「tiāⁿ-tiāⁿ跋倒」(箴言廿四:16)。每一個人lóng會犯錯,m̄-koh犯錯mā區分做故意á是m̄是故意ê。Chia所指ê錯誤,是teh指m̄是故意ê,而且m̄是真嚴重ê。因為án-ne,會反省,就會有控制ê效果。Ná親像一隻馬,只需一個小小ê「嘴環」就ē-tàng控制牠,mā像一艘大船,只需用「一個小小ê舵」就ē-tàng kā它「操縱」,就ē-tàng「跟tòe舵手ê意思」航行。

第5到8節,Tī chit段經文中作者真詳細地敘述嘴舌對人ê影響力是jōa-ni̍h-á大,作者除了頂面所講用馬ê嚼環kah船舵來譬喻,主要teh凸顯嚼環kah馬匹tī體積上ê對比,船舵kah船身mā是仝款。最後則用chit種類譬喻式帶入嘴舌kah人身軀ê對比,說明影響力大ê,並無一定體積就大,反tńg是siōng微小ê體積,卻是有siōng重要ê氣力。作者用此來說明一個人如果對家己ê「嘴舌」(講話)ē-tàng控制ê好,ná親像手握tòa馬嚼環ê人仝款,thang kā馬驅致使非常穩定,就ná親像船長ē-tàng用小小ê舵控制整艘大船。

雅各書ê作者有意說明「嘴舌」雖然體積真小,m̄-koh卻ē-tàng「講大話」,chit-ê意思是teh指自我膨脹、誇口ê話。另外一方面,「講大話」mā是teh指影響真大。作者講「星之火kám m̄是ē-tàng燎原」這是咱非常熟悉ê一句俗語,主要teh說明m̄-thang看輕嘴舌只是身上小小ê器官而已,卻ē-tàng造成極大影響,它影響所及ê全身。做一個人用嘴舌講出無妥當當ê話語ê時,造成ê罪惡m̄-nā會污染咱全身,嚴重ê時甚至會毀壞kui個人。作者tī chia特別提起人有各種ê能力,ē-tàng控制chit世界上ê各種動物,m̄-koh,卻常常無法度控制家己ê嘴舌。

注意第8節所提起ê「毒氣」,這字mā thang當做「飛箭」解釋。Án-ne就會明白一個人若是無注意tio̍h講話ê內容ê時,就kah-ná看tio̍h一支有含劇毒ê飛箭射出去仝款,傷害了對方,mā hō͘家己陷入犯罪中。

	第9到12節,chit段經文lóng是相對ê句型,包括頌讚kah詛咒、甜kah苦、甘甜kah鹹澀等。注意第12節ê「無花果樹無法度結橄欖;葡萄樹無法度結無花果」chit句話,這是一句中東地帶真流行ê俗語,意思就是除非天地顛倒,若無,這是無可能發生ê事。作者tī chia講仝款ê一個泉水,無可能同時湧出甘甜kah鹹澀兩種無仝氣味ê水。

第13節,「好行為」、「美好ê生活」,lóng是teh指具體行動產生出來ê結果。作者koh一pái tńg來到chit本書信siōng本來ê一個主題:有好ê行為,ē-tàng證明一個人真正認bat上帝。

第14節,一個會「自誇」ê人,mā就是詩人所講ê「狂傲ê人」(參考詩篇十四:1),chit種人心中bē有上帝。作者強調「講白賊」就是「對敵真理」ê行為。因為真理就是上帝,當人講白賊ê時,就是m̄承認上帝。

第15到16節,chit兩節kah第17到18節是相對ê經文;前兩節提起屬地上ê「智慧」,kah後兩節講ê屬天頂ê「智慧」是無仝ê。作者提起屬地上ê「智慧」,其實是「屬情慾」ê,mā屬tī「魔鬼ê」,這包括「嫉妒kah自私」、「紛亂kah各種邪惡ê行為」等。M̄-koh屬tī天頂ê「智慧」是「純潔」、「和平、謙和、友善、充滿tio̍h仁慈」、「無偏私、無虛假」等。

最後作者用土地kah掖種子做譬喻,kā「和平」ê種籽掖tī土地上,必定會收tio̍h正義ê果子。耶穌基督tī登山寶訓講:「Hō͘ 人和平ê 人實在有福氣,因為in 會成做上帝ê kiáⁿ 兒!(全民版)」(馬太福音五:9)若beh見證福音,siōng基本ê事就是:不製造紛亂、鬥爭,卻是推動和平。因為如果無「和平」,以基督ê名建立起來ê教會就無見證。

重新查詢 專卷研經 雅各書系列
錯誤回報,請聯繫comm[@]fhl.net