何西阿書 4章1節 到 4章19節   背景資料  上一筆  下一筆
先知何西阿ê信息siōng珍貴ê一點,就是kā上帝kah以色列人民之間ê關係以「夫妻」ê關係來說明。伊講上帝beh「娶」以色列人民為「妻」,是以「信實」ê態度。信實,這是聖經中非常重要ê信息之一,講出上帝是一個值得信靠ê上帝,祂堅守kah以色列人民祖先所立ê「性命之約」,並且kā chit「約」延續到後代kiáⁿ孫。祂答應beh承認以色列ê後代kiáⁿ孫lóng是祂ê子民,祂是in ê上帝。這就是上帝ê信實,mā是上帝ê特性之一。

M̄-koh tio̍h注意ê是:有「信實」ê上帝,koh khah需要有忠實ê信徒。無法度因為上帝是「信實」ê,就隨便起來。德國神學家潘賀華(Dietrich Bonhoeffer)就bat講過,有人kā上帝當做解決問題ê神,kah-ná teh使用物件仝款,用過了後無需要了,就棄sak。Chit種上帝tī chit種心態ê人心目中,ná親像一位「空隙之神」,只是teh彌補人ê需要而已,當人滿足了需要以後,就kā上帝bē記得,á是棄之無ài。當有一工發現需要koh khah大ê氣力來支持ê時,chiah koh再去chhōe chit位thang滿足伊需要ê神來應急。Chit種神,m̄是kah伊性命交纏做伙,卻是tī伊性命之外ê「工具」,而chit點chiah是真確信仰上siōng大ê障礙。

第四章kah頭前三章有真大ê無仝;頭前三章lóng kā重點放tī先知何西阿ê家庭,以伊ê家庭為主軸來談論以色列人民án怎棄sak kah上帝之間「夫妻」ê關係。Chit章則kā重點khǹg tī上帝ê僕人祭司身上;祭司ê工作原本應該是幫助人民認bat上帝,m̄-koh tī chit章kā咱講,以色列ê眾祭司m̄-nā無án-ne盡本分,顛倒ê,in是帶頭引chhōa人民犯罪ê禍首,上帝無法度原諒chiah-ê祭司。Á人民mā允准chit種祭司存在,m̄-nā對in無利益,kan-taⁿ會為國家、社會帶來koh khah大ê傷害。

第1到3節,koh一pái看tio̍h上帝透過祂ê僕人先知何西阿對以色列人民提出「指控」,ná親像tī法庭中beh kah對方辯論仝款。上帝ê指控並m̄是隨便講ê,卻是有證據ê。這證據就是上帝kah以色列人民之間ê夫妻之「約」。上帝提出以色列人民以「不忠m̄信」(中文《和合本》用「無誠實,無良善」,《台語漢字本》mā是仝款ê用詞)ê方式,拒絕履行kah上帝之間「夫妻」ê關係。所謂「不忠m̄信」,是teh指以色列人民並無無誠實遵守in kah上帝之間夫妻ê「約」,in bē記得上帝,去拜偶像神明。Koh講,先知何西阿指出以色列人民違背kah上帝之間「約」ê關係ê具體行為,就是包括「背誓、講白賊、凶刣、偷the̍h、姦淫」,chiah-ê lóng是kah十誡ê禁令有關。

Koh khah嚴重ê是in tī chiah-ê犯罪ê事頂面,是「不斷來犯罪,血案纍纍」,而且是jú犯jú深。因為án-ne,上帝kā採取嚴厲手段懲罰以色列人民,包括(1)土地會炕旱,人會渴死;(2)所有ê動物—空中ê飛鳥、地上ê行獸、水裡ê魚類等lóng tio̍h面臨死亡。換句話講:人ê生活teh beh面臨koh khah大ê災難、痛苦。因為如果無chiah-ê動物存在,人ê生存希望mā會真渺茫。

第4到6節,tùi第4節開始,指出真正帶領以色列人民棄sak上帝ê,竟然是眾祭司kah先知。祭司ê工作是beh幫助人民透過敬拜、獻祭認bat上帝拯救ê慈愛。Á先知ê主要工作,就是忠實地kā上帝ê話傳達出來。M̄-koh現在chia講以色列ê眾祭司m̄-nā無用真實ê心敬拜上帝,眾先知mā是仝款,mā無好好á用上帝ê信息教導人民遵守上帝ê旨意。

第7到10節,講眾祭司因為「人數jú chē就jú大膽得罪上帝」,因為jú富有,in就jú驕傲起來。因為án-ne先知何西阿傳出上帝beh用下列幾項,對付chiah-ê怠懈職責ê祭司:

一是hō͘ in ê榮譽變為見笑。所謂「見笑」就是無koh承認in以及in ê kiáⁿ孫是上帝ê祭司(因為祭司是世襲制度)。

二是kā祭司ê地位貶低,無koh享受特權,kah人民仝款同受懲罰。這mā是另外一種侮辱方式。

三是無koh有上帝ê賜福降臨在祭司kah以色列人民中間。上帝ê賜福siōng具體呈現出來ê有兩項:其一是土地生產五穀,二是家族人口生湠chē-chē。Taⁿ上帝beh kā chit賜福收tńg去,hō͘ in無論án怎lóng會有欠缺ê壓力,甚至有斷絕後代ê危險,原因是in棄sak了上帝。

第11節,「新酒kah陳酒」,代表示ê lóng是會hō͘人「神志不清」飲料。
第12到13節,「柴頭」、「木牌」lóng是teh指用木材雕刻ê偶像(參考耶利米書十:3)。Koh khah嚴重ê是iáu因為拜chiah-ê虛假ê神明,卻hō͘家己ê「cha-bó͘-kiáⁿ會淪為娼妓」,新婦會「kah人通姦」。這是因為tī祭拜巴力神明ê時往往會參雜tio̍h kah廟妓行淫苟合,tùi án-ne淫亂ê思維就tī人民心靈中佔有重要ê地位。

第14節,講做chit款tāi-chì就是「無知」,會hō͘ in遇tio̍h滅亡、敗壞ê結果。M̄免上帝懲罰in,in mā會因chiah-ê愚戇ê舉動帶來滅亡。Chia ê「無知」,指ê就是棄sak上帝ê教示。一個人棄sak了上帝ê救恩,去走chhōe偶像神明,並且向chiah-ê用人ê手所雕刻ê偶像敬拜,就是愚戇、無知ê行為,其結果只有滅亡而已。

第15節,提供一個真重要ê背景,先知何西阿雖然是北國以色列人,卻希望猶大人民m̄-thang像北國以色列人民,到「吉甲」kah「伯特利」去禮拜。因為伯特利已經tùi原本ê「上帝之家」變成「犯罪之家」。先知何西阿就是用「伯‧亞文」來形容「伯特利」,mā是teh反應當時ê猶大人民mā相連續不絕地前往伯特利去朝拜金牛kah巴力之神。吉甲,設tī約旦河西部、耶利哥城東邊。Tī北國以色列,吉甲m̄-nā是個軍事重地,mā是宗教、政治中心。

第16節,講以色列人民像「倔強」ê母牛,意思是teh指以色列人民ê心已經硬化了,無法度改變。換句話講,上帝已經決定beh放棄無koh牧養北國ê以色列人民à。

第17到19節,講北國以色列人民ná親像倔強ê母牛仝款m̄聽主人ê話,因為in已經像醉漢仝款,m̄知甚麼是見笑?上帝會採取「chhut-chāi in」繼續墮落落去,這mā是使徒保羅所講ê觀點(參考羅馬書一:18—32)。因為chit種人民已經m̄知甚麼叫做見笑à。In ê心智已經被淫亂所迷惑,kui工浸淫tī荒誕ê行為中,chit種人民必定自食惡果。

重新查詢 專卷研經 何西阿書系列
錯誤回報,請聯繫comm[@]fhl.net