西番雅書 1:1-1:18

註釋:

Tī十二位先知中，有六位先知lóng有紹介in ê家譜á是有身世背景，有先知何西阿、阿摩司、彌迦、西番雅、哈該，以及撒迦利亞等，因為án-ne就容易明白ná時代ê社會景況，並且因為án-ne ē-tàng清楚知影先知言論ê主要目的。Ná親像先知西番雅，tī冊ê開始就講伊是「約西亞做猶大王ê時代」得tio̍h上帝啟示。Á猶大王約西亞是tī主前640年到609年治理國家。列王記第廿二章1節講伊八歲ê時chūn就繼承in父親亞們被謀刣了後留落來ê王位。M̄-koh有一件事非常重要ê，he就是雖然伊只有八歲就繼任為猶大ê國王，ē-sái講是後來卻被列王記作者認為伊是一位帶領國家「做上主認為對ê事」ê國王（參考列王記下廿二：1），chit點真無簡單。當列王記ê作者評論一個國王「做上主認為對ê事」，意思就是teh指chit-ê國王帶領人民敬拜上帝，用上帝ê旨意為中心，廢除國內ê偶像、神壇等chiah-ê違背上帝命令ê行為（參考列王記下十五：4、34、十八：3）。相對ê，如果評論一個國王是「做上主看做邪惡ê事」，he就是chit-ê國王歡喜蓋廟，家己帶頭拜偶像，mā放縱人民去拜偶像（參考列王記下十五：24、28、十六：2、十七：2、廿一：2、20、廿三：32、37、廿四：9）。

約西亞是一個被列王記派ê作者認為是一個「做上主認為對ê事」ê國王，chit點就真難得。舊約歷史學者約翰‧布賴特（John Bright），tī伊所寫ê「以色列史」（A History of Israel）chit本冊裡，真清楚評論約西亞是透過宗教改革來進行國家整頓和合一ê工作。布賴特認為約西亞是kā亞述ê宗教看做是一種國恥ê記號，當以色列人民teh拜亞述人所崇拜ê神明ê時，he是對全能ê耶和華上帝一種極大ê侮辱。所以為tio̍h beh hō͘國家成做tī信仰上純潔，就一定tio̍h先剷除耶和華以外ê宗教信仰，而且剷除iáu包括kah亞述宗教信仰延伸出來ê生活風俗在內。Beh改變宗教信仰態度kah風俗，這並m̄是一件容易ê事，m̄-koh約西亞做到à。先知耶利米mā hō͘約西亞王一個真高ê評價，講伊：「你熱心tī 柏香柴ê 工作，kám 就會做王？你ê 老父kám m̄ 是mā 食，mā lim，mā 行公平kah 公義？Hit 時，伊有得tio̍h 福氣。伊辦理困苦kah sàn-chhiah 人ê 案件，伊就得tio̍h 福氣。Án-ne kám m̄ 是bat 我？這是我—上主講ê。(全民版)」（耶利米書廿二：15—16）

Tùi先知耶利米ê chit段話，ē-tàng看出約西亞王確實是一個真忠實tī上帝ê君王，tī伊治理猶大國期間，帶領以色列人遵照申命記ê律法規定之禮儀守Pôaⁿ過節（參考申命記十六：1—8），列王記ê作者講：「Tùi 士師治理以色列ê時，到以色列王kah 猶大列王ê 時，實在iáu 未有守親像chit 款ê Pôaⁿ 過節。只有約西亞王十八年，tī 耶路撒冷守chit-ê Pôaⁿ 過節服事上主。(全民版)」（列王記下廿三：22—23）可見約西亞王tī以色列歷史上，hō͘人看做是一位非常重要ê改革者。 

Beh做一個改革者，無論tī甚麼領域lóng是真困難ê，尤其是做一個國王beh改革已經腐敗至極ê社會風氣，特別是tī宗教信仰上ê墮落，ná koh khah是困難重重，這m̄-nā是古代án-ne，即使tī今á日mā是án-ne。

第1節，這是一份紹介有關先知西番雅ê簡單族譜。Chit份族譜看起來像似簡單，m̄-koh卻連續寫四代，這mā是在先知文獻中非常少見ê。尤其值得注意ê是最後一句「希西家王ê玄孫」。如果chit句話正確，án-ne，先知西番雅就是擁有王族ê血統。

Koh講，tùi chit節thang看tio̍h真清楚ê歷史背景，就是先知西番雅ê時代，是tī約西亞當猶大王ê時chūn；約西亞是tī主前640到609年當猶大王。Tī伊ê時代siōng值得注意ê一件事，就是清潔耶路撒冷聖殿。表面上看起來，約西亞王是teh進行宗教改革運動，其實，伊是teh進行社會改造ê工作，而就tī chit時chūn，先知西番雅出現來傳達上帝ê信息。Tùi chia thang看tio̍h先知m̄-nā出現tī一個動亂不安ê世代，mā出現tī一個改造運動ê時刻，mā出現tī一個安定ê環境中。換句話講，每一個時代lóng會有上帝ê話，每一個地方lóng有上帝信息，只要用心注意聽，就會聽得tio̍h。

第2到3節，真類似創世記記第六章5節所講ê：「上主看tio̍h 人tī 地上，罪惡真大，心內所想ê 念頭ta̍k 日lóng 是pháiⁿ ê。(全民版)」其實，類似chit種警告一再出現，親像以賽亞書第廿四章1節，耶利米書第四章24到26節，何西阿書第四章3節等等。先知ê文獻會出現chit種警告話語，lóng是kah當代社會ê墮落，以及棄sak上帝ê教導到非常嚴重之程度，chiah會引起上帝án-ne忿怒。

第4到6節，開始就真清楚講出有關宗教信仰上ê問題，he就是上帝siōng討厭ê行為—拜偶像。先知西番雅tī chia提起上帝beh懲罰chiah-ê拜偶像神明ê對象有四種，一是拜巴力ê人，尤其是hiah-ê迷惑人去拜巴力ê祭司；二是拜日月星辰ê人；三是hiah-ê一方面kah上帝有立約，soah koh去拜「米勒公」神明ê人；四是hiah-ê棄sak上帝ê帶領ê人，chit種人ē-sái講是心內無上帝ê人。

第7節，開始談起重要ê詞字，就是「上帝ê日子」，這mā是先知運動中非常重要ê觀念，是teh表明上帝「審判ê日子快到à」。所以chia講「tī至高ê上主面前肅靜」。意思是teh指當法官beh宣告審判ê結果ê時，所有ê人lóng一定tio̍h起立（肅立）聽宣判。所以tī上帝面前肅靜，就是beh注意聽上帝宣告審判ê結果。

續落來chit句話真奇特，講上帝「準備犧牲」家己ê子民hō͘「仇敵掠奪」。這ná親像先知耶利米所講ê，上帝重新揀選巴比倫帝國皇帝尼布甲尼撒當祂ê奴僕（參考耶利米書廿五：9），原因是上帝不斷來差派祂ê奴僕去傳達信息hō͘以色列人聽，m̄-koh in「lóng是m̄聽，mā免chhap」（參考耶利米書廿五：3—4）。

第8到9節，chia看tio̍h先知文獻siōng明顯ê用詞「上主講」，眾先知用chit句話來表示伊所傳講ê信息，並m̄是家己ê意思，卻是上帝beh伊講ê。

Koh講，chia mā提起上帝beh「懲罰」ê第一個對象是「官長、王子，kah一切效法外族風俗ê人」。第二種對象是hiah-ê「以強暴、欺詐剝削弱者ê人」。在先知西番雅時代，就是tī社會中做流氓、烏道份子，若無就是hiah-ê利用權勢欺壓弱勢者。In進入別人ê厝內搜刮人民ê財產，然後堆積tī主人ê倉庫中，chit種人tī審判ê日子來到ê時，上帝絕對bē闊手、赦免in。

第10到11節，lóng提起有關耶路撒冷城ê問題。Chia講有一個叫「魚門」ê城門，chia因為比一般勢khah低，所以siōng容易受tio̍h敵人ê攻擊。所以tī chia聽tio̍h真chē「痛哭」kah「哀號」ê聲音，表示敵人已經攻入chit-ê城門。包括tòa tī「下城地區ê人」mā是。雖然有派駐重兵，m̄-koh á是仝款被攻陷。

第12到13節，先知西番雅警告hiah-ê做邪惡ê tāi-chì ê強暴者，伊講上帝ê懲罰會非常徹底，ná親像巡察ê人手「the̍h燈」挨家挨戶去「搜chhōe」仝款，無論怎樣bih起來，lóng無法度逃避上帝ê懲罰。Mā因為上帝ê懲罰是明察秋毫，只要是詐欺所得tio̍h ê，lóng teh-beh賠償出來。Chia講chit種人tòa不進家己建造ê厝，mā lim bē-tio̍h家己所kek ê美酒。這ná親像先知阿摩司所講ê仝款（參考阿摩司書五：11）。上帝beh hō͘ chiah-ê人ê奸巧計畫落空，lóng無所得。

第14到16節，先知西番雅提起「上主ê大日子快到à」，然後，續落來講上帝ê chit-ê「大日子」絕對m̄是好日子，卻是災難連連不斷、續接teh來日子。先知西番雅用「悲慘」chit-ê詞來形容上帝審判日子ê時，這「悲慘」是包括「傷心哀哭」；上帝ê「忿怒」；人民「苦難災禍」、「摧殘破壞」、「烏暗幽冥」、「愁雲滿佈」，mā同時是戰爭ê軍號響亮日子。Chiah-ê形容thang參考阿摩司書第五章18到20節。

第17節，提起上帝ê懲罰來臨時，人會像「chheⁿ-mê人仝款摸索」，m̄知逃難ê路徑怎樣行，chit種警告mā出現tī申命記第廿八章28到29節中。即使tī大日時頭，mā lóng看bē-tio̍h陽光，而緊接tī黑暗了後ê，就是大量ê死亡，這ē-sái講是非常嚴重ê懲罰，ná親像上帝teh帶領以色列人出埃及chìn前，hō͘ in「烏暗」之災難ê懲罰仝款（參考出埃及記十：21—22），tī黑暗ê後面，就是死亡臨到（參考出埃及記第十一章）。

第18節，特別強調tī「上主受氣ê日子」，這真清楚就是上帝懲罰ê時間到à。Á hit時chūn，金銀財寶是無作用ê。因為上帝決定beh毀滅ê情況，就ná同在挪亞時代仝款，人心ê邪惡已經hō͘上帝傷心到極點，hō͘祂決定beh「徹底消滅」世上所有ê一切。

西番雅書 2:1-2:15

註釋:

Tī第一章已經有紹介過先知西番雅ê時代，就是tī約西亞做猶大王治理國政ê時期，伊任內siōng重要ê事蹟，就是潔淨耶路撒冷聖殿，並且帶領以色列人民重新tńg來到敬虔ê信仰生活。約西亞王做一件以色列歷史上siōng重要ê大事，就是伊在位ê第十八年重新帶領以色列人民tī耶路撒冷照約冊所規定ê方式舉行Pôaⁿ過節ê活動（參考列王記下廿三：21—23）。

Tùi第一章thang看見先知西番雅bat真嚴厲ê警告過，上帝忿怒ê大日子會真緊來臨。伊清楚指出hit日子會是一個「悲慘」ê一工（參考一：14），mā是「苦難災禍」ê時chūn，koh khah是「摧殘破壞」ê時刻（參考一：15）。因為上帝受氣à，而且上帝會kā忿怒ê火來「快速燒毀全世界，伊beh徹底消滅世上ê人」（參考一：18）。

Tī第二章，先知西番雅koh khah進一步講出chiah-ê kā受tio̍h上帝嚴厲懲罰ê對象，並一一講出in ê名，這就是先知ê職責。先知bē講出hiah-ê隱晦不明ê信息，因為伊傳達信息ê目的就是beh hō͘聽tio̍h ê人lóng清楚明白，thang hō͘上帝ê拯救信息真緊進入人心，hō͘受害ê人得tio̍h鼓舞，同時mā tio̍h hiah-ê違背上帝旨意ê人有悔改ê機會，這ná親像約拿書所記載ê情節仝款。

第1節，「m̄知恥」，chit-ê詞原本ê意思是teh指心中無上帝ê人。「覺醒pah」，這是一句勸勉ê話，先知西番雅ài聽tio̍h伊信息ê人，趕緊醒悟過來，m̄-thang koh再像過去hit種，去求問虛無ê假神，以及追chhōe對人性命得救lóng無路用ê物件。

第2節，先知西番雅呼籲大家悔改tio̍h趕緊，m̄-thang躊躇，mā就是趁家己iáu活teh thang表白chìn前。所以伊用「像一朵花凋謝以前」，這是teh指tī iáu活teh ê時chūn，就beh趕緊悔改。卻m̄是等到人無法度自主ê時，想tio̍h悔改就已經來不及à。

第3節，先知西番雅提出一個重要ê信息，就是「謙虛地聽從」上帝命令ê人，tio̍h會記得「走chhōe上主」、「追求正義」，只有chit種人chiah會知影tī上帝面前tio̍h「謙卑」，chit種人tī審判日子來臨ê時，就「ē-tàng逃脫懲罰」。

所講ê「謙卑」，指ê是知影遵守上帝ê誡命、旨意、教導ê人。Chit種「謙卑」kah一般人所講ê「品格」並無相仝。一個人tī品格上真可能表現出謙卑ê心境，m̄-koh卻無一定是真實地遵守上帝ê教導kah信息。

先知西番雅tī chia講「走chhōe上主」，kah先知阿摩司一再呼籲ê仝款（參考阿摩司書五：4、6），lóng是一再強調只有án-ne chiah有生路。

第4到6節，chit段經文是teh回應第一章18節所講ê，上帝ê怒火kā延燒到全世界，就ná同在第一章3節所提起ê，上帝「beh tùi地上殲滅人類」仝款。先知西番雅ê信息m̄是只針對以色列人民，卻是對所有當時圍tī以色列國四周ê國家、族群。

Chia提起非利士人族群所khiā起ê城市，包括有迦薩、亞實基倫、亞實突、以革倫等四個城市。另外iáu有一個名叫迦特ê城市先知西番雅無提起，有可能是在先知西番雅ê時代，迦特城已經衰微、不重要à。非利士人是用色列人民進入迦南地了後，siōng hō͘ in感覺頭殼痛ê族群，in時常來侵犯以色列人民ê社區，甚至也bat搶去以色列人民siōng看重ê約櫃（參考撒母耳記上四：10—11）。先知西番雅講非利士人所khiā起ê chit四個城市lóng會因為上帝嚴厲ê懲罰而成為廢墟，ná親像第6節所講ê，會變成「空曠ê野地，只有牧者ê草棚kah羊kho͘-á」。

第7節，先知西番雅提起「劫後餘生ê猶大人」，chit句話一再出現tī先知ê文獻中（參考以賽亞書十：20、廿四：14、廿八：5、三十七：31—32，耶利米書三十一：2，彌迦書五：7、七：18，哈巴谷書二：8）。「劫後餘生ê猶大人民」指ê就是tī上帝懲罰了後，iáu活teh ê猶大人。Tī聖經ê作者眼中，in是上帝特別存留ê，為tio̍h是beh更新in ê心靈，hō͘ in知影只有聽從上帝ê旨意，chiah ē-tàng存活落去。而且上帝kā以色列人民過去被佔領ê城市、土地lóng清除清氣，chiah帶領chiah-ê劫後餘生ê以色列子民tńg去故鄉定居。

第8到9節，chit兩節特別提起摩押kah亞捫人ê問題。Chit兩個族群khiā起tī約旦河東岸。摩押kah亞捫chit兩個民族其實mā是用色列人民ê遠親，in是亞伯拉罕ê姪á羅得kah家己ê兩個cha-bó͘-kiáⁿ亂倫之下所生ê kiáⁿ孫（參考創世記十九：37—38）。先知西番雅講摩押人kah亞捫人「嘲（sau）笑」、「辱罵」上帝ê子民，並且iáu加上恐嚇。先知西番雅講，上帝bē許可chit種事發生，會對chit兩個民族採取嚴厲懲罰當做回應，而懲罰ê方式「像所多瑪kah蛾摩拉仝款」，指in會遭遇tio̍h毀滅。

第10到11節，chit兩節講摩押kah亞捫人被懲罰ê另外一個原因，是因為in「驕傲自大」，這thang tùi先知以賽亞ê作品（參考以賽亞書十六：6），以及耶利米書第四十八章看會出來。

第12節，特別提起古實人ê問題。古實設tī埃及ê南部，真可能kah衣索匹亞人有關，就是teh指現今ê蘇丹chit-ê國家。先知西番雅tī chit節只簡單地講上帝beh刣死古實人，並無明確講出原因，m̄-koh必定是kah in bat侵犯以色列人民有關係。

第13到15節，chit三節koh一pái提起上帝beh毀滅亞述帝國。先知西番雅ê時代mā是亞述帝國siōng興旺ê時代。亞述帝國tī主前721年消滅ê北國以色列，並且俘虜了以色列人民，然後kā in販賣到奴隸市場，差不多是beh kā以色列人滅族（參考列王記下十七：5—6、24）。這是非常殘忍ê作法，mā絕對bē hō͘上帝所許可。

「尼尼微」，這是亞述ê首都，原本是siōng繁榮ê城市，taⁿ會因為上帝ê嚴厲懲罰而變成荒涼ê所在，而且iáu會成做野獸、飛鳥群居做巢做窩ê所在。原因是第15節所講ê，它「誇耀家己ê能力」，koh khah嚴重ê是家己認為有「世界上siōng偉大ê城」，是全世界siōng偉大ê國家。

Chit種情形ná親像先知以賽亞teh譴責巴比倫帝國ê淪亡仝款，因為伊kā家己放teh kah上帝同等位階（參考以賽亞書十四：14），這是非常無應該ê事。就án-ne上帝一出手，主前612年上帝興起巴比倫kā亞述帝國消滅。被揀選ê子民，無論是甚麼人，lóng tio̍h會曉謙卑。因為有謙卑ê心chiah bē自認為是神明，而bē記得家己ê強大是來自上帝賞賜ê力量。

西番雅書 3:1-3:20

註釋:

Tùi先知西番雅ê信息thang看tio̍h一個真嚴肅ê景象：上帝ê審判來臨à，而且是已經火燒目眉à。Tī第一章伊一再提起「上主ê大日子快到à」、「上主受氣ê日子」會像「怒火迅速」地來到，會徹底地消滅全世界。然後tī第二章指出上帝beh懲罰ê對象包括非利士人、摩押人、亞捫，以及亞述人。Á chiah-ê被指明beh毀滅ê對象lóng有一個特色，就是in根本就無kā上帝放tī眼內，原因是in lóng認為家己真有能力，甚至自認ē-tàng抵擋上帝，ná親像亞述帝國皇帝認為家己ê首都尼尼微城是世界上siōng偉大ê城市仝款（參考二：15）。Koh講，in ê驕傲mā表現在嘲（sau）笑上帝ê選民（參考二：8），這就ná同在看bē起上帝仝款。

m̄-koh上帝懲罰chiah-ê邦族，並無表示以色列人民就無問題，先知西番雅ê信息mā指出耶路撒冷上帝ê子民違背上帝ê旨意，上帝mā會照樣懲罰。上帝真清楚表示：祂beh除滅所有驕傲ê人，hō͘萬國萬民知影謙卑tńg來到上帝面前。

Koh講，這第三章ná親像真chē先知文獻作品共同ê特色，就是上帝ê憐憫帶hō͘祂ê子民希望，就是帶領祂們tùi流亡ê所在重回家園。

第1節，chia講「耶路撒冷」是teh指猶大人民，in teh代表以色列民族，是上帝ê選民。先知西番雅tī第二章就已經指出上帝beh懲罰非利士人、摩押人、亞捫人，kah亞述人後，現在伊koh進一步講，上帝beh懲罰ê對象mā包括祂親自揀選ê子民以色列人民。Tùi chia thang看tio̍h上帝ê懲罰是公義ê，祂bē因為是家己揀選ê子民犯罪，態度就比較khah闊容。而且chia清楚指出in拒絕上帝ê話之具體證據，就是「腐敗、叛逆、欺壓家己ê人民」。Chia所提起ê「腐敗」，是teh指貪污，而「叛逆」，是teh指無遵從上帝ê話去關心弱小困苦ê人，而且iáu「欺壓家己ê人民」，chit句話已經teh說明有權勢ê人，用殘酷ê手段對待hiah-ê貧困無助ê弱者。

第2節，chit節一連串提出四點以色列人民激怒上帝ê原因，包括有：一是「無聽從上主」。二是「不接受伊ê管教」，這kah拜偶像ê行為是仝款ê。三是「不óa靠上帝」。Chia ê「óa靠」意思是teh指「信賴」。意思就是講以色列人民並m̄相信上帝，á是講in bē記得上帝有拯救ê能力。四是「boài向伊祈求幫助」，表示in心中已經無上帝à。

第3節，提起以色列人民ê領袖，包括大官員等所犯ê罪行。先知西番雅講chiah-ê大官員像「吼叫ê獅」，而法官竟然是像「iau餓ê豺狼」，這lóng teh表示眾官員對待人民kah-ná看tio̍h獵物仝款，意思是chiah-ê官員是貪婪到ná親像iau餓ê獅、豺狼只要有錢，不管案件ê真相，就ē-tàng歪曲真相無顧公義。而且是「連一條骨頭lóng m̄肯留到早起」，意思是teh指連骨髓、骨頭碎片lóng吞落去。另外一個意思就是in貪污ê手路非常細膩，就算想beh chhōe-tio̍h in ê罪狀mā「chhōe bē-tio̍h痕跡」。

第4節，前一節談起政府官員領袖，chit節指出宗教領袖ê墮落，而且比任何官員ê貪污koh khah恐怖、驚人。

「先知」，這應該是忠實tī上帝ê信息chiah-tio̍h（參考列王記上廿二：14），m̄-koh現在先知卻是「無負責任，koh詭詐」，表示先知並無忠實傳達上帝ê信息，卻是kan-taⁿ會講討人歡喜ê話，án-ne chiah是siōng危險ê事。

「祭司」ê責任是帶領人認bat上帝ê救恩，mā tio̍h幫助人透過祭典禮儀，敬拜上帝。所以in只有ē-tàng用純潔ê心幫助人來認bat上帝。Ē-sái講是現在祭司並無án-ne盡責，先知西番雅tī chia所譴責ê祭司，就kah先知以西結所講ê完全仝款（參考以西結書廿二：26）。

第5節，先知西番雅講無論世代ê景況jōa-ni̍h-á惡質，即使在先知kah祭司，以及社會上有影響力ê人án怎墮落，上帝á是仝款會秉公行義，祂一定會嚴厲懲罰chiah-ê óa靠權勢為非做pháiⁿ ê人，絕對bē放過in。因為上帝是「公義」ê，祂一再用各種方式來啟示祂ê憐憫kah公義ê審判。M̄-koh有kóa人á是仝款，並免chhap上帝ê審判，「繼續做pháiⁿ，m̄知見笑」。

第6到7節，chit兩節真清楚提起當一個國家看tio̍h另外一個國家遭遇tio̍h毀滅ê災難ê時，應該會反省家己是m̄是mā有仝款ê問題，免得家己mā仝款遭遇tio̍h上帝ê毀滅，án-ne chiah是正確mā是應該有ê態度。這mā是先知西番雅tī第二章一開始就用ê句話「覺醒pah」、「走chhōe上主pah」，用意就是tī chia。M̄-koh先知西番雅講上帝真失望，因為祂非常期待祂ê子民悔改，卻無得tio̍h回應。In ê態度就是輕視上帝ê恩典。

第8節，chit節講上帝懲罰chìn前lóng會有「控訴」ê舉動。這ná親像一個法庭beh開庭chìn前，會先由檢察官提起控告，續落來chiah是審判。上帝mā tio̍h聚集所有國家á是族群同齊看hiah-ê hō͘上帝起訴指控ê國家ê罪狀，看tio̍h上帝kā in ê罪狀非常詳細確鑿ê列出來ê時，會曉警醒並趕緊悔改。

第9節，tùi chit節開始直到第20節，lóng是teh談到耶路撒冷ê以色列人民已經悔改歸向上帝。所以上帝beh帶hō͘ in極大ê喜訊，m̄-nā hō͘ in脫離仇敵ê掌控，並且iáu thang kā四散tī各地ê同胞重新聚集tńg來。

Chia講聽tio̍h上帝beh控訴ê時，真chē人因為án-ne知影tio̍h趕緊悔改，知影tio̍h「求告」上帝ê名，上帝一定會赦免、拯救chit種人，hō͘ in保存性命並且有後代thang延續性命（參考創世記四：26）。

第10節，「四散ê子民」這是teh指四散世界各地ê以色列人民，mā thang講是teh指世界上所有ê人。第12節講連khiā起到「遙遠ê古實」之地ê居民mā ē-tàng tńg來，大家koh一pái聚集做伙，而且是「一心一意事奉」上帝，beh向上帝「獻祭」。

第11到12節，chia出現相對ê詞句—「驕傲自大ê人」kah「謙虛卑微ê人」。上帝beh除滅前者，m̄-koh卻會留落來後者並庇護in。

第13節，「殘存ê」á是「劫後餘生」，chiah-ê lóng是teh指上帝憐憫ê對象，特別是hiah-ê hō͘上帝刻意留落來當做復興之種籽仝款ê以色列人民，會tī tńg去家園了後，重建家園、歌頌上帝ê偉大。先知西番雅特別說明chiah-ê人會án-ne hō͘上帝所留存落來，是因為in「不koh做pháiⁿ事，不講白賊，mā不欺詐」，koh khah重要ê是in知影「求告」上帝ê名。Mā所以in tī上帝ê庇護之下，bē koh再有驚惶、不安，因為有上帝同在ê人，就m̄免koh再「驚惶任何人」。

第14到15節一直到第20節是一首歡樂詩歌。先知西番雅tio̍h用色列人民「歡呼唱歌」，而且ài耶路撒冷「滿心快樂」，這lóng teh表明上帝赦免、赦免了以色列民族所犯ê罪。Koh講，上帝赦免ê方式，就是「解除」對以色列人民ê懲罰，相對ê方式，就是「殲滅」in「所有ê仇敵」，以後，in thang m̄免koh再「驚惶災害」，因為有上帝kah in同在。

第16節，無錯，有上帝同在，就不需要「驚惶」，mā無驚惶ê條件。因為有上帝同在，所以以色列人民ê手會勇猛有力。

第17到19節，chit節講tio̍h一個有上帝同在ê人，必定會有「歡悅」、「喜樂唱歌」。相對ê，無上帝同在ê人，就會有驚惶、不安。Chia用「過節ê時hit種歡樂」，來形容以色列人民tùi受掠而「流亡」到各地去ê人ē-tàng得tio̍h釋放ê時，hit種性命ê歡喜快樂之態。

Koh講，當上帝伸手救助óa靠祂、聽從祂旨意ê人ê時，另外一方面表明上帝mā同時tī懲罰hiah-ê悖逆上帝旨意ê人，in自認為真有能力，thang想beh án怎to̍h án怎，不聽從上帝ê話。

第20節，這是上帝hō͘祂子民ê siōng大恩典，就是m̄-nā kā in tùi各地帶tńg來故鄉，iáu-beh加添in ê性命力，hō͘全世界認bat in並且「koh一pái興旺」起來。