提多書 1:1-1:16

註釋:

Tī chit章，伊真清楚提醒提多管理kah組織教會應注意ê事項。Tī chit方面，使徒保羅認為siōng重要ê一件事，就是設立長老。主要目的是希望該教會ē-tàng自立起來，因為長老就是teh負責管理kah幫助福音事工者。

Koh講，tī chit章經文中，mā thang看tio̍h克里特島教會發生ê問題，kah加拉太教會仝款，就是有人進入該教會傳講「另外一種福音」（參考加拉太書一：6、9）強調割禮真重要。伊講傳chit種信息ê人根本就是「叛道」，是「用荒唐無稽ê話欺騙別人」。因為如果認為割禮siōng重要，he等於講耶穌基督ê十字架已經會失去光輝kah拯救恩典ê意義à。Á因為提多是希臘人，使徒保羅帶伊在身邊，mā無替伊行割禮。Chit對克里特島教會信徒來講，特別有意義。

第1節，使徒保羅就自稱是「上帝ê奴僕」，chit種用法真少見，因為tī別所在伊lóng是用「基督ê奴僕」（參考羅馬書一：1，腓立比書一：1），chia卻是用「上帝ê奴僕」。Á「奴僕」，chit-ê詞原本指ê是「奴隸」ê意思，mā就是講完全屬tī主人所有ê財產，個人無甚麼自由thang講。另外一點，使徒保羅採用希臘文「奴僕」（doulos）一詞，意思是teh指：家己是心甘情願地接受上帝差遣，mā完全遵照上帝ê話語傳達信息。

第2節，使徒保羅tī chia強調「真理」是kah「永恆ê性命」分bē開ê。Koh講，使徒保羅tī chia特別提起上帝乃是「不講白賊ê上帝」，意思就是上帝乃是「信實ê上帝」。Á「信實」，chit-ê詞ê意思，就是對所立ê「約」永遠堅持固守，bē改變、mā bē bē記得。表明ê意思是當人ê性命陷入苦難中，上帝決定beh kā人tùi苦難中拯救出來，而這就是第3節使徒保羅所提起ê，伊受付託就是beh宣揚上帝拯救ê信息。

第3節，「ê時機成熟」，是teh指末世ê日子ê意思。Chia所用ê「奉上帝—咱ê救主」，chit種用詞已經teh表示拯救工作是照上帝ê旨意在進行，耶穌基督來到世界上，就是照上帝ê旨意而來ê。Á使徒保羅就是beh kā chit-ê信息宣揚出來，這就是伊受上帝揀選、呼召ê使命。

第4節，chia使徒保羅表明伊kah提多之間ê親密關係，有ná「父子」仝款，ná親像伊對提摩太ê態度仝款。Tī chia使徒保羅稱耶穌基督為「咱ê救主」，而tī第3節mā稱上帝是「咱ê救主」，然後tī第二章10節講「咱ê救主—上帝」，續落來tī第13節koh稱「咱ê救主耶穌基督」，而後tī第三章4節koh稱上帝是「咱ê救主」，koh tī第6節則稱耶穌基督是「咱ê救主」，chit種交替用法，thang清楚看tio̍h使徒保羅思想中beh表達ê一個重要ê觀念是耶穌基督就是kah上帝合一ê救主（參考約翰福音十七：11、21、22，腓立比書二：6—7）。

第5節，「克里特」，這是設tī地中海中ê一個真大ê島嶼，tī希臘ê東南邊。使徒行傳第二章11節記載，tī聖神降臨tī眾使徒身上ê時，hit時在場ê群眾中間，mā有來自克里特島ê人。使徒保羅ài提多tī hit-ê島ê教會設立長老。

第6到9節，chit段經文提起設立長老應該注意ê要件：
一是「無thang指責ê人」（第6節），chit句話並m̄是講一個人完美無缺點，卻是講m̄-thang有hō͘別人握有攻擊把柄ê人。親像當長老ê人「只有ē-tàng有一個bó͘」，仝款ê，若是對一個女長老來講，就是「只有ē-tàng有一個丈夫」。

二是除了忠實tī婚姻生活外，koh khah進一步要求kiáⁿ mā是beh tī信仰上清楚、明白真理ê人。換句話講，本身是一個教會ê長老，就是teh指導信徒認bat真確ê信仰，若是連家己ê kiáⁿ lóng無法度指導，chit種人會成做眾信徒ê信仰指導者，照使徒保羅ê看法，並無適合擔任長老ê角色。

三是tī生活上有規範ê人。使徒保羅tī chia列出了幾點：包括有「不傲慢、不躁暴、不酒狂、無好鬥、不貪財」等五項。其實，kā chit五項併合起來看，就會明白伊要求一個長老應該會曉tī生活上有所節制。

四是tī有積極幫助人ê信仰態度。包括有「樂意接待人」、「歡喜做好事」，chit兩點tī教會信仰團契中非常重要。「歡喜做好事」，chit句話指ê就是心甘情願地參與服事ê工作。

五是「堅守可靠、符合教義ê教示」，這是teh指對聖經ê教導有明確ê認bat，chit點恐驚是siōng重要、mā是siōng基本ê。Án-ne chiah ē-tàng「同時糾正ná反對ê人ê錯誤」。Tùi chia thang看出一點：克里特別區教會內，已經有人teh傳達hiah-ê kah聖經ê教導無符合ê謬誤信息。

第10節，tī該教會中有猶太基督徒傳達尊崇割禮ê信息，這mā是使徒保羅聽了後感覺非常惱怒ê原因。就án-ne，伊希望提多tī chit件事頂面有一個好ê處理方式，看怎樣阻止chit種謬誤ê信息繼續傳出去。Á使徒保羅認為tī克里特教會設立長老就是為tio̍h beh達成chit-ê目標，hō͘教會ê長老來協助提多維持教會ê秩序。

第11節，使徒保羅ài提多「禁止chiah-ê人講話」，ài怎樣chiah ē-tàng禁止chiah-ê人講話？其實siōng好ê方法就是用聖經來教導眾信徒明白謬誤kah正確ê差別。只有án-ne chiah ē-tàng真正堵住chiah-ê傳講錯誤信息ê人ê嘴。

Koh講，使徒保羅提醒chiah-ê傳講無正確信息ê人，mā就是過去伊不時提起ê所講ê「假教師」，主要目的就是貪圖錢財，表面上看起來in kah-ná是大發熱心，m̄-koh骨底卻是想beh thàn錢，kā福音當做商品販賣，chit種行為mā發生tī哥林多教會中（參考哥林多後書二：17）。

第12節，使徒保羅提起tī克里特有一位先知，m̄-koh卻無講chit位先知ê名是甚麼人。真可能chit句話tī使徒保羅ê時代是一句真流行ê俗語，用來形容克里特人ê個性，因為án-ne被使徒保羅採用當做教導ê材料。使徒保羅採用chit句俗語teh形容克里特人ê時，主要teh說明當地ê人真奸巧，不誠實，m̄-thang hō͘ in ê外表所欺騙。

第13節，使徒保羅就要求提多一定會教導信徒活出信仰，án-ne就ē-tàng區別出信kah m̄信之間ê差別。使徒保羅ài提多一定tio̍h「嚴厲責備」hiah-ê亂講信息ê人。

第14節，chia koh一pái指出hiah-ê強調割禮siōng重要ê猶太基督徒，所講ê是荒唐ê信息，chit-ê信息致使in棄sak真理「所堅持ê規例」。
第15節，chit節thang參考馬可福音第七章8到13節，耶穌基督對門徒ê教導。

Chit節講出當時教會tú-tio̍h ê問題，除了猶太基督徒對割禮ê堅持外，iáu面對tio̍h另外一個造成信仰認知上ê困擾，就是所謂「重智派」（Gnosticism）者ê困惑，chit-ê派主張人ê肉體是lah-sap、邪惡ê，只有靈魂chiah是潔淨ê。因為耶穌基督是神聖ê，因為án-ne伊根本就無降生tī人類世界上，因為人ê世界是chiah-ni̍h lah-sap，怎樣ē-tàng被án-ne聖潔ê救主khiā起？這就是「重智派」者所強調ê一種對耶穌基督降生、死、koh活等相對看法。「重智派」ê人iáu會強調若一個人beh真正潔淨，就一定tio̍h謹守禁慾主義，m̄-thang結婚，mā m̄-thang食某一kóa食物等，chit種講詞mā困擾tio̍h以弗所教會，因為án-ne，仝款ê問題mā出現tī使徒保羅寫hō͘提摩太ê書信中，ài伊注意chit-ê派ê人對信徒造成ê影響（參考提摩太前書四：3）。

第16節，是對前述經文ê一個結論，使徒保羅講chiah-ê「主張受割禮ê猶太基督徒」，表面上看起來像基督徒，其實in並m̄是真正認bat上帝，因為in ê言行不一致地。

提多書 2:1-2:15

註釋:

Ná親像寫phoe hō͘其它教會ê信所關心ê事仝款，使徒保羅真chē時chūn teh處理ê事件，除了信仰ê認知之外，iáu有就是有關信徒信仰生活上所tú-tio̍h ê問題。Tùi chia thang明白一點：基督教信仰是kah生活連結做伙、分bē開ê。如果信仰上無好ê規律、嚴正，就真oh傳達信仰ê意義。
第1節，「講到你」，chit句話是用真強ê語句寫出來ê。其實是kah第一章10到16節相對照，因為tī該段經文中，特別提起tī克里特地區教會中，發見有一批「假使徒」teh傳講無正確信息。因為án-ne，使徒保羅指出hiah-ê人ê謬論kah錯誤之外，koh khah重要ê，就是beh提醒提多一定tio̍h teh教導信徒對信仰ê認bat「符合健全ê教義」，就是關係耶穌基督死tī十字架上，以及伊koh活、升天ê事。使徒保羅講chit句話ê時，是用嚴肅，mā接近命令ê語句，ài提多bē-tàng親像hiah-ê傳錯誤信息ê「假教師」，致使信徒背離了信仰。

第2到5節，提醒提多針對年紀大ê人應該有ê教導態度。Tī chit段經文中間，伊特別提起幾點：

一是對男性ê老人，ài in tī信仰kah生活上成做好ê模範。Chia特別提起「信心、疼心、耐心」等三樣信仰內涵，這mā是使徒保羅hō͘提摩太ê書信中提起過ê事（參考提摩太前書六：11、提摩太後書三：10）。

二是對年老ê婦女，ài in tī生活上有所節制。Ài beh特別注意ê所在，是tī chia對年老婦女ê要求方面，包括有「bē-tàng搬弄是非」、「行為tio̍h beh謹慎」、「不作酒ê奴隸」等。

三是對少年ê婦女，ài in重視家庭生活。使徒保羅確實非常強調家庭生活ê重要性，tī伊ê觀念中，家，就是見證信仰siōng重要ê所在。Á婦女則siōng容易見證福音ê人。

第6到8節，chit三節經文是針對少年信徒ê教導。值得注意ê所在，就是伊並無講ài怎樣教導少年人，只有講一句「ài in管束家己」，然續後落來就是beh提多作少年人ê模樣。伊提起「誠懇、嚴肅」這兩項，前者意思是teh指正確、不腐化ê意思。Á後者是teh指tī態度上tio̍h真清楚，不隨便ê意思。

注意第8節所提起ê，不beh hō͘ hiah-ê對敵者有把柄thang攻擊，á是chhōe-tio̍h錯誤thang侮辱，chit點真可能就是teh隱喻hiah-ê假教師；in表面上kah-ná teh教導信徒認bat甚麼大道理，其實心中致意ê是「貪圖錢財」chit件事。另外一方面，使徒保羅mā特別提醒提多，「言語tio̍h適當」，意思真清楚，就是beh言行一致地，bē-tàng講一套，做一套。

第9到10節，chit兩節講tio̍h有關奴隸kah主人之間ê問題，這mā是使徒保羅所關心ê議題。伊tī以弗所書第六章5到9節；歌羅西書第三章22節到第四章1節；提摩太前書第六章1到2節等等處經文lóng有提起過，特別是腓利門chit本書信，談ê就是有關奴隸阿尼西謀ê事。Á tī哥林多前書第七章20到22節，使徒保羅甚至運用chit種主人kah奴僕之間ê關係，譬喻耶穌基督kah基督徒之間ê關係；伊認為耶穌基督就是信徒ê主人，所有ê信徒lóng是耶穌基督ê奴僕。

使徒保羅ê時代，蓄養奴隸ê風氣非常豐盛。Tī使徒保羅ê看法中，身為奴隸siōng重要ê就是誠實。因為án-ne，用誠心順服主人之外，koh khah bē-tàng有「偷the̍h」ê行為出現。

    第11節，「上帝拯救全人類ê恩典已經顯明出來à」，chit句話其實mā teh說明兩個重要ê信息：一是審判ê時刻到à，二是上帝有救贖ê恩典。Tī上帝ê審判中，lóng有奇異ê恩典相tòe。M̄-koh這拯救ê恩典lóng有一個基本ê要件，就是認罪悔改，而chit點mā是kui本聖經ê主要信息之一。無認罪悔改，就無法度看tio̍h á是體會tio̍h上帝憐憫ê疼（參考以西結書三十三：11）。

第12節，使徒保羅一再強調ê基督徒信仰生活ê準則，tī chia伊講tio̍h一個基督徒既然已經領受上帝ê恩典，就應該kah敗壞ê生活有區隔，á是kā過去敗壞ê生活hō͘排除。Chit節所講ê「恩典」，指ê就是第14節所講ê「基督為咱獻上家己，救贖咱」。當聖經teh講「恩典」ê時，是講原本m̄是人有資格領受ê，m̄-koh chit-má卻「白白」得tio̍h à。Á「正直」，這是對待別人á是處理事務ê時應該有ê態度，是bē冤枉別人，mā bē欺負比家己軟弱ê人。「敬虔」，這是teh指kah上帝之間ê關係，表示不隨便，卻是用真實ê態度敬拜上帝。

第13節，這是真重要ê一節經文，使徒保羅koh一pái講tio̍h「蒙恩ê日子來臨」，這是teh指耶穌基督koh再臨ê時chūn，所有信靠伊、歸屬tī伊ê名下ê人，lóng會享受耶穌基督ê救恩。

第14節，一個信耶穌基督ê人，lóng有信仰上ê責任，因為信徒lóng是領受上帝tī耶穌基督內面救恩ê人，因為án-ne應該知影怎樣kā chit種救恩顯明出來。Á使徒保羅認為siōng好ê方式，就是知影去分享chit份拯救ê疼。伊kā提多講這分享ê疼，就是教導信徒「熱心行善」，mā就是beh kā上帝ê疼具體化，付諸實際ê行動。

第15節，chit節thang到使徒保羅對提多ê期待，伊m̄-nā ài提多扮演一個傳道者，kā上帝ê救恩向眾信徒闡明，iáu koh khah扮演監督者ê角色，mā就是beh督促信徒照教導去實踐，如果有不聽從ê，á是有偏離教導ê，bē-tàng隨便了事，卻是應該tio̍h「責備」。「不beh hō͘人看輕你」，chit句話mā bat用tī提摩太ê身上（參考提摩太前書四：12）。Mā tùi chit句話，thang知影提多當時年紀確實是少年。Tī早期ê社會，lóng會有一種看法：經驗kah知識，會跟tòe年紀而增長。M̄-koh使徒保羅ài提多認知一點：傳道者一定tio̍h tī信仰ê認知上，日日進步，m̄-nā自制力tio̍h高，並且teh做tāi-chì上顯出公正ê態度，án-ne chiah會hō͘信徒尊重。

提多書 3:1-3:15

註釋:

咱讀使徒保羅ê書信，真緊會發見伊ê書信有一個特色，就是非常強調基督徒ê信仰生活是帶有社會責任ê。Tī伊ê書信中就一再提醒所有ê信徒，一定tio̍h kā基督徒ê美德展現出來，這是為tio̍h beh hō͘眾人看tio̍h基督徒tī信仰生活上確實有kah眾無仝ê所在。伊認為一個人得tio̍h耶穌基督ê救恩了後，就應該更新心思意念，tio̍h kah未信耶穌基督chìn前有無仝。如果無án-ne，信kah m̄信之間就無甚麼差別。（參考以弗所書四：23—24）。

Tī chit章經文中，thang看tio̍h使徒保羅一再要求提多tio̍h好好á勸勉克里特島教會ê信徒，tī平日ê生活中活出基督耶穌ê樣式，就是beh有koh khah chē實際ê行動去關心困苦ê人。Tùi chit章jōa-chē mā看tio̍h該島教會信徒是自私ê chē，真正有疼心ê人少。

    第1節，chit節提起「ài in服從執政者kah當權者，聽從命令」，類似chit種講法m̄-nā出現tī chia，mā出現tī其羅馬書第十三章1到2節；提摩太前書第二章1到3節。M̄-koh tio̍h注意，m̄-thang單看話語ê表面，卻tio̍h思考一個問題：in為甚麼án-ne講？如果對照一下使徒行傳第四章19到20節所記載，彼得kah約翰對當時猶太siōng koân階級ê議會之議員所講ê話，就會koh khah清楚明白in所講ê「服從」是有條件ê。如果統治者、掌權者beh取代上帝，he是絕對無法度妥協ê。如果掌權者khah強迫信徒去做違背信仰ê事，he是應該抵抗，而且tio̍h勇敢抵抗。因為基督徒siōng大ê使命就是為福音做見證。

第2節，使徒保羅提起一個好ê信徒應該就是一個好ê國民。本身是一個好國民，伊有幾點基本ê生活態度：

一是不毀謗別人。毀謗，是teh指惡意中傷，mā就是故意散佈不實在ê話傷害別人ê意。

二是m̄-thang冤家。所謂冤家，是teh指不接受任何kah家己相異ê意見，只要kah家己顛倒ê意見，就一律反對到底。Chit種態度是錯誤ê。

三是beh 和氣友善。意思是teh指不隨便發脾氣，而是beh「受氣有理」。

四是謙讓（jiōng）待人。謙讓（jiōng） ê意思是teh指溫柔ê態度，mā是仁慈ê另外一個意義。

第3節，伊用「咱」一詞ê用法真特別，主要是hō͘克里特教會ê信徒感受tio̍h包括使徒保羅在內，大家lóng是仝一個家庭ê成員。伊見證講tī伊iáu無tú-tio̍h koh活ê耶穌基督chìn前，家己ná親像一個「悖逆、失迷」ê人仝款。這是teh指性命會失去方向，chit種人，會放縱情慾，為tio̍h追求滿足個人ê慾望，甚至會不擇手段，即使因為án-ne而傷害到別人mā bē致意。M̄-koh chiah-ê行為lóng是錯誤ê。

第4到5節，這是真重要ê一節經文，使徒保羅提醒提多，beh hō͘克里特教會ê信徒知影，被揀選成做一個基督徒，並m̄是因為in有甚麼特別ê才能，á是有甚麼好行為hō͘ 上帝揀選，卻是因為上帝ê憐憫。類似chit種提醒mā出現tī摩西轉達上帝hō͘以色列人ê話中（參考申命記七：7—8）。使徒保羅寫hō͘以弗所教會ê書信mā有提起（參考以弗所書二：8—9）。使徒保羅kā上帝拯救ê焦點，khǹg tī祂ê憐憫kah仁慈上，chit點是非常重要ê。
另外一方面，chit節mā提起早期教會已經實施ê一件事：就是洗禮。洗禮tī早期教會被看做是一個恩典ê記號，這記號表明一個人ê悔改。有悔改，就ē-tàng得tio̍h拯救ê恩典。

第6節，chit節thang看見早期教會信仰告白中非常重要ê信念：三位一體ê上帝。Chit種信仰告白一直傳承到咱今á日ê教會。聖神就是三位一體ê上帝之一，kah耶穌基督同等位格，mā kah上帝相連做伙（參考哥林多前書六：11b）。耶穌基督kah上帝ê靈是分bē開ê，mā kah上帝拯救ê計畫相連做伙。因為án-ne，thang án-ne解釋三位一體ê意義：
聖父上帝：這是teh指創造天、地、海等宇宙萬物ê獨一上帝。

聖Kiáⁿ上帝：就是teh指上帝為tio̍h拯救世人，hō͘人認bat祂ê救恩，祂親自來到世界上，以人ê形體出現，取奴僕ê樣式，成做人生活tī這世間，就是耶穌基督（參考腓立比書二：6—7）。

聖神上帝：是上帝拯救工作ê方式，mā是上帝拯救力量ê記號。Hō͘人受感動soah啟開心門，認bat上帝ê救恩，chit種力量就是聖神ê工作（參考以弗所書一：13）。

第7節ē-sái講是提多書ê中心信息，mā是使徒保羅siōng重要ê思想。Chit節提起兩件事：

一是因為耶穌基督ê緣故，人chiah ē-tàng kah上帝有合宜ê關係。

二是thang ǹg望永恆ê性命。Chit點mā ē-sái講是基督教信息siōng重要ê內容，就是teh傳達一個信息：信耶穌基督ê人，bē死，因為會有koh活ê恩典teh等待伊去領受。

第8節，使徒保羅ài提多tī克里特教會傳揚ê就是chit-ê信息：傳揚耶穌基督koh活ê信息。傳揚chit-ê信息mā是今á日基督教會siōng重要ê使命。

第9節，chit節提起「族譜kah名錄以及律法上ê爭執」，這真清楚是teh指猶太人siōng重視ê割禮。割禮ê問題mā牽涉tio̍h猶太人傳統ê認知，猶太人一直堅持只有亞伯拉罕ê kiáⁿ孫chiah是上帝揀選ê子民。因為án-ne，一個外邦人beh成做上帝揀選ê子民，第一個要件，就是一定tio̍h先成做亞伯拉罕ê kiáⁿ孫。Á亞伯拉罕ê kiáⁿ孫一定tio̍h接受割禮作做記號號（參考創世記十七：11—14）。M̄-koh使徒保羅則強調chiah-ê已經被耶穌基督tī十字架上ê救贖恩典取代à。

使徒保羅為甚麼會kā提多講爭論chiah-ê事無益處？原因是伊tī各地傳福音ê時lóng會tú-tio̍h有kóa保守派ê猶太基督徒，一直teh伊背後強調守割禮ê重要性，hō͘伊非常受氣。

第10到11節，使徒保羅主張對付chiah-ê不時造成教會紛爭ê人，所採取ê態度就是先警告伊，而且tio̍h警告兩pái。如果勸勉了後iáu m̄聽，就beh kah伊切斷來往ê關係，意思就是tī信仰上kā它當做無仝「道」ê人看待。原因就是kah chit種人做伙，信仰bē有成長，顛倒，真可能會敗壞，因為chit種信仰是「腐化ê」，意思是teh指無性命thang講。

第12節，chia提起「亞提馬」chit-ê人。Chit-ê名只tī chia出現，mā因為án-ne，並無任何資料thang hō͘咱對伊有koh khah chē認bat。

「推基古」，伊是亞細亞人，mā是使徒保羅ê同工，伊有真chē pái tòe使徒保羅去旅行傳道（參考使徒行傳二十：4），lóng受使徒保羅ê信任，傳達信件hō͘以弗所教會（參考以弗所書六：21—22）kah歌羅西教會（參考歌羅西書四：7）。使徒保羅mā bat派推基古去以弗所教會，可能是為tio̍h代替提摩太（參考提摩太後書四：12），可見伊tī使徒保羅心目中ê份量真重。chit-má則差派伊去克里特教會代替提多，hō͘提多tńg來到使徒保羅ê身邊。

然後使徒保羅ài提多到「尼哥坡里」去kah伊相會。這是現今南斯拉夫南部亞得里亞海東岸ê一個城市。

第13節，「律師西納」，真可惜聖經無任何資料thang幫助咱對伊有koh khah chē ê認bat。M̄-koh tùi chit節ē-tàng看出伊kah亞波羅同行，mā是一位好ê福音伙伴，因為亞波羅是真優秀ê福音工作者，口才真好（參考使徒行傳十八：24—28），甚至後來tī哥林多教會mā有真大ê影響力（參考哥林多前書一：12、三：4—6、22、十六：12）。In兩人會經過克里特別區，使徒保羅希望提多hō͘ in兩人幫助，mā有聖經學者認為chit張phoe就是託in兩人帶去hō͘提多ê。Tùi chia mā thang看出早期教會對hiah-ê福音工作者有真大ê幫助。

第14節，chit節koh一pái看tio̍h使徒保羅teh教導信徒ê功課上，都無bē記得一件非常重要ê事—分享kah分擔。Ná親像伊kā以弗所教會ê長老講ê話：「Hō͘ 人 ê，比領受 ê khah 有福氣。(全民版)（使徒行傳二十：35）伊認為結出信仰ê果子，就是幫助hiah-ê缺乏ê人。所謂「不beh做閒散無用ê人」，意思就是m̄-thang成做無結出果子ê信徒，意思是如果信仰hō͘人只顧家己，chit種信仰並m̄是真實ê，基督教信仰就是教導咱怎樣伸手幫助需要ê人。因為án-ne，努力行善，就是結出好果子ê方法。

第15節，使徒保羅特別ài提多「向仝一個信仰ê朋友請安」，因為tī第十一節提起對hiah-ê製造紛爭ê人，使徒保羅已經kā它看做無仝信仰ê人，因為án-ne，mā m̄免帶關懷去hō͘ in，mā無需要向in祝福。