路得記 1:1-1:5

註釋:

Chit章主要是紹介以利米勒chit-ê人ê家庭發生變故，然後開始講tio̍h伊ê遺孀拿娥美帶tio̍h堅持跟tòe伊tńg去故鄉ê摩押新婦路得。Tī這章中，真清楚看tio̍h chit位摩押cha-bó͘-gín-á路得對約ê堅持，mā透過路得ê性命告白，thang看tio̍h上帝→人→土地之間ê親密關係。

Chit段經文mā是此本經冊ê序言，紹介故事ê背景，m̄-koh ná親像頭前紹介此卷經冊ê時有講過ê，所謂「士師治理」ê時代，並無一定就是真實背景，真可能是借用而已。

第1到2節，「真久以前」，這是寫小說ê方式，mā teh說明是一個故事題材。「士師治理」ê時代，chit-ê名詞是tùi士師記第二章16節「上主為以色列人指派士師來領導in，解救in脫離侵略者」chit節經文來ê。年代大約是tī主前1380到1050年之間。只要一提起「士師」，意思表示he是一個非常混亂ê世代，當時以色列人民心中已經棄sak了上帝、違背上帝旨意（參考士師記二：11、17、19、三：7、12、四：1、六：1、八：33—34、十三：1），mā因為án-ne，kui個社會ê倫理道德差不多完全淪喪。

Koh講「士師治理」ê時代，另外一個值得注意ê社會景象，就是「以色列無君王」（參考士師記十七：6，十八：1、十九：1、廿一：25），這mā反應出當時ê社會呈現動盪不安ê原因，就是無人teh治理，人人lóng照家己歡喜ê去做，無整體社會ê規律。

「伯利恆」，原本ê地名有含「糧食之倉」ê意思，m̄-kohtaⁿ卻出現「地方上發生饑荒」，chit種饑荒，真可能m̄是氣候帶來ê欠收有糧荒，真可能是人為ê因素，親像囤積á是社會動亂不安hō͘作物無法度照時掖種á是收割致使ê結果。

「以利米勒」，chit-ê名原文ê意思是「上帝是我ê王」（參考士師記八：23）。Chit-ê名ê意思，kah伊帶全家去摩押避難呈現非常明顯ê對照。「拿娥美」，chit-ê名ê意思是「愉快」、「甜美」。

因為饑荒，以利米勒帶tio̍h全家移民去「摩押國，暫時tòa tī hia」，表示in原本只是單純去避難，並m̄是beh久居á是移民。「摩押」，這是teh指羅得kah伊ê cha-bó͘-kiáⁿ亂倫生落來ê gín-á ê kiáⁿ孫（參考創世記十九：37）。Tī以色列人民ê眼中，chit種族群是真「lah-sap」ê，加上以色列人民tī曠野漂流期間，bat受tio̍h摩押人誘惑而棄sak上帝ê旨意，犯了淫亂罪，為tio̍h án-ne有chē kah二萬四千人遇tio̍h瘟疫疾病ê懲罰（參考民數記廿五：1—9），因為án-ne，摩押人久長以來就是以色列人民眼中真無清氣koh帶有世仇ê對象，所以規定m̄ hō͘摩押人進入上帝ê聖所參加聚會（參考申命記廿三：3）。以利米勒可能本來想tio̍h ê是暫時去寄居，避過飢荒ê生活困境。

第3到5節，以利米勒mā想bē到chit pái去摩押暫時寄居，竟然是長到「十年」之久。M̄-nā án-ne，伊ê gín-á瑪倫kah基連mā tī當地分別「娶摩押ê cha-bó͘-gín-á—娥珥巴kah路得」做bó͘。M̄-koh tī十年後，包括以利米勒kah伊ê兩個gín-á瑪倫kah基連lóng相繼往生，而siōng悲哀ê是留落來三個cha-bó͘人，lóng是會失去丈夫。

路得記 1:6-1:22

註釋:

Chit段經文講述拿娥美決定家己tńg去故鄉伯利恆，伊認為上帝hō͘伊受苦。M̄-koh伊ê摩押新婦路得卻chiù-chōa堅決要緊跟tòe伊tńg去。

Chit段經文ê重點tī寡母拿娥美有連續四次發言，tī四pái發言中，有三pái lóng是teh苦勸她ê兩個新婦離開她，m̄-thang跟tòe她。因為伊認為上帝hō͘伊遭遇苦難，若是跟tòe伊，kan-taⁿ會連帶受苦而已。

第6到10節，原本是為tio̍h逃避饑荒而離開猶大到摩押地去，無想到落尾tī異鄉卻發生家庭變故，丈夫、kiáⁿ連續往生，只chhun拿娥美kah兩位新婦。Á tī chit時soah koh聽tio̍h上帝hō͘猶大地「有好收成」，因為án-ne hō͘拿娥美想起tńg去故鄉ê決定。兩個摩押新婦mā tòe伊行，m̄-koh tī半途中，拿娥美改變了想法，伊勸兩個摩押新婦tńg來到家己ê娘家去。會有chit種改變，真可能是想tio̍h兩個新婦lóng是「摩押」ê cha-bó͘-gín-á，m̄-nā無法度參加「上主ê聚會」（這等於講伊chit兩個新婦──路得kah娥珥巴──將無法度參與社交活動，因為in是屬tī所謂「無清氣」ê族類，無人會歡喜kah in接觸、來往），而且會因為in是外國cha-bó͘-gín-á，又koh是寡婦，真容易受tio̍h欺負（參考二：9、22）。因為án-ne，伊勸chit兩位新婦tńg來到家己ê故鄉──摩押國。伊mā祝福in thang chhōe-tio̍h好對象koh再結婚，這是真好ê祝福。M̄-koh，兩個新婦卻表示beh跟tòe伊tńg去伯利恆丈夫ê家鄉。

Chia ê「tńg來到」，並m̄是指身軀語言，卻是指tńg來到婚姻關係ê定位。In beh表明ê態度是：boài拿娥美kā in當做外人，雖然in是摩押cha-bó͘-gín-á，m̄-koh卻是以色列人ê新婦。因為án-ne，「tńg來到」，是teh指ài in 猶原到婚約中ê角色。

第11到13節，作者寫Chit篇故事借用摩西律法ê規定，就是申命記第廿五章5到10節所記載ê：一個人如果結婚後，iáu未生gín-á就往生，伊ê兄弟有責任娶chit位阿嫂á是弟新婦過門，kah伊同房，好替兄弟傳宗接代，以繼承財產。聖經中有chit種故事，包括創世記第三十八章猶大kah她瑪ê故事；新約馬可福音第十二章18到27節，有撒都該派ê人以chit-ê律法背景編造故事問耶穌有關koh活ê問題。拿娥美就是beh hō͘伊ê摩押新婦知影，in若繼續跟tòe伊，會kah伊仝款永遠守寡，chit種cha-bó͘人tī當時社會teh過真痛苦ê生活。

Tī chit段經文有一個中心詞字，就是「等」，拿娥美強調家己無法度「等」chhōe-tio̍h丈夫，然後「等」生gín-á；當生gín-á了後，又ài「等」gín-á長大。續落來，伊mā提醒兩位新婦無法度「等」伊koh再婚，「等」伊有娠生kiáⁿ，koh「等」伊生落來ê gín-á長大。Chiah-ê「等」所表達ê mā是一種性命ê轉逝，bē出現新ê生機。因為án-ne，拿娥美真清楚下了個結論講「這是無可能ê」。

「我真為lín艱苦心」，chit句話mā thang解釋做：「我為lín ê遭遇感覺艱苦心。」á是講：「我比lín koh khah難受！」chia ê「艱苦心」，mā表示對性命已經「絕望」，而且tùi án-ne感覺「悲傷」，甚至chiah-ê「絕望」、「悲傷」，是帶有忿怒ê意思。

第14到15節，兩個新婦中有一個已經離開，chhun落來路得iáu是m̄甘離開，tio̍h kah ta-ke拿娥美tńg去伯利恆故鄉。因為án-ne，ta-ke拿娥美koh一pái勸伊一定tio̍h離開。

Tio̍h注意ê是，chia用ê「伊ê神」之「神」字，是teh指複數ê神ê意思，kah耶和華宗教ê獨一神是無仝ê。這mā說明拿娥美並無阻止新婦tī她厝裡繼續敬拜摩押ê神明。Á chit點mā tú好凸顯後來拿娥美接納路得ê另外一個原因，是路得表明拿娥美ê上帝就是伊ê上帝（第16節）。

第16到17節，chit段話ē-sái講是路得ê性命告白。伊表達了完全認同夫家所有ê一切，包括土地、人民、上帝。第17節ê意思真清楚，即使是死mā無法度hō͘伊kah ta-ke拿娥美ê性命分開。Chit對路得來講，mā是一種性命完全ê付出，伊將不保留，因為án-ne，無論會面對jōa大ê痛苦，伊lóng願意承受。

Koh講，路得tī chia用「離開」，tī希伯來文ê用字是「‘azab」，是teh指「棄sak」、「放棄」ê意思。換句話講，路得是kā家己kah ta-ke拿娥美間ê關係以「約」ê關係表達出來，這是對ta-ke拿娥美表示：bē-tàng將伊棄sak。因為棄sak伊，等於毀了婚約仝款嚴重。

Siōng重要ê是路得講「你ê上帝就是我ê上帝」chit句話，真清楚表示出伊kah娥珥巴siōng大ê差別，就是路得願意放棄家己ê信仰，歸屬以色列人ê耶和華宗教信仰。

第18到19節，就án-ne拿娥美無koh拒絕路得跟tòe伊，婆媳兩人就同齊tńg來到了伯利恆。Á城內ê人看見lóng非常驚奇地叫起來，可能以利米勒chit-ê家族tī伯利恆人人lóng知、熟識ê，m̄-koh khah可能是in看見拿娥美kah新婦路得lóng穿tio̍h寡婦ê衫褲，而且無看tio̍h有cha-po͘人跟tòe tī身邊，就知影chit-ê家族出了問題。

第20到21節，「拿娥美」chit-ê名ê意思原本是teh指「愉快」，chit-má她拒絕接受，她寧可家己被稱做「瑪拉」，chit-ê意思是teh指「苦」、「苦難」（參考出埃及記十五：22—23）。因為她認為家己ê性命遇tio̍h極大ê苦難。她用chit句話來表示苦難：「我出去ê時chūn富足，tńg來ê時chūn上主卻hō͘我空無一物。」表示她m̄-nā喪失丈夫，mā會失去kiáⁿ，chhun落來ê就是家己，已經一無所有。續落來她講「上主責罰我」，這是一句反省，表示拿娥美雖然無可能tī受苦中，m̄-koh她顯然並無tùi苦難中失去信心，顛倒認為這是上帝teh「懲罰」她，chiah致使她受苦。Á這mā teh表示拿娥美反省出來ê結果是：她之所以有苦難，是kah離開故鄉—上帝所賞賜ê土地有關。因為伯利恆原本就是迦南地ê糧倉，目nih-á ê饑荒，必定是kah「亂」（指士師治理）有關。M̄-koh對上帝無信心，chiah是致使人遭遇苦難ê結果。

第22節，chit節講拿娥美kah路得tńg來到伯利恆ê時chūn，「to̍h是開始收割大麥ê時chūn」，這是teh指Pôaⁿ過節kah除酵節開始ê時間。Mā teh回應第6節所講ê「上主眷顧伊ê子民」。表示伯利恆無koh有饑荒ê意思。Chit節mā為第二章預留一記序言。

路得記 2:1-2:16

註釋:

Tī第一章記載路得跟tòe ta-ke拿娥美tńg來到猶大伯利恆城ê時chūn，tú好是收割大麥ê時期（參考一：22）。Tī迦南地，大麥收割ê時期通常是tī三到四月間，大約就是tī Pôaⁿ過節kah除酵節ê時chūn。照摩西律法ê規定，收割ê時chūn，bē-tàng割田邊ê穀物，mā bē-tàng回頭拾ka-la̍uh ê穗，因為chiah-ê是beh留hō͘ sàn-chhiah人kah外僑ê（參考利未記十九：9—10，申命記廿四：19—22）。因為án-ne，第一章22節講拿娥美帶路得tńg來到伯利恆ê時，to̍h是收割大麥ê季節，mā是為以後故事ê發展留落來一個伏筆。因為án-ne，這第二章就是teh描述路得tio̍h波阿斯麥田裡去拾麥穗tú-tio̍h ê各種境遇。

Chit段經文描述路得kah ta-ke拿娥美tńg來到故鄉伯利恆，tú好是開始採收農作物ê季節，因為án-ne，路得主動表示beh去麥田拾麥穗，伊tī拾麥穗ê田裡認bat hit田ê主人波阿斯，二者之間ê對話，thang看出路得kah ta-ke拿娥美回鄉了後ê表現，tú好回應了伊tī第一章16到17節ê性命告白，伊確實做到à chiù-chōa所講ê話。Á波阿斯mā確實照摩西律法ê規定，好款待貧困ê外出者，á是用仁慈對待貧困ê至親、寡婦。

第1節，chit節紹介波阿斯，已經先為第四章ê結局留落來伏筆。Chia講伊是一個「既有錢koh有地位」ê人，koh khah重要ê，伊mā是拿娥美已往生ê丈夫以利米勒ê親族。

第2到3節，ná親像路得ê性命告白仝款，伊認同了ta-ke所有ê一切，因為án-ne，伊主動向ta-ke拿娥美講，beh去麥田拾麥穗。Á tī第3節作者用了「真tú好」chit-ê詞，表示每件事ê發生，背後lóng有上帝奇妙ê旨意在。

有關到麥田拾麥穗ê tāi-chì，tī摩西ê律法中有真清楚ê規定，包括有：
利未記第十九章9節記載：「Lín收割ê時chūn，bē-tàng割田邊ê穀物，mā bē-tàng回頭拾ka-la̍uh ê穗。Lín bē-tàng摘光葡萄園ê葡萄，mā不拾ka-la̍uh地上ê葡萄。Lín ài kā chiah-ê留hō͘ sàn-chhiah人kah外僑。我是上主──lín ê上帝。」

利未記第十九章9節記載：「Lín 收割田 ê 五穀，田 ê 角頭 m̄-thang 割到盡，ka-la̍uh-ê mā m̄ -thang 拾。葡萄園果子m̄ -thang 挽了了，mā m̄-thang拾葡萄所 lak ê 果子，tio̍ h 留 hō͘ sàn-chhiah 人kah出外人。我是上主—lín ê 上帝。(全民版)」

利未記第廿三章22節：「Lín 收割田ê 五穀，田ê 角頭m̄ -thang 割到盡，ka-la̍uh-ê mā m̄-thang 拾，tio̍ h 留 hō͘ sàn-chhiah 人 kah 出外 ê 拾。我是上主—lín ê 上帝。」 (全民版)」

申命記第廿四章19到22節mā án-ne記載講：「你tī 田裡收割五穀，若bē 記得一束tī 田裡，m̄ -thang koh oat 去the̍h，tio̍ h 留 hō͘ 出外人 kah 孤兒寡婦，án-ne上主— 你ê 上帝會tī 你ê 手所做一切êtāi-chì，kā 你賜福。你phah 你ê 橄欖樹以後m̄-thang koh 巡hiah-ê 樹枝，tio̍h留 hō͘ 出外人 kah 孤兒寡婦。你挽你 ê 葡萄，所chhun 落來ê m̄ -thang koh 挽，tio̍ h留hō͘ 出外人kah孤兒、寡婦。你mā tio̍h 會記得你tī 埃及地bat 做奴隸，所以，我命令你tio̍h án-ne 行。」(全民版)」

因為有chiah-ê規定，真chē外族人、sàn-chhiah人、寡婦、孤兒等lóng會到麥田拾ka-la̍uh ê麥穗。

第4到7節，麥田ê主人波阿斯到麥田去巡視，看見一個生份又koh是外族ê cha-bó͘-gín-á，因為án-ne，伊問工頭he是甚麼人家ê cha-bó͘-gín-á。Chiah知影原來是拿娥美ê新婦。Koh khah重要ê，是tī chia回答波阿斯ê工頭講，路得tùi「透早就開始工作，chit-má tú停落來」，表示路得確實是非常用心、認真地tī工作，mā說明路得確實是真用心在學習「認同」夫家ê一切生活風俗。

第8到9節，波阿斯mā確實是盡了「親族」ê本份，m̄-nā留路得tī伊ê麥田拾麥穗，而且交帶「男工m̄-thang欺負」她，iáu thang lim工人phah過來ê水。Chiah-ê lóng teh表示波阿斯對路得非常「好款待」（第2節）。另外一方面，這mā teh暗示上帝已經開始介入路得kah拿娥美chit兩個寡婦ê性命中。

第10到12節，因為波阿斯ê好款待，讓路得非常感動，隨時向伊下拜，這是一種衷心感謝之態。Á波阿斯ê回應mā tú好說明路得tī拿娥美厝裡確實有ná伊tī第一章16到17節所做ê性命告白仝款，伊忠實tī所講ê約定，確實對ta-ke盡了伊當新婦ê責任。Á這mā是hō͘波阿斯深受感動，而用chit種方式來肯定kah 回報路得。

值得注意ê是，為甚麼波阿斯會聽tio̍h路得對ta-ke ê孝行？Chit件拿娥美厝內ê厝務事，若m̄是伊ta-ke拿娥美對人chiap-chiap o-ló家己ê新婦路得，甚麼人會知影in婆媳間ê事？這mā就是為甚麼路得記中，除了記載路得之外，mā teh說明拿娥美chiah是一位既聰明koh有智慧ê ta-ke；伊為tio̍h幫助新婦路得tī異鄉—猶太人ê伯利恆城ē-tàng生存落去，而且ē-tàng chhōe-tio̍h好ê歸宿，不斷對鄉人o-ló路得ê美kah孝行。因為路得是摩押人，tī伯利恆無親無戚，家己無可能對外人講任何家務事。

第13到16節，chit段經文內底，波阿斯koh khah進一步讓路得kah伊同齊食飯，而且食波阿斯準備ê飯，而且命令麥田ê工人hō͘ in路得特別ê優待，即使tùi麥穗禾捆中抽取麥穗都無關係。Chit種好款待ê方式，已經超出一般人所ē-tàng得tio̍h ê禮遇à。

因為tùi收割大麥到小麥期間約有七到八個禮拜。Tī chit段期間中，sàn-chhiah人tī麥田即使真認真拾ka-la̍uh ê麥穗，以及割田邊角落ê麥穗，所得tio̍h ê iáu是非常有限。因為即使一個人一工手中懷抱tio̍h滿滿ê麥穗，mā只不過thang維持一個人大約八到十工ê需要。若是兩個人食，ē-tàng維持ê時間就會相對減少，大約kan-taⁿ ē-tàng支撐五到七工。何況tī麥田中m̄是只有一個人teh拾，iáu有真chē sàn-chhiah人、外出ê人lóng tī拾。因為án-ne，真正ē-tàng拾到懷抱kui個胸前ê，實在真少。Án-ne，全部秋收季節所拾獲ê，beh度過kui個寒天確實真困難。Á波阿斯講路得thang tùi捆縛好ê麥捆中抽取麥穗，mā teh表示路得kah拿娥美m̄免擔心怎樣渡過寒天。

路得記 2:17-2:23

註釋:

Chit段經文是路得tńg去向ta-ke拿娥美報告tī麥田所tú-tio̍h ê經歷，hō͘ ta-ke拿娥美經歷到上帝並無遺棄伊，mā hō͘伊知影tī困境中，有上帝ê手teh帶領、扶持。

第17到19節，chit段經文是路得拾麥穗直到beh暗á chiah tńg去厝裡，這mā表示伊確實是非常認真地tī工作，一點mā不偷lán-si。伊拾tio̍h ê麥穗真chē，大約有「一簍」，這大約有四公斤重，thang供in婆媳兩人食一禮拜。Koh khah值得注意ê，是她koh kā波阿斯hō͘她ê午餐食物帶tńg去hō͘ ta-ke拿娥美食，這hō͘拿娥美驚kah gāng去怎樣會tú-tio̍h án-ne好款待新婦路得ê麥田主人，chit時，路得講ná好款待伊ê人就是波阿斯。

第20節，這是路得記信息非常重要ê一節經文。Chit節說明兩個基本ê信仰觀念：一是上帝m̄-nā是活人ê上帝，mā是死人ê上帝，這表示人ê生kah死lóng是tī上帝掌權之下。二是即使tī siōng困境中，上帝iáu是照顧tio̍h祂ê子民。

Koh講，拿娥美mā發見波阿斯就是伊丈夫以利米勒ê「至親，有義務照顧」伊kah路得。換句話講，上帝安排了至親來照顧守寡ê拿娥美kah路得。
第21節，路得進一步hō͘ ta-ke知影波阿斯ài她留tī伊ê麥田拾麥穗，一直到收割結束。

第22到23節，chia thang看tio̍h寡婦真可能受tio̍h欺負，特別是外族人ê寡婦koh khah是án-ne。因為án-ne，既然是家己ê至親，koh chiah-ni̍h好款待路得，拿娥美就叫路得mài換麥田，繼續留tī波阿斯ê麥田拾麥穗。

「路得繼續kah ta-ke tòa做伙。」chit句話有真特別ê隱喻作用，表示路得並無tī麥田中去kah其他ê工人來往、親密，伊iáu是仝款忠實tī伊ê夫家，雖然丈夫已經往生，伊iáu少年，m̄-koh ná親像伊對ta-ke拿娥美所告白ê，伊絕對bē離開。

Tī巴勒斯坦，收割大麥ê時間是tī三、四月間，chit期間kah除酵節、Pôaⁿ過節有關。小麥是tī五、六月收割，kah五旬節有關。葡萄是tī十月採收，kah Tòa棚節、號角節有關。

路得記 3:1-3:13

註釋:

Chit本經冊真正重要ê人物應該是拿娥美，m̄是路得。因為kui本經冊lóng是teh講拿娥美怎樣替伊ê新婦路得tio̍h想。伊知影tī收割完畢ê季節中，猶太人怎樣舉辦慶祝活動，以及一般人會怎樣過收成節á是Tòa棚節。伊m̄是beh kā新婦留tī身邊，koh khah重要ê是希望伊ê新婦ē-tàng chhōe-tio̍h好ê歸宿，若因為án-ne ē-tàng生gín-á，則以利米勒ê家產就ē-tàng繼續傳承落來，並為夫家以利米勒留落來後代。如果將路得留tī身邊，chit種機會kā永遠得bē-tio̍h。

因為上帝堅守所立ê約，因為án-ne，當拿娥美聽tio̍h新婦路得得tio̍h波阿斯好ê款待ê時，伊第一個反應就是感謝波阿斯，續落來是o-ló上帝講：「願伊得tio̍ h 上主賜福，就是施恩 hō͘ 活人 kah 死人無soah-.ê。(全民版)」（路得記二：20）chit句話真清楚說明上帝堅守tio̍h對祖先所立ê約，祂bē因為人已經往生，就疏忽了往生者ê後代kiáⁿ孫，mā bē因為活teh ê人tú-tio̍h困境，tùi富有變成貧困、一無所有時，就袖手不管。上帝不會án-ne，只要祂講過ê，祂應允過ê，祂一定堅守tio̍h。

路得是一個摩押cha-bó͘-gín-á，卻tī以色列人民ê社區lóng受讚譽，這mā teh表示以色列人民對tī亞捫人kah摩押人ê態度已經有改變。

Chit段經文記載ta-ke拿娥美怎樣教導伊ê新婦路得利用機會kah kah波阿斯做伙過瞑。伊ê chiah-ê策略lóng tī說明拿娥美一切lóng是為新婦路得tio̍h想，卻m̄是自身ê需要，mā講出拿娥美確實是一個有才智ê ta-ke。
Koh講，有關波阿斯kah路得之間ê對話，lóng是kah摩西律法中「至親」應盡ê義務有關（參考申命記廿五：5—10）。Á路得會向波阿斯提起，講伊是伊ê「至親」，這mā是拿娥美教導伊該講。

第1節，其實，當拿娥美決定beh為新婦路得chhōe翁婿ê時chūn，mā teh表示伊對性命重新燃起了希望，因為tī第一章8到13節中，拿娥美表現出來ê是希望ê幻滅，m̄-koh chit-má則希望tī目睭前，這mā說明上帝是一個「信實仁慈」ê上帝，m̄-nā對已經往生ê人仁慈，mā對活teh ê人仁慈信實。續落來tī第二章22節記載拿娥美對路得所講中，就隱藏tio̍h伊已經看重波阿斯。因為án-ne，伊一直teh計畫tio̍h怎樣hō͘波阿斯表態願意娶路得。

第2節，chia講波阿斯會tī禾場上「簸麥á」，chit句話說明chit時真可能是大麥已經收割完畢，準備收藏起來ê時刻。一般來講是Tòa棚節ê時chūn。M̄-koh mā有可能是tī收割完畢，隨時篩麥á。Chit時chūn，主人通常會睏tī麥田裡，一面監督收工，mā一面清點收成，看收成有jōa-chē，並且防範盜賊á是野獸鼠輩偷食。M̄-koh對照第15節來看，應該是收割ê大麥已經曝乾了，thang kā它先簸起來收藏。

第3到4節，chia ê描述lóng kah Tòa棚節ê活動真接近，原因是以色列人民慶祝Tòa棚節ê時，mā同時是青年男女相識、論婚事ê機會。拿娥美ài路得好好á打扮，然後利用波阿斯酒醉了後進入伊ê帳棚，kah伊睡做伙。「伊會kā你講該做甚麼」，chit句話mā teh表示拿娥美對波阿斯真有信心。

第5節，簡單ê一句話，便講出路得就是一個完全順服ê新婦，原因是伊真清楚ta-ke拿娥美lóng是teh為伊設想，這是hō͘伊順服ê主要因素。
第6到9節，波阿斯tī半暝醒起來ê時，看見身邊有一位cha-bó͘-gín-á，就驚kah gāng去地問伊是甚麼人？而路得就照伊ta-ke拿娥美教導伊，hō͘波阿斯知影，伊是伊ê「至親，有義務照顧」伊，並且請波阿斯「娶」伊。

Tio̍h注意，chia ê「娶」一詞，mā thang表示：「請用你ê衣襟遮蓋我」ê意思。這已經真真明顯說明路得ê意思就是：「我是一個被運命棄sak、裸露身軀ê可憐cha-bó͘人，請你娶我，hō͘我bē致使見笑、面臨性命ê危險。」ná親像以西結書第十六章8節所講ê「用外套遮蓋妳ê裸體」仝款，表示對一個hō͘人放sak ê cha-bó͘-gín-á ê憐憫、同情。

第10到13節，chit段經文是chit章經文ê中心，波阿斯肯定路得ê行為，因為路得án-ne做，m̄是為tio̍h家己，卻是為tio̍h已經往生ê丈夫家族，想beh幫助丈夫ê家族財產ē-tàng繼續傳承落去。Koh講，hō͘丈夫家族ê名ē-tàng tī宗族中繼續存在，chit點對以利米勒ê家族來講是非常重要ê。Á波阿斯已經表明伊將為路得chhōe翁婿ê事盡力。波阿斯對路得ê孝心非常感動，因為án-ne，伊除了讓路得知影有人比伊kah以利米勒ê家族koh khah接近至親關係外，m̄-koh伊mā用chiù-chōa表示，一定會盡責任處理伊ê婚事問題。

路得記 3:14-3:18

註釋:

Chit段經文描述波阿斯真體貼路得kah拿娥美，因為án-ne，m̄-nā實踐了至親ê責任，並且一再護tio̍h伊免受傷害。Á路得則tńg去將所發生ê境遇全部hō͘伊ê ta-ke拿娥美知影。

第14到15節，為tio̍h beh保護路得免受傷害，波阿斯利用天iáu未亮，就beh路得趕緊起來，整理好衣物了後，iáu hō͘她大約二十公斤ê大麥，這就夠額路得kah她ê ta-ke拿娥美過一個溫暖而且食飽ê寒天。

第16到17節，路得將所tú-tio̍h ê全部境遇，一五一十kā ta-ke拿娥美講，因為kui個計畫lóng是拿娥美ê，hō͘伊完全清楚，就會知影該怎樣進行。

路得mā講波阿斯ài她「bē-tàng空手」tńg去，chit句話tú好回應了第一章21節，上帝並無真正hō͘拿娥美空手，卻是裝滿所有上帝ê恩典。

第18節，chit節充分說明拿娥美ê智慧kah聰明，伊kā路得講thang「等看chit件事ê發展」，並且真肯定波阿斯一定會kā chit件事「辦妥」chiah會歇睏。Tùi chia mā thang看出拿娥美確實是一個有智慧ê女性。愚笨ê人常常單看外表ê反應，m̄-koh伊是一個有智慧ê ta-ke，ē-tàng根據波阿斯過去到chit-má ê反應，推斷波阿斯會採取「至親」ê動作。

路得記 4:7-4:12

註釋:

Chit段經文是根據申命記第廿五章5到10節律法規定而延伸出來ê風俗，hit位至親放棄購買土地kah娶路得ê權利kah義務，因為án-ne，波阿斯tī所有長老ê見證下，ē-tàng娶路得過門。

第7節，chia講hit-ê時chūn以色列人買賣財產有一種「慣例」，其實是kah申命記第廿五章5到10節ê律法規定有關。

Tī《中文和合本》kah《台語漢字本》聖經lóng有「以前」á是「前」chit-ê字tī chit句話頭前，表示該「慣例」是古老ê事件，m̄是作者寫作ê時代。照申命記第廿五章9節ê記載，路得ē-tàng tī眾長老ê面前thǹg掉chit位無想beh盡責任ê至親ê鞋á，並kā它hiat-ka̍k，然後吐唾沫tī伊ê面上，以表示侮辱chit種親人。M̄-koh問題是chit位至親並m̄是boài盡責任，卻是tī連帶娶「摩押ê寡婦路得」ê chit件事頂面，伊無願意，因為án-ne，是伊主動thǹg掉鞋á表示願意放棄這購買土地ê機會，不反悔。Chit件連帶娶「摩押ê寡婦」一事，可能tī當時社會mā hō͘人認為是一項沉重ê負擔，而無一定需要。因為án-ne，大家是thang接受chit位至親ê反應。

另外一點，chia講ê慣例，是teh指商場買賣ê時，對仝一件財產，若有兩方有仝款要件，就用順位來排序，優先者若表示放棄，chiah需要thǹg掉鞋á當做hō͘渡ê證明。這kah原本申命記強調盡至親之責任問題，已經無仝款。

第8到10節，chit-ê比波阿斯koh khah近親ê親人公開表示beh放棄購買拿娥美丈夫以利米勒留落來ê土地，因為伊無願意為tio̍h買chit片土地而需連帶娶路得過門。因為án-ne，伊表示願意讓hō͘波阿斯去購買，同時娶路得做bó͘。就án-ne，波阿斯達tio̍h願望地得tio̍h娶路得做bó͘ ê機會。伊mā tī he十位長老ê面前表示：願意保留以利米勒留落來ê產業，而且一直用以利米勒家族ê名傳承落去。這表示波阿真有心胸，是真正疼惜路得kah關心拿娥美。

第11到12節，這十位長老聽了後，深受感動，表示願意做證人。而且chiah-ê長老kah眾人lóng祝福波阿斯娶ê路得會「生湠chē-chē」，chit句話表示有上帝賜福ê意思。因為創世記第一章28節講tio̍h上帝賜福人類ê時，就是用「生湠chē-chē，遍滿大地」。

Chia mā特別講出兩件真特ê祝福話語，一是teh指出「像雷潔kah利亞hō͘雅各生真chē子女」，其實，當年雅各因為拉結kah利亞ê緣故有兩個細姨「辟拉」、「悉帕」。這已經teh隱喻路得bat對波阿斯講，她thang做伊ê「女婢」（參考三：9）仝款ê意思。二是「像猶大kah她瑪所生ê kiáⁿ－法勒斯ê厝仝款昌盛」，chit句話真有意思。因為她瑪mā是寡婦，她ê ta-koaⁿ猶大因為無按照律法規定，促成hō͘第三個kiáⁿ示拉娶伊，就án-ne她瑪就打扮成妓女，kah ta-koaⁿ上床而生法勒斯（參考創世記三十八：29）。Koh講，她瑪是「迦南人書亞ê cha-bó͘-kiáⁿ」（參考創世記三十八：2），伊是迦南人，mā是以色列人民所無歡喜ê對象，m̄-koh卻是一個真有才智ê cha-bó͘-gín-á，知影怎樣突破生存環境ê困難。Á路得仝款mā是一個寡婦，伊仝款是tī異邦中求生存。她瑪生法勒斯，而法勒斯又koh是波阿斯ê祖先（參考馬太福音一：3—5，路加福音三：33）。因為án-ne，chiah-ê長老kah民眾就以chiah-ê故事做祝福ê隱喻。

路得記 4:13-4:22

註釋:

Chit段經文是路得記ê結尾，說明波阿斯並無因為娶摩押cha-bó͘-gín-á，伊ê地位就被貶低，mā無因為án-ne就失去上帝ê賜福。伊反而成做以色列民族siōng大榮譽君王大衛ê祖先。

第13節，chit節講出聖經一貫ê思想：性命是tùi上帝來ê賞賜（參考創世記三十：1—2）。路得嫁hō͘基連ê時chūn，iáu未生gín-á，基連就死去。chit-má路得嫁hō͘波阿斯，就tī上帝賜福下有gín-á。

第14到16節，第14到15節chit兩節是伯利恆城裡ê婦女對拿娥美ê o-ló，表示伊雖然喪失了kiáⁿ，m̄-koh摩押cha-bó͘-gín-á路得為伊所做ê，比一般人擁有「七個kiáⁿ」koh khah chē，表示價值koh khah大。拿娥美因為路得生chit-ê孫á，hō͘伊晚年ê性命感受tio̍h性命ê活力。

第18到22節，這是一份族譜。主要teh說明波阿斯kah路得後來成做大衛王ê祖先。Chit份族譜mā thang參考馬太福音第一章5到6節。Mā tùi chit份族譜，hō͘真chē學者認為tio̍h án-ne書寫作ê主要目的，就是beh對tī尼希米、以斯拉時代所在進行ê猶太種族「淨化主義」提出無仝ê聲音，hō͘ hiah-ê一工到晚喊「排外主義」者，有一個重新反省ê機會。