重新查詢  A+放大  A-縮小
經文:

加拉太書 1:1-1:10

註釋:

加拉太書ē-sái講是使徒保羅所寫書信中非常重要ê一本。Tī這本書信中,伊用長到四篇ê篇幅討論有關耶穌ê救恩kah摩西律法之間ê差別。原因是tī加拉太ê教會內,有一陣猶太人基督徒非常堅持外邦人基督徒一定tio̍h先受割禮,chiah ē-tàng成做信仰基督ê團契一員,使徒保羅認為這是非常錯誤 ê信仰認知,甚至伊講這是「另外一種福音」,kah伊教導in ê無相仝。這一陣人有可能kah使徒行傳第十五章1節所提起ê:「有kóa人tùi猶大來到安提阿,開始教導眾信徒講:『除非lín遵照摩西ê律法接受割禮,lín無法度得救。』」是仝一個群人mā無一定。使徒保羅真無客氣地指正in tī信仰上ê 錯誤。

Koh講,加拉太ê教會中,有人為tio̍h beh打擊使徒保羅傳福音,故意講伊m̄是「使徒」。理由真可能kah使徒行傳第一章21到22節彼得定出來ê「使徒」之要件有關。M̄-koh使徒保羅認為「使徒」,並m̄是一種虛榮名號,卻是一種使命,這使命就是beh見證耶穌tī十字架上救贖ê疼。因為án-ne,伊ê每封書信lóng會強調伊就是「使徒」,因為伊hō͘ 上帝呼召,就是為tio̍h beh見證耶穌福音ê信息。

Chit段經文thang分做兩個段落,一是第1到5節,是chit本書信ê序言。二是第6到10節,說明使徒保羅寫chit封書信siōng主要ê原因。原來伊聽tio̍h加拉太地區ê教會有人去傳「另外一種福音」,使徒保羅認為這是非常危險ê事,尤其是chit段經文中,伊一再提起有人tī in中間傳「另外一種福音」,可見情形ê嚴重性。伊甚至認為進入教會傳chit種福音ê人,是應該受詛咒ê。

第1節,使徒保羅一再說明家己就是「使徒」。原因是有想破壞伊建立起來ê教會ê人,lóng是放言說伊無「使徒」ê身分。換句話講,早期教會已經kā「使徒」(意指耶穌ê 11門徒,以及後來補選接替猶大ê馬提亞,共計12位,chit段記事thang參考使徒行傳第一章21到26節)看做是權威、領袖人物。有in ê推薦,chiah算是傳講福音有「憑證」ê人。M̄-koh,使徒保羅則拒絕án-ne以人為權威ê信仰,因為信仰ê中心m̄是tī人,而tī耶穌。伊寫phoe hō͘哥林多教會ê時,就是teh處理chit種因為以人為權威致使ê結黨分派問題。因為án-ne,tī chia,使徒保羅講伊之所以成做「使徒」,「m̄是因為人ê選召,mā m̄是受人ê委派,卻是耶穌kah hit-ê hō͘伊tùi死裡koh活ê父上帝指派ê。」

第2節,chia伊講和伊同齊ê眾信徒寫phoe,m̄-koh並無說明地點tī tó位,甚麼人kah伊做伙。真可能是tī第一pái傳道結束tńg來到安提阿教會ê時,iáu未上耶路撒冷去chìn前,若án-ne,時間mā可能是tī主後48年ê時chūn。Án-ne,kah伊做伙ê人,就是teh指安提阿教會ê一陣同工、幹部、信徒à。

第3到5節,chit段是請安kah祝福ê話。M̄-koh mā講出基督教信仰siōng重要ê話,就是人ē-tàng脫離罪惡ê束縛,是因為耶穌獻上性命所帶來救贖ê恩典,並m̄是人有甚麼能力ē-tàng hō͘家己得救,完全是上帝ê恩典帶來ê結果。

第6到7節,使徒保羅感覺非常驚奇,怎樣會有人kā無正確ê福音信息帶入加拉太ê教會,而且koh有信徒願意聽hit種m̄是福音ê信息。因為án-ne,伊用「真驚奇」來表示伊ê bē了解,而且清楚說明「無另外一種福音」。唯一ê福音,就是耶穌基督。

第8到9節,使徒保羅用真重ê語氣teh強調,無論任何人,若m̄是傳耶穌就是基督,是死tī十字架上ê耶穌之福音信息,chit種人,無論是甚麼人,lóng是該詛咒ê。

第10節,可能是有人批評使徒保羅kā傳統摩西律法ê重要性降低了,因為án-ne認為使徒保羅是為tio̍h「想討人歡喜」、「得tio̍h人ê o-ló」,chiah會有chit種主張。M̄-koh使徒保羅堅決否認chit種講法,伊講伊án-ne做主要ê目的是為tio̍h beh得tio̍h「上帝ê褒獎」。Tī寫hō͘帖撒羅尼迦教會ê信中伊án-ne講:「實際上,上帝看阮會堪得,chiah kā 福音交託阮,阮就照án-ne 來傳。M̄ 是 beh hō͘ 人歡喜,是 beh hō͘ 鑒察咱內心ê 上帝歡喜。因為lín 知,阮lóng m̄ -bat 對lín 講扶挺(phô͘-tháⁿ)ê 話,mā m̄ -bat 有貪心ê 念頭,這上帝ē-tàng 為阮做證。 阮做基督ê 使徒,雖然ē-tàng 要求人尊敬阮, 總是, 阮m̄ -bat對lín á是別人,要求歸榮光hō͘ 阮。(全民版)」(帖撒羅尼迦前書二:4—6)。伊一再強調伊是kā家己性命ê目標khǹg tī tùi天頂來ê獎賞(參考腓立比書三:14),卻m̄是人ê o-ló。因為tùi天頂來ê獎賞是永遠ê,tùi人來ê一切lóng是目nih-á,甚至是虛假ê。


經文:

加拉太書 1:11-1:24

註釋:

使徒保羅Tī chit段經文中,koh一pái teh解釋伊之所以成做「使徒」ê背景,並無tùi任何其他ê人來領受,卻是tùi耶穌直接傳授啟示hō͘伊ê。Á tùi chia開始到第二章10節,是伊tī作自我紹介,說明家己遇tio̍h koh活ê主耶穌了後,怎樣接觸耶路撒冷ê眾使徒,並且提起當時耶路撒冷教會siōng重要ê三個代表者:雅各、彼得、約翰,in lóng支持伊tī外邦人中間所做ê福音ê事工。

第11到12節,因為福音是關係上帝拯救ê信息(參考羅馬書一:16),只有上帝chiah ē-tàng拯救人ê性命免tī死亡,因為án-ne,真正福音就m̄是人ê思想,á是用人ê方式ē-tàng編造出來ê故事,á是tùi任何傳統學習得來。

第13到14節,chit段經文thang參考使徒行傳第八章1到3節、第九章1到2節。使徒保羅並無隱瞞家己過去bat以嚴厲手段teh逼基督徒ê事。

第15到20節,伊kā加拉太ê教會信徒講,早tī伊出世chìn前,上帝就已經呼召伊,揀選伊tio̍h出來傳福音,chit種看法tī先知以賽亞kah耶利米lóng有仝款ê經歷(參考以賽亞書四十九:1,耶利米書一:5)。伊認bat福音,並m̄是tùi別人來學習得到,卻是上帝親自向伊啟示chiah有ê,伊無去chhōe toh位使徒傳授hō͘伊關係福音ê事。第19節chia提起雅各,伊是耶穌ê兄弟,並m̄是使徒雅各。雅各tī耶路撒冷教會真有影響力,連使徒彼得lóng「驚」伊(參考加拉太書二:12)。

第21到24節,照使徒行傳第九章30節ê記載,使徒保羅離開耶路撒冷了後,就家己tńg來大數伊ê故鄉去,而大數就是基利家境內ê一個城。伊開始出來傳福音ê時,tī猶太地區已經有bē少基督徒,而且tùi耶路撒冷mā漸漸分散到省內各地區。Chiah-ê猶太省各教會ê信徒是有「聽見別人講」使徒保羅歸屬耶穌ê事,並且聽講伊「chit-má卻teh傳揚伊過去所beh摧毀ê信仰」,大家lóng認為這是上帝奇妙ê作為chiah有ê改變。

經文:

加拉太書 2:1-2:10

註釋:

Tī chit章經文中,使徒保羅除了繼續說明家己成做福音工作者ê緣由外,mā teh說明無論是外邦人á是猶太人,仝款lóng是領受死tī十字架上ê耶穌所帶來ê救恩,無任何一個人thang例外。

Tī chit段經文中,使徒保羅說明伊怎樣kah同工巴拿巴去耶路撒冷,以及會見了教會領袖,而且說明伊kah巴拿巴負責tī外邦人地區繼續傳福音ê使命,而其他ê使徒則tī猶太人中間工作之經過。

第1到2節,chit兩節經文thang參考使徒行傳第十一章25到30節,使徒保羅kah巴拿巴會去耶路撒冷教會,是為tio̍h beh kā安提阿教會beh賑濟耶路撒冷教會sàn-chhiah ê信徒之奉獻帶去。同時去徵詢耶路撒冷教會ê眾使徒,有關外邦人加入基督信仰團契是m̄是beh受割禮ê事。Tī耶路撒冷教會,伊tú-tio̍h教會領袖,tī第9節有提起in是雅各、彼得,kah約翰等三人。

第3到5節,tī chia伊特別提起「提多」,使徒保羅伊並無替提多行割禮,ē-sái講是就是有kóa「假信徒,偷偷á加入教會」,chiah-ê人想beh強迫伊受割禮,使徒保羅堅持tī割禮ê事頂面,m̄做任何讓步。因為割禮並m̄是福音ê本質。使徒保羅強調「真理」就是tī耶穌身上。因為伊是hō͘所有ê罪人ē-tàng kah上帝重新和好ê唯一媒介。

第6到10節,tī chit段經文中,使徒保羅強調伊tī外邦人中間擔當起傳福音ê工作責任,ná親像彼得tī猶太人中間擔當起福音ê責任仝款。伊án-ne講,mā teh表明tī福音ê事工上,並無分別甚麼人比較重要、甚麼人比較不重要,á是甚麼人大甚麼人小,大家lóng仝款是福音ê使徒。Tī chit段經文中,使徒保羅有三pái提起「有名望ê人(á是領袖、柱子)」之話句,而且開始並無指出名,然後到第9節chiah指出,kah-ná mā teh暗示當時耶路撒冷教會mā有「權威」ê階級á是組織型態出現。M̄-koh伊強調,就算chiah-ê人是有名望ê領袖,mā無hō͘伊任何壓力á是新ê指示。顛倒,in koh khah關心ê是伊tī外邦人地區福音事工ê進展,m̄-nā hō͘鼓勵,iáu真清楚kā福音事工ê區域作了區隔,伊kah巴拿巴去外邦地區傳福音,使徒in留tī耶路撒冷。In只ǹg望使徒保羅kah巴拿巴會記得關心耶路撒冷猶太人信徒中sàn-chhiah ê人ê需要。這mā是後來使徒保羅tī各地傳福音ê時,一再努力四界募款,鼓勵信徒捐款賑濟不餘遺力,可見使徒保羅是一個非常盡責ê人。

經文:

加拉太書 2:11-2:21

註釋:

Tùi chit段經文ē-tàng看出使徒保羅後來漸漸kah耶路撒冷教會疏遠ê原因。根據使徒行傳第十五章ê記載,耶路撒冷ê使徒會議作了重要ê決定,就是外邦人加入教會,除了無需要守割禮外,iáu有下列事項:1.bē-sái食因祭過偶像而無清氣ê食物。2.bē-tàng有淫亂ê行為。3.bē-sái食勒死ê cheng-seⁿ kah血(參考使徒行傳十五:20)。如果koh加上加拉太書第二章10節所提起ê募款賑濟耶路撒冷sàn-chhiah猶太人ê事,án-ne總共是四件。M̄-koh顯然ê,並無解決猶太人基督徒對外邦人基督徒ê排斥。單單同齊食飯ê事,就鬧到真bē爽快à。

使徒保羅真清楚teh表達一個基本信念:一個人是m̄是得救,並不在tī伊是m̄是有遵行摩西律法,而在tī伊是m̄是因信耶穌而kah上帝建立合宜ê關係。Mā tùi chit段經文中thang看出,使徒保羅等於teh告白家己ê信仰轉變之經過,伊是遵循摩西律法ê人,因為明白耶穌tī十字架上死kah koh活ê救恩,hō͘伊成做一個新造ê人。伊認為chit種恩典khah贏過摩西所有ê律法。

第11到14節,chit節提起彼得到安提阿教會訪問,原本iáu kah外邦人信徒同齊食飯,m̄-koh後來看tio̍h雅各派來ê人,就退了出來。M̄-nā án-ne,其他ê猶太人信徒,甚至連使徒保羅ê好同工巴拿巴mā受tio̍h影響,chit點是使徒保羅真無歡喜ê事。因為這mā表示耶路撒冷ê猶太人信徒並無真正hō͘外邦人信徒融入tī仝款ê信仰團契中。M̄-koh mā tùi裡看出,雅各tī當時耶路撒冷教會顯然是siōng有影響力ê人。

第15到16節,使徒保羅強調一個人,無論是猶太人á是外邦人,lóng是因為信耶穌是基督,而kah上帝有和好ê關係,並無óa靠摩西律法ê緣故。因為無任何人ē-tàng óa靠摩西律法來kah上帝有合宜ê關係。

第17到18節,tī chit兩節裡,使徒保羅提了一個基本觀念:若是一個人信了耶穌了後,iáu kah以前仝款,這kah無信是仝款ê。無意義。伊teh強調一個人信了耶穌了後,就應該有新ê性命觀念產生出來。

第19到21節,使徒保羅講伊已經hō͘耶穌盤據tī伊ê性命中,一切lóng是為tio̍h耶穌,kah耶穌親密地連結tī性命中。伊講如果一個人是óa靠摩西律法而kah上帝建立合宜關係,chit種人,根本就無需要耶穌ê救恩。Á耶穌ê死,就是白白ê死,無意義à。

經文:

加拉太書 3:1-3:14

註釋:

加拉太書第三、第四chit兩章,是使徒保羅對基督耶穌信仰內涵ê主要骨幹。使徒保羅kā焦點轉向加拉太ê教會信徒,ài in知影:真確ê信仰應該有ê認知是甚麼。

使徒保羅開始用嚴厲ê語氣指責加拉太教會信徒ê「無知」,指in竟然bē記得家己得tio̍h福音是因為聖神tī眾使徒身上作工,並m̄是來自遵守摩西律法。因為就是摩西律法kā耶穌釘死tī十字架上ê,而聖神感動門徒,充滿in ê心,大大地tī門徒身上做工,而且hō͘ in有能力tùi講各種方言開始(參考使徒行傳二:1—39),chiah有福音往外傳播ê結果出來。使徒保羅kah巴拿巴就是tī聖神充滿之下,chiah有能力kā福音傳向外邦人地區。Chia使徒保羅用猶太人ê祖先亞伯拉罕作例,說明亞伯拉罕ê時代根本就無摩西律法,m̄-koh,伊卻是上帝認定tio̍h義人ê人(參考創世記十五:6)。M̄-nā án-ne,上帝iáu允准亞伯拉罕,beh賜福hō͘伊kah伊ê後代,這並m̄是因為亞伯拉罕有甚麼好行為,chiah得tio̍h上帝ê賞賜,只因為伊相信上帝,就是án-ne簡單。Chit種hō͘ 上帝稱做「義人」ê,是出tī上帝ê恩典,並m̄是因為人有甚麼夠好ê條件,根本無算是所講ê遵行律法行為。

第1到5節,tī chit段經文中,使徒保羅開始反問加拉太地區ê信徒,in是怎樣得tio̍h認bat耶穌ê救恩ê?絕對m̄是因為摩西律法,卻是因為上帝ê聖神chiah有ê,in mā因為領受聖神ê氣力,chiah有神跡出現tī in中間。使徒保羅希望喚醒in注意當初信耶穌ê時ê經歷。

第6到9節,tī chia,使徒保羅強調猶太人祖先亞伯拉罕成做上帝眼中ê義人(參考創世記十五:6),hit時,伊iáu未受割禮,這割禮是後來chiah有ê。割禮,是beh表明in kah上帝建立特殊關係。因為án-ne,猶太人kah上帝有特別關係,並m̄是在tī割禮,而是beh像亞伯拉罕仝款,順服上帝ê旨意chiah是重要。伊特別用一個關鍵話句:「有信ê人就是亞伯拉罕ê真kiáⁿ孫。」這已經phah破了tùi血緣來看信仰ê問題。Chit種信,就是beh建立tī信耶穌ê救恩上。 

第10到12節,chit節使徒保羅用真嚴重ê話譴責hiah-ê iáu堅持一定tio̍h「遵守律法為憑藉ê人」,講in「lóng是活tī詛咒之下」,意思是chiah-ê人都無珍惜耶穌ê救恩,甚至有鄙視(siùⁿ)耶穌救恩ê態度。伊ê觀點是:如果人ē-tàng藉tio̍h實踐律法而kah上帝有合宜關係,上帝就bē差派耶穌降生到世界上,並且tī十字架上犧牲家己ê性命。使徒保羅引用哈巴谷書第二章4節ê經文,強調tio̍h對上帝絕對ê忠心,只有án-ne chiah ē-tàng得救,絕對m̄是因為守摩西律法ê緣故。伊提供一個基本觀念:律法並無仁慈、憐憫、恩惠,只有嚴格規定一定tio̍h遵守,m̄-koh卻無法度感動人心,既無法度感動人ê心靈,就bē改變人ê心歸向上帝ê救恩。

第13到14節,伊強調耶穌已經承擔了人ê罪所帶來ê詛咒,thang hō͘人脫離律法所講ê罪ê束縛、鎖枷。耶穌án-ne做,絕對m̄是只為tio̍h猶太人,卻是包括外邦人,也ē-tàng領受上帝賞賜hō͘亞伯拉罕ê福氣。

經文:

加拉太書 3:15-3:20

註釋:

Tùi第15節開始到第五章12節,使徒保羅Tī chit段經文中,kā律法kah上帝tī耶穌裡ê救恩,兩個之間ê差別作了明顯ê譬喻kah說明。使徒保羅真用心向加拉太教會ê信徒解釋真正福音是tī耶穌ê救恩,m̄是tī摩西ê律法。伊mā用真嚴厲ê語氣譴責hi̍t 所在區ê信徒ná會是hiah-ni̍h「輕易」就相信猶太人所堅持摩西律法ē-tàng帶來得救之道?這mā是hō͘伊既艱苦心koh受氣ê原因。

第15到18節,使徒保羅引用契約來說明,上帝kah亞伯拉罕立約,其實hit-ê約是teh表明上帝ê應允,而且上帝一直堅持守tiâu hit-ê約。Tī上帝kah亞伯拉罕立約ê時,並無摩西律法出現,有chit-ê律法是出埃及了後發生ê。因為án-ne,亞伯拉罕hō͘ 上帝看做義人,並m̄是因為伊有遵守甚麼律法,完全是上帝恩典。因為伊聽從上帝ê旨意。

第19到20節,tī chia使徒保羅說明律法ê功用,就是hō͘人知影家己犯甚麼罪。伊特別說明律法需要有人來宣告,m̄-koh救恩tùi上帝直接臨到人ê性命裡。

經文:

加拉太書 3:21-3:29

註釋:

Chit段經文thang看出使徒保羅siōng大ê努力,就是beh kā猶太人kah外邦人之間ê藩籬phah破,所以伊講「屬基督ê」,就是「Lín 既然屬基督,就是亞伯拉罕ê kiáⁿ 孫,就ē-tàng承受上帝對亞伯拉罕ê 應允(全民版)」(第29節)。基本上,tī使徒保羅ê思想裡:無論是toh一種人,只要是tī基督耶穌內面,就是新造ê人,一切lóng是重新koh來(參考哥林多後書五:17)。Tī耶穌裡,人bē koh再去強調伊是屬tī tó一個族群kiáⁿ孫,á是有甚麼祖先kah上帝有特殊關係,所有ê關係重點lóng tī耶穌,大家就是kah耶穌結合而連結做伙ê。

第21到22節,使徒保羅並無否認律法mā是tùi上帝來ê。M̄-koh伊講上帝頒佈律法誡命hō͘以色列人民,mā是beh hō͘ in ē-tàng存活落去,因為án-ne chiah會有chit句遵守上帝ê一切命令,就ē-tàng存活,事事順利ê話出現(參考申命記五:32-33)。M̄-koh重要ê是使徒保羅tī chia用了chit-ê「如果」一詞,tú好講出事實上人卻是真正無法度完全遵守上帝所頒佈ê一切律法誡命,chit點chiah是真正ê問題所在。若無,就bē有耶穌降生而且被釘死tī十字架上ê救贖工作。

第23到25節,使徒保羅回答了有人án-ne問:若是tī無耶穌chìn前,以色列人民豈無lóng是無法度得救?使徒保羅強調tī耶穌降生chìn前,就是用摩西律法來暫時「看守」tio̍h人kah上帝之間維護和好ê關係,chit-má耶穌既然已經來臨,就應該tńg來到耶穌ê身上,卻m̄是繼續用摩西律法。因為án-ne,信耶穌,chiah是性命ê根本。

第26到29節,tī chit段經文中,使徒保羅一再用「成做一體」chit-ê觀念,說明每一個信耶穌ê人,就是kah耶穌成做一體,而所有信耶穌ê人,彼此之間成做一體,phah破了人kah人之間ê隔閡,包括社會階級、血緣、性別等等。


經文:

加拉太書 4:1-4:7

註釋:

加拉太書第四章是繼續第三章ê主題,使徒保羅真清楚說明為甚麼耶穌ê救恩,khah贏過久長以來猶太人引認為憑ê摩西律法當做得救根據。

Chit段經文是繼續前段有關摩西律法kah信耶穌之間ê關係。
第1到5節,使徒保羅提起猶太人律法是規定13歲以上chiah算成人,開始負擔聖殿ê納稅kah維護聖潔ê義務。M̄-koh卻tio̍h等到20歲chiah ē-tàng登入戶嘴中(參考出埃及記三十八:26,民數記一:3、18)。因為án-ne,tī chit chìn前lóng有人來替chit-ê gín-á承擔管理ê責任。等到長大ê時,伊就beh家己負擔。使徒保羅用chit種方式teh說明一件事:信仰beh成長,m̄-thang總是tī摩西律法上phah轉,án-ne會ná親像bē大漢ê gín-á仝款。使徒保羅用「星宿之靈」chit-ê詞句,說明猶太人tī宗教禮儀上已經到à僵化ê程度,in kā摩西律法看做是對人性命拯救ê法寶。其實,chiah-ê律法ná親像天頂ê星宿仝款,有一定ê規律,chiah-ê規律說明上帝創造ê精細,m̄-koh,kah人是m̄是ē-tàng得救並無關係。因為án-ne,使徒保羅認為tī信仰上成熟ê人,bē koh再以宗教禮儀、規律等作為得tio̍h拯救ê根據,卻是會明白耶穌chiah是性命ê救贖主。

第6到7節,使徒保羅tī chia所謂「kiáⁿ ê靈」,是teh指「基督ê靈」,就是「聖神」,這是上帝tī人性命中做工ê氣力。做一個人心中有上帝ê靈進入,就會親像kiáⁿ仝款稱呼上帝就是伊ê「阿爸!我ê老父!」這就等於是上帝「親生ê kiáⁿ」仝款,kah上帝有「父子」關係。Chit種講法,已經脫離了tùi摩西律法規定中所提起ê「割禮」記號關係,mā突破了tùi亞伯拉罕被揀選而來ê傳承,無koh是只有猶太人才是亞伯拉罕ê kiáⁿ孫,卻是任何一位以耶穌為救主ê人,lóng是亞伯拉罕ê「真kiáⁿ孫」(參考加拉太書三:7)。

經文:

加拉太書 4:8-4:20

註釋:

Tī chit段經文中,使徒保羅用真誠懇ê語句,呼籲加拉太地區ê信徒一定會聽從伊ê勸導,m̄-thang koh一pái陷入hit種錯誤 ê信仰認知。

第8到11節,加拉太地區教會ê信徒「過去」並「m̄-bat上帝,被hiah-ê m̄是神ê神明所奴役」,m̄-koh「chit-má認bat上帝」後,就不應該koh再tńg去「chhōe hiah-ê無能無用ê星宿之靈」。使徒保羅表示真擔憂加拉太ê教會信徒iáu死守tio̍h未信主chìn前ê一kóa觀念,包括有:
「日子」,這是teh指猶太人宗教節日,親像:安息日、禁食日等。
「月份」,指「新月」,意思是每月初一、十五ê祭祀活動。
「節期」,包括Pôaⁿ過節、五旬節、Tòa棚節等等。
「年份」,這是teh指七年一pái ê安息年,以及七七四十九ê五十「禧年」等。

伊並m̄是講chiah-ê節期不重要,卻是講若認為堅守chiah-ê節期而得救,kan-taⁿ會hō͘ in已經領受ê福音信息落空而已,因為真正hō͘人得救ê,並m̄是chiah-ê。

第12到16節,使徒保羅懇切地地ǹg望,加拉太ê教會信徒會聽伊ê勸勉。伊tī chia提起家己身軀有病,m̄-koh並無說明是甚麼病。對照第15節來看,使徒保羅kah-ná有目睭方面ê疾病。因為tī第六章11節特別伊寫chit封書信ê字,是「大ê字」,表示伊有眼疾所以tio̍h大ê字chiah ē-tàng看清楚。甚至in中間iáu有人bat想kā家己ê目睭換hō͘使徒保羅。M̄-koh mā有chit種講法:使徒保羅醫了別人ê病,á伊為甚麼無法度先醫好家己ê病?chit種傳言tī加拉太教會中流傳tio̍h,對hiah-ê信心軟弱ê人確實造成影響。Mā可能hiah-ê傳「另外一種福音」ê人,藉chit-ê理由講伊是hō͘上帝懲罰,因為伊無教導加拉太地區教會信徒遵守摩西ê律法ê緣故。M̄-koh過去ê加拉太信徒並無受tio̍h影響,卻是接納使徒保羅tī in中間傳福音。chit-má kah-ná一切改變à,伊講出實話,有人因為án-ne beh kah伊做對,chit點hō͘使徒保羅感覺哀傷。

第17到20節,使徒保羅指出hiah-ê傳講「另外一種福音」ê人,其實是teh欺騙in,kan-taⁿ想beh孤立使徒保羅而已。伊講家己ê心情ná親像老母面對有娠生產ê時ê痛苦一般teh看待加拉太教會,為tio̍h是beh希望in ē-tàng成長茁壯。M̄-koh看tio̍h in目前受tio̍h「另外一種福音」影響,伊非常擔憂。

經文:

加拉太書 4:21-5:1

註釋:

Chit段經文內底,使徒保羅koh一pái引用亞伯拉罕ê例說明tī基督裡,成做一個「自由人」ê真意。Chit種「自由」m̄是tùi摩西律法傳承「割禮」ê約束。伊kā亞伯拉罕kah莎拉、夏甲之間ê關係,譬喻成兩種「約」ê關係,伊kā夏甲譬喻成tī曠野ê約束,而kah莎拉之間ê關係,譬喻成是完全tùi上帝來ê恩典。上帝ê恩典乃是hō͘人得自由ê氣力,m̄是hō͘人成做被束縛者、成做奴隸。伊強調一個siōng基本ê觀念:tī耶穌裡,是自由ê人,性命是得tio̍h釋放ê。

第21到22節,使徒保羅舉出亞伯拉罕ê兩個kiáⁿ,一個是tùi女婢夏甲生ê,就是用實瑪利。另外一個是tùi莎拉(伊講是「自由ê cha-bó͘-gín-á」)生ê,就是用撒。

第23到26節,夏甲生以實瑪利,是因為kah亞伯拉罕同房而有娠生落來ê。M̄-koh莎拉則完全是上帝應允而得tio̍h ê。因為hit時莎拉已經九十歲。Beh自然生落來是絕對無可能ê事。使徒保羅用chit種譬喻方式,kā莎拉kah夏甲譬喻做「兩種約」。其實,tī以色列人民kah上帝之間並無「兩種」約,唯一ê「約」是上帝kah以色列人民之間ê關係:以色列人民是上帝ê子民,耶和華是以色列人民ê上帝。換言之,以色列人民kah上帝之間唯一ê「約」,就是以色列人民尊崇耶和華上帝是獨一ê上帝。除了耶和華上帝以外,無別ê上帝。「夏甲,伊來自西奈山,所生ê lóng是奴隸」,chit句話是teh指摩西tī西奈山上領受上帝ê律法。M̄-koh chiah-ê律法後來演變成束縛人ê規條,人成做律法ê奴隸。使徒保羅提醒加拉太ê信徒tio̍h注意,m̄-thang總是kā耶路撒冷掛tī嘴中,若是無真實ê心,就無真正自由。人會利用堂皇ê建築來驕傲,卻bē記得上帝chiah是性命ê óa靠。

第27節,chit節是引用以賽亞書第五十四章1節先知ê預言,主要teh說明被俘虜到巴比倫做奴隸ê以色列人民,會得救、被釋放。當in得tio̍h釋放ê時,ná親像一個cha-bó͘人生產仝款,經歷痛苦生gín-á ê時,hit種歡喜m̄是人ê言語所ē-tàng描述,mā m̄是無產痛經驗ê人所ē-tàng明白ê。伊講,一個經驗過耶穌救恩ê人ê性命感覺就是án-ne。伊ê性命力是豐富ê,遠khah贏過所有一切律法、風俗。

第28到30節,使徒保羅引用創世記第廿一章9到10節經文ê背景,koh一pái譬喻猶太教徒kah基督徒之間ê差別;chit種差別在tī:一是用摩西律法為救恩記號ê猶太人,一是因為上帝特別恩典而得救贖ê基督徒。雖然前者「迫害」後者,m̄-koh tī最後,迫害者反而成做失落者,因為in得bē-tio̍h in原本應該得tio̍h ê福份,就kah-ná以實瑪利kah夏甲被趕出家門仝款。

第31節,是kui個論述ê結語,使徒保羅講基督徒「是自由ê cha-bó͘-gín-á所生ê」,意思是teh指上帝借耶穌救贖出來ê,是上帝特別ê恩典。

使徒保羅特別針對割禮ê問題提出嚴肅、而且一屑á都無讓步ê反駁。伊認為家己是真有資格批判chiah-ê強調割禮ê人,因為伊家己就是猶太人,屬tī「便雅憫支族」ê kiáⁿ孫(參考羅馬書十一:1),伊mā「比別人koh khah積極遵行猶太教規,koh khah熱心遵奉祖宗ê傳統教示」(參考加拉太書一:14),bat「受過祖先一切律法ê嚴格訓練,熱心事奉上帝」,是猶太人出名經學教師迦瑪列ê學生(參考使徒行傳廿二:3),後來因為tī大馬士革遇tio̍h koh活主耶穌,chiah頓悟過去嚴格遵行摩西律法,並認為只有án-ne chiah ē-tàng得tio̍h永恆性命ê認知是極大ê 錯誤,因為án-ne,伊改變,並進一步koh積極轉向見證耶穌koh活ê信息。以伊chit種背景kah條件來批判摩西律法ê問題,是非常有份量,mā夠條件ê。為tio̍h án-ne,tùi第五章2節開始,伊無koh解釋上帝tī耶穌裡救恩比摩西律法koh khah重要,卻是直接批判遵守摩西律法ê問題。

Chit節mā是繼續前段論述ê結語之一。做一個基督ê信徒,是已經被釋放ê自由人,應該勇敢地扛起胸膛,m̄-thang有自卑kah驚見笑ê念頭。

經文:

加拉太書 5:2-5:15

註釋:

整段經文ê重點tī對割禮kah得救ê問題畫出一條清楚界線:受割禮á是無受割禮,m̄是性命中siōng重要ê事,siōng重要ê是beh表現出有實際愛人ê行動之信心。雖然加拉太ê教會內有偏離信仰ê認知,m̄-koh使徒保羅iáu是對in有充分ê信心,伊mā希望hi̍t 所在區ê信徒ē-tàng重新拾回信心,用信心彼此相疼,互相勉勵。

第2到4節,使徒保羅koh一pái強調,若是信耶穌了後,iáu去受割禮,就表示對耶穌拯救ê恩典ê信心不足,另外一方面,既然beh受割禮,因為割禮是tùi摩西律法來,án-ne就tio̍h遵守全部律法chiah正確,無法度只遵守割禮,卻忽略其他ê律法。

第5到6節,chit兩節是真重要ê經文,使徒保羅真清楚表明:有無割禮,已經m̄是重要ê事,siōng重要ê,就是beh kā上帝tī耶穌裡拯救ê疼付諸實際行動。

第7到10節,使徒保羅當然知影tī加拉太ê教會內面,有人teh誘惑信徒tńg去遵守摩西律法,使徒保羅講chit種人ná親像pháiⁿ掉ê酵母仝款,會敗壞kui個教會。伊深信chit種人必定會受tio̍h上帝懲罰。

第11到12節,使徒保羅對hiah-ê一再強調守割禮非常重要ê人,提出非常無客氣ê譴責,伊ài chit種人kui氣就kā家己閹割to̍h好。伊講chit句話有當時ê背景,是因為當時ê加拉太地區民間宗教信仰siōng大ê神明是「錫伯利」(Cybele)。Tī「錫伯利」神廟裡ê祭司lóng一定tio̍h閹割。因為án-ne,使徒保羅借用chit-ê背景講hiah-ê口口聲聲teh主張割禮ê人,如成(chiâⁿ)實hiah-ni̍h重視割禮ê重要,thài會無ài乾脆家己先閹割掉會koh khah「潔淨」。Ē-sái講是,chit句話有另外一個意思,就是猶太人如果生殖器被閹割掉,就無法度參加「上主ê聚會」(參考申命記廿三:1)。因為án-ne,chit句話mā有另外一面ê意思,是teh指一再ài外邦人受割禮ê人,就是teh引chhōa人棄sak上帝ê道路。

第13到15節,使徒保羅kā信仰ê內涵真清楚點出來,就是疼。其實這mā是耶穌ê教示。第13節ê「互相服事」,指ê是「彼此成做對方ê奴僕」ê意思。人除了tio̍h疼上帝,iáu beh kā對上帝ê疼表現tī人類社會生活ê層面裡,就是beh「愛人如己」。耶穌就是上帝愛人類ê終極表現,chit點就是使徒保羅所beh見證ê。伊勸勉加拉太教會ê信徒,應該tī教會團契生活中,彼此學習「互相服事」,來表現愛ê真諦。伊提醒加拉太ê信徒,若是彼此相爭、hō͘咬,結果lóng會滅亡。

經文:

加拉太書 5:16-5:26

註釋:

Tī chit段經文中,使徒保羅續接第13節所提起ê放縱情慾,以及kah聖神之間ê差別做明顯ê對照。Thang kā chit段經文比對伊寫hō͘羅馬教會ê書信第八章1到17節,就會明白使徒保羅所講ê「聖神」kah「人ê本性」之間ê差別。

第16到18節,使徒保羅提醒加拉太ê信徒,一定會順服聖神ê引chhōa,別hō͘私慾hō͘迷惑。只要有聖神引chhōa,就bē陷入誘惑中而無法度自拔。

第19到21節,tī chit段經文中,使徒保羅舉出人ê本性之慾望有下列chiah-ê現象:淫亂、穢行、邪蕩、偶像崇拜、巫術、仇恨、爭鬥、忌恨、惱怒、好爭、分派、結黨、嫉妒、酗酒、狂歡宴樂,以及其他類似ê事。伊講有chiah-ê問題ê行踏,lóng bē成做「上帝國度ê子民」。

Tī「本性」ê前三項,mā就是淫亂、穢行、邪蕩等,指ê lóng是倫理道德ê生活層面。Á拜偶像、巫術等兩項,指ê是無正確ê信仰行為。Chit點tī哥林多教會siōng-kài嚴重。

仇恨、爭鬥、忌恨、惱怒、好爭、分派、結黨、嫉妒等八項,是teh指一個人ê社會生活行為,chiah-ê lóng kah疼心ê表現背道而馳。Chia ê「仇恨」,是複數名詞,意思是m̄-nā對個人有仇恨,mā是teh指團體性ê仇恨,比如種族之間ê對立。這對當時ê猶太人kah外邦人之間ê隔閡有特別明顯ê啟示作用,因為猶太人對伊族人常懷有藐視、敵視ê態度。

酗酒、狂歡宴樂,這兩項lóng kah lim食行為有關,kah聖神所結ê果子──節制──相違背。知影節制,需要信仰ê氣力來支撐,因為人本性上ê軟弱ê時常ē-sái人陷入「貪婪」ê意念裡,而lim食、酗酒只是「貪」ê具體表現,其它包括意念上ê,特別是tī酒狂、狂歡宴樂,lóng需要大筆ê金錢,人往往teh貪取koh khah chē錢財了後,就tī lim食頂面具體表現出浪費ê行踏。

第22到23節,若是tī「聖神」引chhōa之下,人chiah ē-tàng結出聖神ê果子,有:博愛、喜樂、和平、忍耐、仁慈、良善、忠實、溫柔、節制等共九項。Chia所指ê「博愛」,是用「agape」,意思是「永bē改變ê疼」,á是講「無法度比較ê疼」,mā是teh指「無私ê疼」,是只有付出,而不求回報ê疼。明明知影會有性命ê危險,iáu是勇往直前。

第24到25節,chit兩節是chit段經文ê中心,使徒保羅勸勉加拉太ê信徒,ài kā hit-ê會致使人死亡ê「本性」lóng kah耶穌同齊釘tī十字架上,hō͘伊死亡。Án-ne chiah ē-tàng hō͘人tī聖神ê帶領下,過新ê屬靈生活。伊koh一pái勸勉in,m̄-thang驕傲、彼此激怒、嫉妒等,這mā是teh kā in講,ài有寬闊ê心胸,kah謙卑ê心靈。

經文:

加拉太書 6:1-6:10

註釋:

Tī chit章經文內底,使徒保羅無koh為割禮kah耶穌tī十字架上ê救恩之間ê差別作辯護,卻是kā信仰帶入生活中來討論。這mā是伊ê書信ê特色,就是tī結尾lóng會講起信仰kah生活ê連結。Tī這章中,伊認為一個真基督徒無應該koh再停留tī表面上ê記號,而是beh活出信仰ê果子來為福音做見證,chit點chiah是重要。伊用信仰結出果子ê人kah tùi放縱情慾所結出果子ê人,二者之間ê差別做個說明。

Chit本加拉太書信有一個重要ê信息,就是勸勉大家tī共同信仰ê團契裡,tio̍h成做「彼此」ê共同體。當有一個人犯錯,tio̍h認為「彼此」lóng有責任。當有人犯錯ê時chūn,不是beh抱持「幸災樂禍」ê態度,卻是先省察家己是m̄是mā犯仝款ê 錯誤。

第1到5節,所謂「偶然犯過錯」,指「m̄是故意」所做ê 錯誤。「糾正」,是teh指「補網」、「接骨」ê意思。就kah-ná一個人tī無注意ê情況下,摔斷了「骨頭」,大家tio̍h幫助chit-ê人,kā摔斷ê骨頭接合起來。因為án-ne,chia ê「糾正」,mā有彌補、癒合ê意思。Mā如仝一個討海人teh修補已經破損ê漁網一般。M̄是棄之無ài,卻是修補,是細膩、疼心ê修補。所以使徒保羅講beh用「溫和ê方法」糾正。伊強調一個信仰團契裡,siōng重要ê,就是「彼此分擔重擔」,這mā是耶穌教導中ê「彼此相疼」ê意思。有好ê行為ê時,m̄是用來kah別人比較,因為上帝清楚人ê心思意念。第5節ê「每一個應該擔起家己ê擔子」,chit句話真清楚teh說明m̄-thang推辭責任。

第6節,chit節是非常重要ê信仰觀念「分享」,這mā是基督教信仰siōng中心ê信息。上帝kā祂siōng美好ê禮物──獨生kiáⁿ耶穌──kah有罪ê人類分享。基督信徒就應該tio̍h學習kā siōng好ê禮物帶來kah每一個人分享。

第7到8節,有真實信仰ê人lóng會清楚知影,上帝是欺騙bē-tàng ê。因為上帝鑒察人ê心內。會欺騙ê人,無論是欺騙人á是欺騙上帝,lóng是teh kā眾人講,家己並m̄相信上帝。會欺騙人ê人,結局mā會hō͘人欺騙。因為án-ne,一個人掖種ê是甚麼,就會收tio̍h甚麼果子,這是一點mā虛假bē-tàng。「一個人種甚麼,就收甚麼」,這是當時一句流傳甚廣ê諺語。Chia ê「種」,是teh指掖種。是teh指tī信仰ê態度上。正確ê信仰,對性命ê意義極大。

第9到10節,「行善」,這m̄-nā是teh指財物上ê施捨,koh khah是指傳福音ê事工。使徒保羅勸勉加拉太ê信徒,m̄-thang tī傳福音ê事工上,被邪惡ê勢力hō͘贏過,ài有信心等待。真實ê福音事工,一定會得tio̍h上帝ê賜福。Chia ê「時chūn到à」,指ê是臨終ê意思。Mā thang指終末審判、上帝獎賞ê時刻來臨ê時。因為án-ne,當人iáu活teh ê時chūn,m̄-thang停止傳福音ê工作,無論是m̄是隨時有成果出現,siōng重要ê是tī福音事工上把握機會,因為m̄知甚麼時chūn,上帝會呼召咱tńg來天家。對同屬信仰ê對象,lóng tio̍h看做是家己厝人仝款,hō͘ in接納和好款待。

經文:

加拉太書 6:11-6:18

註釋:

使徒保羅ê書信差不多lóng是伊口述,由別人代筆(參考羅馬書十六:22)。Chit本書信mā不例外,tùi第一章1節開始到第六章10節止,lóng是使徒保羅口授,別人代筆寫ê,m̄-koh tùi chit章第11節開始到路尾,使徒保羅kah-ná有意iáu未盡ê感覺,想beh koh再補充一kóa話,mā thang看出伊心中對加拉太教會因為聽從另外一種福音ê操心。

Tī chit段經文中,使徒保羅koh一pái kā伊寫chit封信ê主要目的,giú tńg來到伊chit封書信siōng重要ê主題:是m̄是守割禮,kah得救無關。一個人是m̄是得救,siōng重要ê是tī耶穌十字架頂救贖ê恩典。

第11節,伊講chit段經文是伊親自寫「大ê字」,真可能kah第四章14到16節所提起ê目睭疾病有關。

第12到13節,當時有人驚為十字架tú-tio̍h迫害,原因是當時羅馬政府看信耶穌是一種新ê宗教,而tī羅馬帝國統治下,只有猶太教是ē-tàng允准ê合法宗教信仰。因為án-ne,展寶家己有割禮,表示家己並m̄是屬tī基督信徒,án-ne就ē-tàng免除被迫害ê危險。M̄-koh信仰若是驚苦難,chit種信仰態度不值得學習。Á若是連割禮lóng thang用來誇耀,這就是teh曲解割禮ê意義。

第14節,一個真正耶穌信徒,不會曉誇耀別ê,卻是只會曉誇耀耶穌ê十字架。請注意,耶穌ê十字架所代表ê乃是「苦難kah救贖」。雖然因為堅持信靠耶穌有苦難,m̄-koh卻對性命ê得救深存ǹg望。這mā是使徒保羅講家己是身上「帶耶穌ê傷痕」ê原因,是teh指為tio̍h耶穌ê緣故,伊寧可接受迫害,mā無妥當協,因為伊對得救懷有無變ê ǹg望。

第15節:chit句:「受割禮á是無受割禮lóng無算甚麼;重要ê是咱tio̍h成做新造ê人。」ē-sái講是chit-ê書信ê中心經文。

第16節,chia講「願所有遵照這原則ê人」,就是teh指接受耶穌為救主ê人。Á「一切上帝ê子民」,是teh指所有信耶穌就是基督ê人(參考加拉太書三:26、28),無種族、膚色ê分別,只要是信耶穌ê人lóng是。「平安」,這是teh指心靈ê安定,無koh有驚惶侵入心中。「憐憫」,這是teh指上帝ê仁慈kah無變ê疼。

第17節,使徒保羅希望以後bē koh再聽tio̍h加拉太教會有chit種聽信另外一種福音ê tāi-chì發生,因為chit款tāi-chì kan-taⁿ會hō͘伊帶來「麻煩」。Chia ê「傷痕」,mā thang當做印記解釋。古早時ê奴隸,身上lóng有主人用燒紅ê鐵塊所烙下ê記號,來預防止奴隸逃走。因為án-ne,使徒保羅講伊「身上帶基督ê傷痕」,chit-ê意思真明顯,是beh hō͘加拉太ê信徒知影,伊頭前所勸勉in ê話,並m̄是出tī權威,á是伊有甚麼特殊地位,卻是tī耶穌ê十字架裡,伊ná親像一個奴隸般,是耶穌救恩下ê奴隸,伊ê工作就是為耶穌ê救恩做見證。

第18節,這是祝福ê話。Mā是使徒保羅ê書信ê特色。

重新查詢