歌羅西書 1:1-1:14

註釋:

Ná親像頭前提起有關使徒保羅寫書信ê模式，是照當時羅馬時代書寫ê方式，有請安，mā有鼓勵。M̄-koh仝款ê，伊寫書信hō͘教會，差不多lóng是teh處理教會內部發生ê信仰問題，以及信徒tī生活上有違背信仰ê行為出現。Chit章伊就提起tī耶穌基督ê身上thang看見上帝創造ê奧秘，是因為有耶穌基督，kui個受造ê宇宙chiah會得thang kah上帝和好。伊mā同時表白獻身傳福音ê使命感，會盡所ē-tàng地kā福音傳揚出去。

Chit段經文使徒保羅肯定歌羅西教會信徒tī信心kah疼心ê表現，m̄-koh mā憂心in tī信仰ê認知上iáu無夠成熟而受tio̍h別人進入教會傳達錯誤信仰ê影響。

第1到2節，ná親像寫hō͘腓立比教會ê書信仝款，chit封書信mā是使徒保羅kah祂ê門徒提摩太共同具名寫ê，仝款ê，使徒保羅lóng是先自我堅定ê講是「耶穌基督ê使徒」。

第3到4節，tùi第3節開始，直到第二章5節，使徒保羅teh討論歌羅西教會ê信仰認知ê tāi-chì。Tī chit兩節中，使徒保羅講伊真感謝上帝，因為有聽見該教會信徒對耶穌基督有堅定ê信心，因為án-ne，表現出彼此之間有疼心，án-ne，thang看出歌羅西教會信徒已經表現出兩項珍貴ê信仰態度：信心kah疼心。這一直是使徒保羅teh建構一間教會信仰團契siōng-kài重視ê事。

第5到8節，tī chit段經文中，使徒保羅對歌羅西教會ê o-ló，是因為該教會對耶穌基督有信心，對人有疼心，以及對性命存 ǹg望。這to̍h是伊tī哥林多前書第十三章13節所講「信心、疼心、ǹg望」等三項是永存ê。Á這三項歌羅西教會lóng有具備，而且tī第7節特別提起歌羅西教會是tùi「以巴弗」得tio̍h福音ê信息，án-ne就ē-tàng知影以巴弗極可能就是歌羅西教會ê開拓者。Koh再tùi第四章12到13節ê資料來看，以巴弗mā是老底嘉kah希拉坡里教會ê福音掖種者。伊後來kah使徒保羅同工，並被使徒保羅認定是真好ê同工，in兩人tī福音ê事工上ē-sái講是形影不離。然後tùi第8節thang知影使徒保羅會án-ne寫這封phoe hō͘歌羅西教會，是因為以巴弗帶去歌羅西教會ê問題，kā歌羅西教會所發生ê事kā伊講。

第9到14節，tī chit段經文內底thang看tio̍h使徒保羅肯定歌羅西教會ê信徒tī信仰上確實是真有見證，而且有進步，為tio̍h án-ne事，使徒保羅獻上感謝。Koh khah重要ê，使徒保羅肯定該教會信徒tī信仰生活上有美好ê見證。第12到13節中特別提起「光明」kah「烏暗」ê區別，就是tī上帝救贖ê恩典分別出來。這救贖ê恩典就tī耶穌基督內面面，而且因為耶穌基督救贖ê恩典而hō͘性命得tio̍h自由。

歌羅西書 1:15-1:29

註釋:

Tī chit段經文中，使徒保羅講tio̍h教會ê頭，就是耶穌基督。每一個信耶穌基督ê人，lóng會因為為kah chit位教會ê頭連結而改變性命。M̄-koh chit種性命會隨時受tio̍h誘惑。因為án-ne，伊勸勉歌羅西教會ê信徒， tio̍h堅持所領受基督耶穌拯救ê信息。

第15到20節，tī chit段經文中，使徒保羅開始就提起耶穌基督是「hit-ê看bē-tio̍h ê上帝ê形像」。聖經作者一再強調以人ê條件是無法度看見上帝ê（參考創世記十六：13、三十二：30，出埃及記三十三：20）。「形像」teh代表上帝，而耶穌基督teh代表上帝ê形像（參考哥林多後書四：4）。Tī chia，使徒保羅特別強調講，上帝創造天地萬有，lóng是kah耶穌基督有密切關係。換句話講，kui個創造ê終極目標，就是為顯明上帝ê疼。Á耶穌基督表明ê就是上帝愛。Chit種愛ê記號，就是tī十字架上成全出來，hō͘人kah上帝之間有和好ê關係，mā因為án-ne，hō͘受造ê萬物lóng tńg來到上帝面前。Tī使徒保羅ê看法裡，人若kah上帝和好，萬物mā會跟tòe kah上帝和好。

第21到23節，使徒保羅講過去未信耶穌基督chìn前，人ê言行舉止kah上帝之間是有極大ê距離，m̄-koh chit-má藉tio̍h信耶穌基督ê死，會得thang成做上帝ê朋友，有聖潔ê心靈。使徒保羅勸勉歌羅西教會tio̍h持守chit-ê信仰，千萬m̄-thang放棄，因為耶穌基督ê死，就是福音，就是基督教信仰ê本質。這mā是為甚麼使徒保羅會講：「因為我決定，tī lín 中間除了耶穌基督kah 祂hông 釘十字架ê 信息以外，無beh 提起其他ê tāi-chì。(全民版)」（哥林多前書二：2）原因tī-chia。

第24到27節，tī chia使徒保羅對傳福音ê事工有幾點看法：(1)伊認為ē-tàng因為傳福音而受苦，是一件快樂ê事，因為這表示伊是傳承耶穌基督受苦ê救贖恩典。(2)伊講家己是領受上帝所付託伊ê任務，hō͘伊成做福音ê奴僕，因為án-ne，伊一定tio̍h完成kā福音傳開ê使命。(3)chit-ê信息乃是隱藏已久ê奧秘，就是耶穌基督，因為án-ne，信耶穌基督ê人，等於是kah耶穌基督相連結，就是teh分享上帝ê拯救恩典ê榮耀。

第28到29節，使徒保羅認為基督徒siōng大ê使命，就是beh傳揚耶穌基督，tio̍h用各種智慧hō͘大家lóng tī耶穌基督內面長大成熟，好tńg來到上帝面前。使徒保羅講，為tio̍h chit種信念，伊拚命ê beh達tio̍h chit種目標。這就thang看出為甚麼伊講活teh，就是為tio̍h基督ê原因。

歌羅西書 2:1-2:23

註釋:

Chit章使徒保羅講出歌羅西教會ê問題，就是有人tī教會內傳出無符合信仰ê教導，就是hit-ê所講ê「虛妄ê哲學」、「星宿之靈」、「割禮」等等。使徒保羅強調：只有tī耶穌基督kah伊ê十字架，chiah ē-tàng看見性命ê強壯kah成長ê氣力。

第1到3節，tùi第1節thang看出這封phoe m̄-nā是kah歌羅西教會有關，mā kah老底嘉教會ê信徒有關係。Tùi地理起來看，老底嘉、歌羅西、希拉波里等三城鎮就是互相隔壁做伙。所以當以巴弗傳福音ê時，除了tī歌羅西，mā同時tī老底嘉、希拉波里等城投入福音ê工作（參考四：13），伊thang講為tio̍h傳福音行遍了這三城鎮。使徒保羅表示家己mā是án-ne，只為tio̍h福音ê緣故，是盡心盡力地ài kā福音傳出去，並且hō͘所有領受tio̍h福音ê人，lóng ē-tàng用疼心團結起來，認bat耶穌基督就是上帝拯救ê奧秘。

第4到5節，tùi chit兩節就thang看出有人進入歌羅西教會內，用「花言巧語」想beh誘惑信徒離開真道之路，m̄-koh伊感覺欣慰ê，就是聽tio̍h該教會信徒lóng iáu ē-tàng持守tio̍h信仰ê真理，無偏離。Án-ne，歌羅西教會顯然是kah加拉太教會ê情況真無相仝（參考加拉太書一：6—7）。

第6到7節，比較以弗所書第二章20節，就會清楚使徒保羅所強調ê，基督徒ê生活就是用耶穌基督為準則，學習伊ê模樣，並建立tī伊ê基礎上。
第8節kah第20節lóng出現「星宿之靈」ê詞句。Tī加拉太書第四章3節、9節mā出現仝款ê詞句，這lóng是teh指hiah-ê虛假ê、世俗ê算命、勘輿之術。摩西律法就bat嚴格禁止以色列人民進入迦南地了後，接受chit種行為（參考申命記十八：10—11）。使徒保羅強調一個基督徒ê信仰是kā性命交託tī耶穌基督ê救恩裡，卻m̄是khǹg tī人ê哲學理念，á是chiah-ê奇門邪術ê怪談。

第11節，使徒保羅tī chit節講tio̍h有關割禮ê問題。伊強調真正割禮不應該是肉體ê記號而已，ná親像先知耶利米所強調ê，真正重要ê割禮，應該是心靈上ê（參考耶利米書九：25—26）。割禮表示是kah上帝之間有性命ê約，chit-má所有信耶穌基督ê人，就是tī耶穌基督救贖ê恩典裡，領受了割禮，這割禮thang擺脫肉身ê罪性。

第12節，chit節thang看出早期教會已經非常流行ê洗禮，甚至tī外邦人地區已經用洗禮取代了猶太人ê割禮。M̄-koh兩個lóng teh表明kah上帝立約ê意思。使徒保羅tī chia強調洗禮所beh表明ê，就是kah耶穌基督同死，mā同koh活。

第13到15節，使徒保羅講歌羅西教會ê信徒因為信耶穌基督，chit-má會得thang得tio̍h上帝赦免所有ê罪、過犯，thang脫離猶太人所強調ê律法之束縛，tī耶穌基督ê十字架救恩裡，thang成做一個自由ê人，無koh是靈界、掌權者ê俘擄。Án-ne，就ē-tàng看出使徒保羅傳福音ê中心信息，就是耶穌基督kah伊ê十字架救恩。

第16到19節，chit段經文koh一pái強調耶穌基督就是教會ê元首，結連tī伊ê內面，靈性ê性命自然會生長。除了伊，其他ê一切學說對性命來講lóng已經無koh是重要ê à。Tī chit段經文中，thang看tio̍h歌羅西教會中，有人會kā摩西律法中有關「lim食、節期、月朔，á是安息日」等規律當做kah上帝ê救恩有密切關係，使徒保羅講chit種人，就是hō͘律法所束縛ê人，無得tio̍h自由。使徒保羅希望歌羅西教會ê信徒，不beh hō͘ hiah-ê「有特殊遠見、故作謙卑、崇拜天使ê人」所迷惑。Tùi chia mā thang看出有kóa錯誤ê信仰進入教會內。使徒保羅ài信徒lóng清楚知影：只有耶穌基督，其他ê，lóng m̄是救恩ê中心。

第20到23節，chit段經文mā thang看tio̍h早期教會非常流行「禁慾主義」ê生活態度。使徒保羅khah強調ê是：tī耶穌基督內面，ē-tàng成做一個自由ê人，性命是被tháu放ê。伊寫hō͘加拉太教會ê書信中án-ne講：「為tio̍h beh hō͘ 咱自由，基督已經 kā咱 tháu 放， 所 以，lín tio̍ h khiā hō͘ 在，m̄ -thang koh hō͘ 人壓制做奴隸。(全民版)」（加拉太書五：1）肉體ê禁慾並無表示就是接近屬靈，卻是來自心靈ê潔淨chiah是真實ê，chit種潔淨ê心靈，是建構tī心思意念ê更新，而且kah chit世界ê腐敗有所距離（參考羅馬書十二：1—2）。

歌羅西書 3:1-4:1

註釋:

Kah其他ê書信仝款，使徒保羅ê書信除了講tio̍h正確ê信仰認知外，mā會tī書信ê另外一部分提起怎樣kā信仰kah生活連結做伙。伊ài用「舊」kah「新」ê生活樣式，á是用「屬世ê」á是「屬天ê」等思考模式做對照，為tio̍h是beh表示tī耶穌基督內面，性命應該是有所轉變chiah正確。

Tī chit章經文內底，伊mā講tio̍h奴僕kah主人之間ê關係，ē-tàng看出來tī使徒保羅ê觀念中，並無排除奴隸制度，因為蓄奴tī伊hit-ê時代是社會ē-tàng允准ê現象。伊m̄-nā tī chit書信中講tio̍h，mā tī以弗所書裡提起。

第1到4節，使徒保羅講tio̍h基督徒應該是屬tī天頂ê公民（參考腓立比書三：20），因為án-ne，關心天頂ê獎賞應該是比重視地上ê財物iáu來得要緊。Tī伊ê看法裡，天頂ê事kah地上ê事，這是兩種完全無仝ê境界。屬天ê，是永恆ê性命，是bē敗壞ê，因為是kah耶穌基督同koh活ê性命（參考二：12—13）。伊tī chia特別用一個名詞來說明，就是所講ê「真性命」。Chit-ê詞thang對照約翰福音第十四章6節，耶穌基督講伊就是「道路、真理、性命」。 

第5到15節，使徒保羅tī chit chit段經文kā第1到4節所講ê「屬天」kah「屬地」ê內容，koh再作進一步ê說明。所謂「屬地」ê事，包括慾望、淫亂、污穢、邪情、惡慾、貪婪、忿怒、暴戾、仇恨、講毀謗kah污穢ê話、彼此欺騙等（第5到9節）。Á「屬天」ê部分，則有「更新ê形像」，hō͘人完全認bat上帝，而且無koh區分所講ê猶太人、外邦人，而ē-tàng tī生活上有憐憫、慈愛、謙遜、溫柔、忍耐ê心、寬容、彼此赦免，然後加上愛，因為愛hō͘ chiah-ê結連做伙（第12到14節）。使徒保羅講因為愛，上帝chiah揀選歌羅西教會ê信徒做祂ê子民。Chit點mā是成做基督徒siōng大ê榮耀，koh khah需要珍惜。伊講這就是上帝對一個被揀選ê基督徒全新ê創造，有新ê形像出現，chit種新ê形像會kā過去hiah-ê區隔人kah人之間ê「割禮」、「猶太人kah外邦人（希臘人）」、「野蠻ê kah未開化ê」、「奴隸á是自由人ê」等lóng消除掉。所有chiah-ê lóng tī耶穌基督內面完成。

第16到17節，使徒保羅勸勉歌羅西教會ê信徒，tio̍h學習hō͘耶穌基督豐豐富富ê恩典永遠存在心內，彼此互相教導、苦勸，用真誠ê心靈歌頌上帝ê救恩。伊講無論做甚麼，講甚麼，lóng tio̍h「奉主耶穌ê名」感謝上帝，這mā是耶穌基督教導祂ê門徒所講ê話，伊講：奉祂ê名無論向上帝求甚麼，上帝lóng會成全（參考約翰福音十四：13—14、十六：23—24）。

第三章18節到第四章1節，chit段經文thang對照以弗所書第五章21節到第六章9節，tī chit段經文中，使徒保羅講tio̍h基督徒ê人際關係，而且是先tùi夫妻ê關係講起，然後講tio̍h父母kah子女，續落來講tio̍h奴僕kah主人ê關係。Tī所有chiah-ê關係中，使徒保羅強調一點：所有ê chiah-ê lóng一定tio̍h建立tī一個基礎上，就是耶穌基督ê疼。伊認為chiah-ê關係lóng是teh見證每一個人是敬畏主耶穌基督，因為是伊ê救贖恩典，chiah hō͘人擁有chiah-ê賞賜，mā chiah hō͘人ê性命有意義，有得救ê ǹg望。若是無chit種心境，就算有世間ê一切，mā是枉然。

歌羅西書 4:2-4:18

註釋:

Tī chit封書信beh結束前，使徒保羅koh一pái勸勉歌羅西教會ê信徒，tio̍h時刻警醒，免得受tio̍h誘惑而棄sak信仰。然後，ná親像其他書信結尾仝款，伊kā身邊真chē同工ê名列上去，m̄-nā是hō͘教會ê信徒有所認bat，mā等於teh表明伊ê書信mā是封感恩ê信，記念chiah-ê bat kah伊同工奮鬥過ê伙伴。

第2到4節，非常重要ê，使徒保羅m̄-nā是替教會ê信徒祈禱，伊mā tio̍h歌羅西教會ê信徒為伊kah其他同工代禱，這已經講出一個重要ê信念：信徒彼此之間tio̍h互相代禱。因為會彼此代禱，chiah會hō͘大家tī無仝ê所在傳福音，也ē-tàng藉tio̍h耶穌基督ê名祈禱而hō͘大家連結做伙。Tùi第3節thang看tio̍h使徒保羅是tī監獄中寫chit封書信。因為伊堅持beh上訴到羅馬法庭。

第5到6節，tī使徒保羅傳福音到外邦地區去ê時，基督徒是少數，tī非基督徒是大多數ê社會環境中，基督徒ê角色就顯得突出。因為án-ne，kah非基督徒談話ê時，就beh有智慧，而且tio̍h把握機會，因為這mā是傳福音ê好契機。M̄-koh tī chit種環境，若m̄是擁有智慧ê言論，真容易kah人對談ê時，反tńg hō͘家己陷入迷惑中。這mā是耶穌基督教導並提醒門徒所講ê，差遣in去傳福音，有ná親像kā羊差派進入狼群裡仝款危險（參考馬太福音十：16）。因為án-ne，有充足ê智慧，chiah會知影怎樣回答問題。

第7到14節，tī chit段結尾ê經文中，伊提起幾位同工，包括有：
「推基古」；伊是使徒保羅忠實ê同工，代表使徒保羅到各地去探訪（參考以弗所書六：21，提摩太後書四：12，提多冊三：12）。伊特別派推基古去訪問歌羅西教會，因為án-ne，真可能chit封書信就是請推基古帶去ê。

「阿尼西謀」，chit pái是kah推基古同行去訪問歌羅西教會。伊原是腓利門厝內ê奴隸，逃走出來，後來信了耶穌基督。為tio̍h伊，使徒保羅寫phoe hō͘腓利門，替伊求情（參考腓利門書）。

「亞里達古」，伊是馬其頓ê帖撒羅尼迦人，kah使徒保羅同在以弗所經歷暴亂（參考使徒行傳十九：29），然後kah使徒保羅前往希臘，koh再轉tńg來到馬其頓、特羅亞（參考使徒行傳二十：4—5）。使徒保羅為tio̍h beh上訴而到羅馬去，伊mā一直陪伴tī使徒保羅ê身邊（參考使徒行傳廿七：2）。

「馬可‧約翰」，伊是使徒保羅第一pái傳道ê時，kah巴拿巴同齊同行ê，後來因為先離開。使徒保羅tī第二pái ê時chūn bat拒絕繼續帶伊加入，mā因為án-ne來致使使徒保羅kah巴拿巴之間有爭執（參考使徒行傳十五：36—39）。可能了後chit件事並無影響siuⁿ大，á是繼續siuⁿ久，後來有改變，使徒保羅koh繼續帶伊同行，並且認為伊是thang信靠ê同工（參考提摩太後書四： 11）。使徒保羅tī chit封書信中先替馬可‧約翰紹介，希望若是馬可‧約翰去訪問歌羅西教會，期待伊會得tio̍h溫暖ê接待。

「別號猶士都ê耶數」，只有tī chia提起，無其他ê資料，真可惜。

「以巴弗」，頭前有提起過，伊就是歌羅西教會ê開拓者。使徒保羅講以巴弗無停地teh為歌羅西教會代禱，懇求天父上帝hō͘該教會信徒有美好ê信心，m̄-nā án-ne，mā同時teh關心老底嘉kah希拉坡里等教會、代禱。因為這兩教會mā lóng是用巴弗建立ê。其實，這mā是每位傳道者共同ê心境，會為家己奉獻性命開拓起來ê教會kah信徒代禱，teh關心信徒靈命ê成長，期待ē-tàng koh khah堅定、成熟，án-ne chiah是siōng大ê安慰。

「路加醫生」，伊就是寫路加福音kah使徒行傳ê作者。當使徒保羅tī羅馬坐監ê時，伊陪使徒保羅做伙。

「底馬」，伊後來mā離開了使徒保羅，因為伊貪愛世間ê需要（參考提摩太後書四：10）。

第15到18節，tī chit段經文中，使徒保羅請歌羅西教會信徒替伊轉達請安hō͘下列ê人：
「寧法」，可能是老底嘉人，提供家己ê khiā家作聚會ê場所。值得注意ê是，使徒保羅ài歌羅西教會kā chit封phoe讀完後，轉交hō͘老底嘉教會。另外，伊mā有信hō͘老底嘉教會，希望歌羅西教會mā會讀hit封書信。可惜ê是，已經chhōe bē-tio̍h伊寫hō͘老底嘉教會ê書信à。
「亞基布」，tùi腓利門書2節thang知影伊kah使徒保羅同工。伊可能擔當歌羅西教會ê牧養事工。

第18節，除了講祝福ê話外，使徒保羅特別強調，chit封書信是伊「親手寫」ê。其實，比較正確ê講法，是伊口述，然後有人替伊執筆（參考羅馬書十六：22）。然後伊講家己是「帶鎖鍊」，表示伊目前正tī羅馬監獄中寫chit封書信。