重新查詢
經文:

彼得後書 1:1-1:19

註釋:

彼得後書ná親像前書仝款,lóng真關心耶穌基督koh再臨ê問題,而chit點tú好mā是使徒書信中ê共同特色,mā是本書信siōng重要ê主題內容。早期教會成立了後,眾使徒一再教導信徒ê就是:耶穌基督teh beh koh再臨。因為chit-ê緣故,tú-tio̍h羅馬政府非常殘酷ê迫害mā ài忍耐到底,因為伸冤ê上帝必定會koh一pái藉tio̍h耶穌基督koh再臨,替hiah-ê受tio̍h迫害ê信徒主持公道。

	若是beh問講彼得後書siōng特別ê所在是甚麼?想應該thang講是chit本書信提到à使徒保羅kah伊ê書信(參考三:15—16),作者teh替使徒保羅講話,可見tī早期教會中,雖然大家lóng真尊敬使徒保羅,m̄-koh iáu是有人會tī背後講三道四散布謠言。Ná親像哥林多後書第十到十一章提起使徒保羅真受氣責備hiah-ê tī教會中亂講話,á是假扮使徒角色卻專門行欺騙ê 事實ê人。Chiah-ê人siōng 拿手ê事,就是故意kā使徒保羅ê教導á是所寫ê書信hō͘ in曲解。因為án-ne,彼得後書ê作者ài大家注意chit件事,免得受tio̍h影響。

	Tùi chit點就ē-tàng看出早期教會並m̄是大家lóng真和諧,雖然lóng仝款信耶穌基督,m̄-koh每一個人lóng對信仰ê認知有cheng差,特別是tī外面邦地區ê教會,因為並無親像耶路撒冷教會信徒lóng是猶太人,in有舊約聖經thang讀,而且有人教導聖經ê信息,然後加上當時流傳tī教會中ê各種書信、資料,tī信仰上有一個真好ê共通點,á是有一個明確ê聖經範本thang依循使用。因為是外邦人地區,所以根本就無舊約聖經thang用,唯一ê就是當時流傳tī教會中ê有關耶穌基督之資料(參考路加福音一:1—4),頂siuⁿ加上眾使徒、尤其是使徒保羅ê書信thang讀而已。因為án-ne,會發生信仰上ê問題,á是大家彼此之間互相猜忌等等,lóng是thang理解ê事。

    M̄-koh,ài怎樣成做一間有見證福音能力ê教會?tī政治迫害ê環境中,大家怎樣chiah ē-tàng堅守對耶穌基督ê信心?án-ne chiah是一個真重要ê課題。眾使徒ê書信就tī chit種背景之下寫出來,主要目的就是beh鼓勵眾信徒,m̄-thang放棄對耶穌基督koh再臨ê ǹg望,以及對信靠耶穌基督就ē-tàng享受上帝特別救恩ài有絕對ê信心,án-ne chiah是所有ê書信中siōng重要ê信息。

作者tī chit章呼籲所有ê信徒,一定tio̍h tī信仰生活上有所節制,發揮信仰ê美德,thang做耶穌基督福音ê見證者,而chit種見證siōng好ê方式,就是tùi「手足之愛」做起。作者kā所有ê信徒講,ē-tàng參與見證耶穌基督拯救ê信息,是性命中siōng大ê榮耀,一定會好好á珍惜。

第1到2節,當時書寫信柬ê方式,就是先自我紹介。Chia作者用「西門‧彼得」chit-ê詞,kah彼得前書第一章一節用「我彼得」就真無仝款,這mā是為甚麼有bē少聖經學者持一種看法,認為chit本書信真可能m̄是耶穌基督ê門徒彼得所寫ê,á是講彼得後書kah前書ê作者並無同。Koh講,前書kan-taⁿ用「彼得」,tī後書就用「西門‧彼得」而且另外一個無仝ê所在,就是tī前書用「耶穌基督ê使徒」,tī後書則多加上「奴僕」chit-ê詞。

作者tī chia自稱是「耶穌基督ê奴僕」,這「奴僕」一詞tī希臘文ê意思就是teh指「奴隸」,是身分真低賤,隨時thang被主人當做財物賣掉ê人。這mā是使徒保羅siōng ài用ê方式(參考羅馬書一:1,腓立比書一:1)。會有「奴僕」chit種用法,是因為基督徒真清楚知影家己就是一個有罪ê人,m̄-koh因為有耶穌基督ê救恩,因為án-ne知影家己ē-tàng得tio̍h永恆ê性命,乃是因為耶穌基督拯救ê疼ê緣故,mā因為án-ne之故,基督徒寧可認為家己就是福音ê「奴僕」,mā就是講:只要是為tio̍h福音ê緣故,家己願意lóng無條件地被差遣。

Koh講,後書指出受信ê對象,只有講是寫hō͘「仝款寶貴信仰ê人」。這已講出後書ê受信對象比較廣闊,只要是信耶穌為基督ê人lóng是伊關心ê對象。作者mā tī chia講藉tio̍h上帝ê kah救主耶穌基督ê「義」而同齊分享chit本書信。

Chia所講ê「義」,指ê就是上帝ê救恩,這救恩是透過耶穌基督死tī十字架上ê救贖來進行並完成。

羅馬時代寫書信ê規格,就是寫phoe ê人自我紹介了後,koh來就是祝福ê話語。作者tī chia用了一個重要ê詞「認bat」,chit-ê字tī彼得後書中出現kúi-nā pái,除了chia出現之外,mā出tī第一章3節、8節、第二章20節。「認bat」chit-ê字是由兩個希臘文併做伙;頭前一個字是「epi」,指ê完整、齊備ê意思。後者「gnosis」,chit-ê字ê意思是teh指知識。Kā chit兩個字合併起來看,chit-ê「認bat」ê希臘文「epignosis」,意思就是有完全ê認bat,非常清楚ê明白。

Chia作者講beh「認bat上帝kah咱ê主耶穌」,意思就是上帝kah耶穌lóng是救主。通常猶太人只稱上帝為「救主」,chia作者kā「救主」chit-ê尊稱用tī耶穌基督身上,表明ê就是上帝kah耶穌基督仝款是救主,chit-ê個信仰觀念tī chit本書信中共計出現五次,除了第1到2節外,另外出現tī第一章11節、第二章20節、第三章18節等等。Chit種認bat對早期教會ê信徒來講,是非常重要ê信仰告白,原因就是早期教會出現一種風潮,就是講究完全ê理性ê「重智派」(Gnosticim)人士。這派ê人甚至認為耶穌基督並m̄是真正人,伊在世界上是一個「幻影」。伊無死,當然koh khah無談上koh活。這派ê人一再強調一切lóng以「知識」為準,tī「知識」上無法度接受ê,就是錯誤ê。

彼得後書ê作者就tī第6節特別提醒大家,tio̍h知影「知識加上節制」,因為若無án-ne,真容易hō͘一個人因為擁有豐富ê知識而驕傲。因為án-ne,有kóa聖經學者認為彼得後書有一個重要ê主題,就是beh真正「認bat耶穌就是救主」。

第3節,作者tī chia提起一個真重要ê認知:上帝賜hō͘所有信靠耶穌基督為主ê人ê恩典,就是知影怎樣過「敬虔生活」。所謂「敬虔」,指ê就是敬畏上帝。知影怎樣尊崇上帝為性命ê主,知影teh敬拜中以真實ê心回應上帝ê救恩,這就是chia所講ê「敬虔」ê意思。

分享上帝ê「榮耀」kah「善德」,這是teh指上帝完美ê本質。作者會án-ne強調基督徒ê信仰kah生活,就是beh有敬虔ê生活態度chiah ē-tàng分享到上帝chit種完全ê美德。

第4節,chit節講出上帝賞賜hō͘人「siōng大kah siōng寶貴ê恩賜」,就是thang避開這「世間hit-ê毀滅性ê慾望,分享上帝ê神性」,這表示tī人ê性命裡有「真理ê靈」同在(參考約翰福音十四:16—17)。Án-ne,thang幫助人阻擋來自各種誘惑、敗壞ê氣力,而成做上帝聖潔ê子民。

第5到7節,作者tī chit三節經文連續提出七個信仰上應該tio̍h學習ê功課,而chiah-ê功課lóng建構tī信心ê基礎。就是堅認耶穌基督為性命ê主。然後連連有七個功課:

一是「信心上加上美德」。所謂「美德」,有兩個層面ê意思,一是teh指「美好」。Ná親像田地真肥,會hō͘掖落來去ê種籽生出美好ê果子仝款。二是teh指勇氣。真正信心,是tùi勇氣表現出來。

二是「美德加上知識」。這是teh指tī生活中經驗累積落來ê常識,m̄是lóng無經驗ê表現。Án-ne thang明白一個人若真正有勇氣,就beh kā它配合teh生活經驗上。若無,就會變成有勇無謀,chit種人就會成做愚戇者。

三是「知識加上節制」。Chia節制ê意思mā thang解釋做「自主」,是有自我控制ê能力ê意思。一個真正有生活經驗ê人,伊會知影怎樣要求家己,koh khah會知影怎樣自我約束。因為án-ne,「節制」mā是基督徒實踐倫理生活siōng重要ê基礎。

四是「節制加上忍耐」。Chia ê「忍耐」是tī非常困境中看tio̍h ǹg望而產生ê氣力。因為有將來ê希望,因為án-ne對目睭前所tú-tio̍h ê困難lóng用極大容忍之毅力hō͘承受落來。

五是「忍耐加上敬虔」。這「敬虔」是teh指真誠ê心靈。意思就是tī非常痛苦ê困境中,猶原無改變真實敬拜上帝ê心意。

六是「敬虔加上手足之愛」。Chia ê「愛」字tī希臘文是「philadelphia」,意思是親情ê疼。對親朋好友,tio̍h用真實ê疼相扶持。

七是「手足之愛加上博愛」。注意chia所講ê「博愛」,希臘文是用「agape」。意思就是tī疼親朋好友ê時,tio̍h學習用耶穌基督hit-ê無私心ê疼,是真實ê、犧牲ê疼。

第8到9節,chit兩節是相對ê句型;tī第8節講tio̍h肯定ê層面,而第9節則是m̄是定ê意思。Chit兩節就是tī針對前述七種信仰品德ê有kah無做一個評價。作者講一個信耶穌基督ê人有頂面所講chiah-ê信仰上ê美德了後,就會想beh「koh khah積極、koh khah有效」地表現出對耶穌基督ê「認bat」。換句話講,真實ê基督徒,bē只停留tī腦袋ê思考狀態,卻是會積極走chhōe見證福音ê機會。相對ê,若是無chit種內涵ê人,就bē有chit種積極、有效ê動作kah毅力表現出來。Kah-hit-ê看bē-tio̍h性命亮光ê人,m̄知活teh ê意義,真自然ê,chit種人並m̄知上帝ê恩典。

	作者tī chia提出一個重要ê認bat,就是有頂面所講chiah-ê信仰品德ê人,就ē-tàng預防墮落ê發生。因為伊會清楚知影家己就是tī耶穌基督ê恩典裡受tio̍h上帝揀選,而這揀選就是為tio̍h beh進入永恆ê性命裡。

第10到11節,作者勸勉所有基督徒應該「koh khah努力,hō͘上帝ê呼召kah揀選」成做「永久ê經驗」,chit種經驗就是頂面所講七種ê美德,án-ne,就bē因為這世代ê敗壞而跟tòe敗壞à。Án-ne,就會突顯出基督徒就是hō͘上帝所揀選出來ê福音奴僕。Á chit種信徒chiah ē-tàng享受特殊ê「權利」ē-tàng進入「主kah耶穌基督永恆ê國度裡」,chia ê永恆國度,就是teh指永恆ê性命。

    第12到15節,作者講家己會盡責任tī督責、提醒ê工作上。Án-ne ná親像tī前書第五章1到4節所提起ê一個好牧者ê責任,就是beh終生完成chit項督責ê工作,因為伊知影家己ê時間無chē,m̄-koh卻tio̍h tī性命結束chìn前,克盡職責完成chit項受託ê使命。作者有感覺tio̍h家己所chhun落來ê日子無chē ê款,因為án-ne,伊ê心願就是beh繼續無停完成應該做ê事,就是督責眾信徒堅守信心,並且有前述所講ê信仰品德。

    Chit種預感家己所chhun落來ê日子無chē ê情景mā發生tī使徒保羅ê身上,伊就án-ne講:「Taⁿ我犧牲獻hō͘ 上帝ê期已經到à,chit chūn 是我離開世間ê 時刻。(全民版)」(提摩太後書四:6)因為有chit種預感,因為án-ne,伊teh寫hō͘提摩太ê書信中所講ê:「Tio̍h傳福音; 無論tio̍h 時á 是無tio̍h 時,lóng tio̍h 專心來進行; 用各種ê 寬容kah 教示,來勸勉、警戒kah 鼓勵。。(全民版)」(提摩太後書四:2)不管是tī怎樣ê情況下,就是beh kā福音傳揚出去。仝款ê,chit本書信ê作者mā是存 chit種態度,伊beh盡性命ê氣力,完成應該做ê事,絕對bē推託、pîn-tōaⁿ。

第16到18節,chit段經文讀起來感覺非常熟悉,mā因為chit段經文,hō͘真chē聖經學者認為chit本書信就是耶穌基督ê門徒彼得親自寫ê。因為chia至少提起兩件重要ê事,並且這兩件事lóng是彼得親身ê經驗,因為án-ne,伊tī第16節特別強調講chiah-ê事lóng是伊kah其他眾門徒「親目看見ê」,並m̄是捏造出來ê。這兩件事就是:

一是耶穌基督升天前ê景象,並且mā聽tio̍h兩個天使親自傳出應允ê聲音講:「加利利人,為甚麼khiā tī chia望tio̍h天空neh?Chit位離開lín、被接升天ê耶穌,lín看見伊怎樣升天,伊mā ài怎樣tńg來。」hit時使徒彼得kah其他眾門徒lóng親自在場,因為án-ne,第16節講這是眾門徒親目看見ê見證(參考使徒行傳一:6—11)。

二是第17到18節是使徒彼得性命中siōng特別ê經歷,就是tī伊kah門徒約翰、雅各等三人,被耶穌基督邀請陪同到一座山頂去祈禱,tī he地方忽然看tio̍h耶穌基督變形像,tī耶穌基督ê身邊有摩西kah以利亞出現。就tī in驚惶所看見ê異象ê時,hit時忽然有一朵雲彩出現罩tiâu了in,而且tùi雲裡有聲音出現講:「這是我親愛ê kiáⁿ,lín tio̍h聽從祂!」(參考馬可福音九:2—8)

親目看見,這是非常重要ê見證,並m̄是道聽途講,mā m̄是假造欺騙ê行為。Ná親像路加tī寫福音書ê時特別強調,伊是kā所有關係耶穌基督ê報導lóng「tùi頭詳細查考過了」仝款(參考路加福音一:2—4)。Tùi開始就親目看見chiah-ê事」,然後kā「親目看見」ê事傳佈出去,這就是傳福音siōng重要、mā是siōng有效ê方法。

第19節,先知ê信息就「像一盞燈照耀tī黑暗ê所在,直到天光」,因為án-ne,一定tio̍h好好á珍惜。Chia並無特別指出是toh一位先知,因為án-ne ē-sái講是指全部舊約聖經ê先知文獻。Koh講,先知ê預言中lóng有含終末ê思想,chit種終末ê思想主要teh說明上帝ê審判必定會來臨,同時mā帶來祂ê拯救。Á耶穌基督就是上帝表達祂拯救ê疼ê記號。因為án-ne,tùi舊約到chit-má,先知ê話ná親像一盞拯救亮光ê燈,一直照耀陷tī苦難中ê hiah-ê人,hō͘人看tio̍h了後thang點to̍h性命ê亮光。

第20到21節,chia指出一個重要ê事實,就是tī早期教會中不時出現假先知,chiah-ê假先知會傳講錯誤ê信息,誤導信徒進入錯誤ê信仰認知中。這mā就是tī第二章1開始,作者續落來就講tio̍h有關假先知ê問題。其實,chit種情形tī每一個時代lóng一再發生,若是看先知耶利米ê文獻就會發見,tī伊ê時代中,一再出現假先知傳講錯誤ê信息(參考耶利米書十四:14—16、廿三:16—22)。先知以西結ê時代mā出現假先知傳講無正確ê信息(參考以西結書十三:3—9)。仝款ê,會用神跡奇事來迷惑人ê,tī早期ê教會就bat一再發生過(參考馬太福音七:21—23),而tī使徒保羅ê時代mā出現「超等使徒」(參考哥林多後書十一:5、十二:11)。因為án-ne,當彼得後書ê作者tī提醒大家tio̍h注意聖經ê預言bē-tàng胡亂解釋ê時,chit對每一個時代ê信徒lóng是非常重要ê信仰功課。

誠實ê心來閱讀聖經、解釋聖經,這是非常重要ê信仰功課,對傳道者來講,koh khah是一項siōng基本ê傳道倫理。因為聖經並bē-tàng為tio̍h滿足人ê私心ê需要來解釋,而是beh忠實tī聖經ê教導,正確地解釋聖經,án-ne chiah是siōng重要ê責任。使徒保羅就án-ne講:「所有受上帝默示來寫ê 經典,對教示kah 督責,以及 hō͘ 人歸正 kah 引 chhōa 人學義理,lóng 有利益。(全民版)」(提摩太後書三:16)因為án-ne,正確明白聖經ê信息,就是teh建構一個健康ê信仰性命,這mā是咱teh解釋聖經、傳達聖經信息ê時,ài beh特別注意ê所在。
經文:

彼得後書 2:1-2:22

註釋:

Tùi chit章就會發見早期教會已經有真chē問題發生,tī chit章提起一個嚴重問題,就是tī教會信仰團契內面出現「假先知」。作者tī chit章中真嚴厲地批判chiah-ê假冒先知ê名,行敗壞之實ê人,認為上帝一定會嚴厲懲罰chit種人。

使徒保羅m̄-nā tī哥林多前書伊用án-ne嚴厲ê語句責備hiah-ê pháiⁿ了教會規矩ê人,mā tī哥林多後書痛批hiah-ê假借「使徒」名義而專門teh教會裡行欺騙ê人,伊戲稱hiah-ê人為「超等使徒」(參考哥林多後書十一:5、十二:11)。Tī伊寫hō͘加拉太教會ê書信中mā提起有人跟tòe tī伊背後,因為所傳講ê信息內容並m̄是關係耶穌基督koh活ê信息,使徒保羅真受氣譴責該教會ná會去「隨從另外一種福音!其實,並無另外一種福音」。伊甚至講若有「任何一個人」向in「宣傳另外一種福音」,kah以前伊所傳hō͘ in ê無仝,伊講chit種人lóng「應受詛咒」參考加拉太書一:6—9)。Tùi chiah-ê thang真緊to̍h發見在早期教會內部確實存在bē少問題,m̄-nā是有信仰生活上ê偏差,而且tī信仰內涵上mā kah使徒保羅所傳講ê信息相差甚遠。

Tī使徒保羅ê觀點中非常明確地表示:福音就是耶穌基督,因為án-ne,只有傳耶穌基督tī十字架上ê救恩chiah算。Á這十字架頂ê救恩,就是耶穌基督以伊死tī十字架上表現出來ê(參考哥林多前書二:2)。伊甚至真清楚表明:如果耶穌基督無真正死kah koh活,則基督徒kā是chit-ê世間siōng可憐ê人,因為這表示基督徒ê性命是只有tī今生有ǹg望,無未來koh活ê期待thang講(參考哥林多前書十五:16—19)。伊真明確地講,基督徒就是kah耶穌基督同死,mā kā因為án-ne kah耶穌基督同koh活,這就是基督教信仰ê中心(參考羅馬書六:5、8)。

	Án-ne看起來,早期教會確實有人假藉基督ê名義行欺騙ê勾當,結果hō͘耶穌基督ê名聲嚴重受損,這mā是作者提醒所有信徒ài beh特別注意ê事。

    第1節,chit節提起「以前有假先知tī以色列民間出現」,這kah先知耶利米時代ê景況仝款。伊bat一再提醒以色列人民,m̄-thang聽chiah-ê假先知所傳講ê話,若無,上帝ê忿怒連hiah-ê聽假先知傳講ê人mā會受thiám遭懲罰(參考耶利米書十四:14—16)。chit-má作者tī chia提起「有假教師」tī早期教會中出現,chiah-ê是「偷偷á輸入毀滅性ê異端」,chia ê「異端」指ê就是「m̄承認救贖in ê主宰」,就是耶穌基督是救贖主。

第2到3節,作者tī chit兩節指出「假教師」就是故意傳錯誤ê信息,m̄-koh卻iáu是有人歡喜聽從chit種人,跟tòe in過「邪蕩ê行為」。

Chia所講ê「邪蕩」,指ê是無約束家己,ài怎樣就怎樣。Á chiah-ê行為通常lóng是hō͘人看起來就會感覺討厭、見笑ê。如果以今á日ê人來看,就是嫖淫、lim賭等行踏,koh khah嚴重ê是in並無為chit種見笑ê行為有所收斂,卻是公開行之,表面上看起來講是tī耶穌基督內面已經自由了,其實,是kā自由用來滿足家己ê私慾。Chia清楚指出chiah-ê「假教師」就是會講白賊、欺騙,就是為tio̍h beh「滿足家己ê貪婪」,iáu會用「捏造ê故事」進行「搾取」信徒ê錢財、物件。作者特別強調講上帝一定會對付chit種人,是「自古以來」lóng仝款,會用真嚴厲ê審判服侍in,hō͘ in「逃bē過毀滅」ê懲罰。

第4節,chia「上帝並無寬容犯罪ê天使」,聖經中siōng早提起天使墮落ê記事,就是tī創世記第六章2節提起有關天頂ê天使,因為看見地上ê美女,就跟tòe家己ê意思娶in做bó͘,結果上帝受氣à,並且因為án-ne縮短了人ê性命年日。即使是天使犯罪,mā會hō͘懲罰,甚至會kā in「tàn入去地獄」去「thèng候審判」。

第5節,chit節真清楚是kah創世記第六到九章有關大水氾濫,以及挪亞一家人ē-tàng hō͘ 上帝拯救ê記事有關。作者tī chia指出除了挪亞一家八口以外,當時ê人差不多全部lóng是「心目中無上帝ê人」。創世記作者teh描述大水chìn前ê情形是án-ne ê:「上主看tio̍h 人tī 地上,罪惡真大,心內所想ê 念頭ta̍k 日lóng 是pháiⁿ ê。(全民版)」(創世記六:5)然後講:「挪亞生三個kiáⁿ,就是閃、含、雅弗。世界tī 上主ê 面前敗壞,世界充滿強暴。(全民版)」(創世記六:10—11)Tùi創世記作者描述挪亞「kah上帝有密切交往」,到彼得後書ê作者講當代人「心目中無上帝」,ē-sái講是極大ê對照。聖經作者提供一個重要ê信仰認知:kah上帝有密切關係,就是得救ê第一步。因為chit種人知影怎樣遵守上帝ê教示,bē過「邪蕩」ê生活。

第6到8節,chit三節是有關創世記第十八到十九章記載所多瑪kah蛾摩拉兩個城hō͘ 上帝毀滅ê背景。如果注意創世記ê作者寫法:「當上帝剿滅平原chiah-ê 城ê 時,上帝數念亞伯拉罕;tú-tú tī chhia倒羅得所tòa ê 城ê 時, 就kā 羅得tùichhia 倒ê 中間救出去。(全民版)」(創世記十九:29)換句話講,若m̄是因為亞伯拉罕kah上帝之間有密切關係,羅得想beh tùi毀滅ê所多瑪城中得救mā難。因為án-ne,羅得ê得救,其實並m̄是因為伊是「好人」,mā m̄是伊「tòa tī pháiⁿ人中間,ta̍k工看見,ta̍k工聽見hiah-ê邪惡ê事,心內非常痛苦」,咱無清楚伊是m̄是會為tio̍h所多瑪城犯罪ê情形「大大憂傷」,m̄-koh真清楚ê事伊會得救是因為上帝記念亞伯拉罕ê緣故。

第9到10節a句,chit兩節ē-sái講是作者想beh kā當時ê基督徒講ê話,就是上帝對tī kah祂有密切關係ê信徒,絕對會伸手拯救,特別是tī審判kah毀滅ê時刻來臨ê時,上帝一定會kā好人kah pháiⁿ人分別清楚。值得注意ê就是tī chia作者特別提起,上帝會針對「hiah-ê放縱肉體情慾、藐視上帝權威ê人」,進行嚴厲ê懲罰。這hō͘咱看tio̍h聖經有一個明顯ê思路:tī肉體上放蕩ê人,kah心目中無上帝ê態度是有密切關係ê。 

Tī福音書中記載耶穌基督所傳講上帝國度譬喻中,lóng會提起終末審判ê時,就是án-ne kā「好」kah「pháiⁿ」分別非常清楚。親像馬太福音第十三章耶穌基督提起tī審判來臨ê時,上帝會kā「稗á kah麥á」分別清楚,tī收割ê時kā稗á割起來燒,kā麥á收藏起來存放;拋網tī湖裡,kā好ê「khǹg tī桶裡,pháiⁿ ê扔掉」;tī馬太福音第廿五章31到46節中,特別記載hiah-ê遵行上帝旨意ê人,kah無遵行上帝旨意ê人,tī審判來臨ê時就是有絕對性ê差別結果。

第10節b句到11節,chia真清楚指出chiah-ê「假教師膽大妄為」ê囂張態度,in「m̄-nā無尊敬天頂ê尊榮者」,反tńg是「侮辱」,chiah-ê尊榮者指ê就是天使ê意思。Chit-ê意思真清楚,in無koh驚上帝,表示in心中根本to̍h無上帝,甚至iáu家己扮演上帝角色chiah會án-ne囂張。作者tī chia kā chiah-ê囂張至極ê「假教師」譬喻做ná親像魔鬼一般ê惡質。這mā是「假教師」ê第一個惡狀。

第12到13節,chia提出假教師ê第二個惡狀,就是in ê生性ná親像「野獸」仝款。Chia所講ê「野獸」,是teh指「無靈性」ê意思,chit種人mā是「無理性」thang講ê。Tī chit兩節經文中,作者提起幾個現象作代表,包括喜愛「屠殺」無辜、「製造苦難」、「毀謗家己所bē了解ê事」,mā會利用飯局行詭詐ê事。

第14節,chia清楚提起「假教師」除了犯淫亂ê罪之外,mā已經「習慣tī貪婪」,真會欺騙信徒ê錢財。使徒保羅講「貪財是萬惡ê根源」(參考提摩太前書六:10),如果傳道者對錢財hit種貪婪,絕對無法度kā信徒講上帝chiah是性命ê óa靠。

第15到16節,chit兩節是引用民數記第廿二到廿五章,有關先知巴蘭ê故事。先知巴蘭並無遵行先知ê角色,反tńg接受摩押王巴勒ê o͘-se,beh去詛咒以色列人民。上帝當然無歡喜巴蘭chit種行為,就透過巴蘭所騎ê hit隻驢á來阻止巴蘭chit種錯誤ê行為。接受o͘-se去做無應該做ê事,這是上帝所討厭ê行為,而巴蘭是上帝ê奴僕,竟然mā接受o͘-se beh去做違背上帝旨意ê事,這真正是非常無應該ê行踏。Chit種為錢財而棄sak上帝ê例真chē。莫怪耶穌基督teh教導門徒ê時,會真清楚提醒in一定tio̍h真清楚,tī上帝kah錢財之間作一個明確ê選擇,人無可能想beh攬tiâu上帝,又ài抱tio̍h錢財(參考馬太福音六:24)。作者beh提醒一點:如果tī信仰團契中當教師ê人lóng會對錢財有hit種高ê興趣,就已經無適合當教師à。

第17節,指出「假教師」提供給人ê,ná親像「乾涸ê泉源」,mā像「吹散ê雲霧」,意思就是表面上看起來真美,事實卻tú好顛倒。這已經teh暗示一件事:「假教師」用欺騙ê話kā信徒講,結果ē-sái聽信ê人心靈枯竭。M̄-koh作者mā清楚指出進行án-ne虛假行為ê「假教師」,必定會遇tio̍h上帝嚴厲ê懲罰,因為上帝會kā「烏暗ê深淵」留hō͘ chit種「假教師」。

所謂「烏暗ê深淵」,指ê就是地獄,無性命希望ê所在。猶大書ê作者講,chit種人會被「永遠」留Tī該處(參考猶大書第13節)。這應該thang做「假教師」siōng好ê警戒。

第18到19節,chia提起「假教師」就是真會引誘hiah-ê初信徒,而且lóng會偏好tī肉體ê情慾上,理由是in會傳講講「自由」,而且用當時社會siōng流行ê「重智派」者所講ê,肉體只是暫時ê,無「靈性」ê,ná親像一個玩具,thang好好á sńg,因為這是基督徒tī耶穌基督內面ê自由。M̄-koh chit種講法卻是極大ê錯誤,因為人ê性命是包括肉體kah靈魂。無法度kā chit二者分開看待。使徒保羅講身軀就是「上帝ê殿」,有上帝ê靈tòa tī咱ê身軀內面。因為án-ne,如果咱隨便放縱身軀滿足肉慾,必定會惹起上帝受氣而帶來毀滅(參考哥林多前書三:16—17)。

作者強調一個人若是貪圖肉慾ê滿足,結果就是成做淫亂ê奴隸,ná親像一個人貪圖錢財,其結果就成做錢財ê奴隸仝款。台語有一個形容人貪愛錢財ê名詞,就是講chit-ê人是「錢奴chiah」,而當講一個人真淫蕩ê時,就講chit-ê人是「put-sú鬼」,意思就是ná親像好色ê惡魔仝款,已經會失去人性應該有ê尊嚴。

第20節,chit節到第22節是chit章經文ê一個總結,beh kā所有ê讀者講:時時刻刻保持清靜ê心靈是性命中非常重要ê功課。作者提出一個明確ê教導:做一個人信了耶穌基督了後,卻iáu m̄知tī信仰上有進步,反tńg落入了「假教師」ê kho͘-á套中墮落了,chit種人tī信仰ê問題會比本來iáu未信以前koh khah chē。第20節chia所提起ê「認bat」,tī第一章2節、3節、8節已經提過,意思就是「真正認bat」。Án-ne就koh khah清楚作者ê意思,就是既然有明確、真實ê「認bat」,soah koh去跟tòe hiah-ê「假教師」,而且參與欺騙ê勾當,án-ne就koh khah bē-tàng原諒à。

第21節,「正義ê道路」,這是teh指上帝ê教導。Chit種教導真清楚指出對上帝beh絕對忠實,而chit種忠實kah生活、工作是連結無法度分開ê。

第22節,chit節是引用箴言第廿六章11節所寫ê:「愚戇人一再做愚戇事,就ná親像狗回頭食牠所吐出ê物件。」chit句話ê意思真清楚,就是因為吐出來ê是真lah-sap ê、無好ê,如果koh去食它,表示情形kan-taⁿ會koh khah糟而已。

真清楚,作者Tī頂面所講chit三節想beh表明一點:信了耶穌基督ê人,應該學習tio̍h ê是真實、潔淨ê心靈。如果信耶穌基督了後iáu會koh再去做hiah-ê污穢ê勾當,he m̄-nā無潔淨心靈,反tńg是koh khah污穢,kan-taⁿ會為性命帶來koh khah惡質ê結果而已,顛倒是m̄-thang信khah好。


經文:

彼得後書 3:1-3:18

註釋:

Tī頭前已經有提起過,彼得後書有一個重要ê中心思想:基督koh再臨。其實,mā thang án-ne講,深信基督koh再臨就是早期教會siōng重要ê信仰中心。M̄-koh tio̍h注意,只要是講tio̍h有關基督koh再臨,一定會講tio̍h有關末日審判ê事,這是一體ê兩面。Á為tio̍h beh準備基督koh再臨,使徒ê書信中lóng會要求眾信徒一定tio̍h準備好勢迎接這teh beh來臨ê日子,這m̄-nā是個大好ê日子,而且mā是一個重要ê審判時刻,大家tio̍h準備好勢來迎接這日子ê來臨。免得因為不謹慎而tī審判ê時chūn,受tio̍h嚴厲ê懲罰。Chit種觀念tī使徒ê書信中俯拾就有。

自古以來chit種關係終末審判ê日子不時被提起,m̄-koh大家lóng真希望知影hit時chūn是tī甚麼時間來臨。因為án-ne,替上帝數算時間ê例jú來jú chē,直到現今iáu是有真chē人無改變chit種信仰思維。甚至在世界各地常出現有人會假傳上帝ê話語講:「某年某月某日就是世界末日。上帝beh毀滅全世界。」。M̄-koh聖經一再提醒上帝ê日子並m̄是用人ê智慧、知識ē-tàng算出來ê。包括耶穌基督在內lóng kā咱講:「關係hit-ê 日kah hit-ê 時,無人知,tī 天頂ê 天使mā m̄ 知,Kiáⁿ mā m̄ 知,kan-taⁿ 天父知。Tio̍h 謹慎!Tio̍h 警醒來祈禱,因為lín m̄ 知hit-ê 時刻甚麼時會到。(全民版)」(馬可福音十三:32—33)耶穌基督提醒跟tòe ê民眾重要ê m̄是算時間,卻是「警醒」,預備好迎接上帝審判ê來臨遠比數算上帝審判ê時間koh khah重要。

彼得後書作者tī chit第三章談及主應允koh來ê日子會親像賊á仝款,tī人不知不覺ê中間來到。因為án-ne,一定tio̍h用心準備迎接hit日子ê來臨chiah是正途。

第1節,chia一開始就講所寫ê是「第二封phoe」,這是m̄是講iáu有另外一封,á是前書就是第一封,而後書則第二封?語意並無清楚,不過一般學者認為這是teh指彼得後書講ê。

作者提起「Tī兩封phoe內面」lóng是teh「激發」信徒ài有「純潔ê思想」。Chia所講ê「純潔」,意思就是「誠實」。Tī信仰團契中,siōng基本、mā是siōng重要ê條件就是誠實。耶穌基督tī山上寶訓中án-ne教導講:「心肝清氣ê 人實在有福氣,因為in 會見tio̍h 上帝!(全民版)」(馬太福音五:8)作者tī chia ài beh特別提起「純潔ê思想」這問題,是因為早期教會已經出現有專門teh欺騙ê人進入教會信仰團契中,chiah-ê人專門teh斂財、欺騙ê勾當。

第2節,作者提醒讀者古代先知ê話,kah耶穌基督藉tio̍h門徒所傳落來ê教示。作者án-ne提醒有真大ê用意,伊beh kā眾讀者講,舊約時代ê先知就是tī預言新約耶穌基督降臨ê大好消息。

Koh講,先知ê預言必定kah新約時代ê拯救信息有密切關係。Án-ne,thang看tio̍h一個非常重要ê信息:舊約kah新約是相關連ê,m̄是分開ê。會有chit種提醒,真可能是因為早期教會認為耶穌基督ê時代已經來臨ê,舊約時代lóng過去à,mā不重要à。M̄-koh如果無對舊約聖經有所了解,就真oh了解耶穌基督為甚麼beh到世間來ê信息。Á若是只停留tī舊約ê聖經,就無法度明白耶穌基督到世界起來ê意義。無法度kā新約kah舊約分開,這是彼得後書ê作者tī chia所beh kā讀者講ê重要認bat。

第3到4節,chit兩節thang看tio̍h早期教會tú-tio̍h ê問題,就是tī信仰上不時被質疑地kah當做譏笑ê藉口,he就是有kóa人為tio̍h beh打擊基督徒,故意chhōe些問題來詢問講:lín m̄是講耶穌基督會「koh來」?「伊tī tó位」?Lín ê「祖先lóng死去」,ē-sái講是一切lóng「kah創世之初仝款」,kám m̄是?類似chit種問題連串發出,致使真chē基督徒卻mā因為án-ne而m̄知án怎回答chiah好。因為án-ne,致使hiah-ê想beh做姦犯科ê人koh khah顯明出in不法ê形像。就án-ne chiah-ê人就開始chhōe出真chē譏諷ê話語來譏笑基督徒,講耶穌基督toh有beh koh再來?有kóa人lóng等來到不及來死去了,耶穌基督豈m̄是lóng iáu未來?趁thang快樂、享受ê時chūn,就beh把握機會。看,chit-ê世界豈無lóng仝款?過去到chit-má lóng仝款,無甚麼改變。類似chit種話一再挑戰tio̍h基督徒。

第5到7節,tùi第5節開始直到第9節,作者teh回答chiah-ê對耶穌基督koh再臨所提出ê各種懷疑。因為有關耶穌基督teh beh koh再臨ê講法甚囂塵上,因為án-ne,大家lóng teh期待ē-tàng看tio̍h耶穌基督koh再臨、世界末日也kah跟tòe來到,所有信耶穌基督ê人lóng會hō͘提起天頂去kah koh活ê耶穌基督相會合(參考帖撒羅尼迦前書四:15—18),而且所有因為信來死去ê人mā lóng kā tùi墳墓中koh活起來(參考馬太福音廿七:51—53)。M̄-koh為tio̍h beh迎接koh活ê耶穌基督koh再臨,所有ê基督徒lóng一定tio̍h潔身自愛,免得耶穌基督koh再臨時,koh活ê恩典落空à。因為án-ne,差不多所有敬虔ê基督徒tī日常生活kah工作上lóng顯出非常謹慎,mā有淡薄á知影謹守規律ê生活準則。

作者引用創世記第一章ê背景,上帝創造天地宇宙萬物,為甚麼有人「故意m̄-chhap」chit件事?原因就是chiah-ê反對創世記記載ê人,lóng是講he是一種「傳說」,á是講這是「自然」。Á chit句「地是tùi水kah藉tio̍h水而形成ê」,是引用創世記第一章6節ê記載。換句話講,「故意m̄-chhap」上帝創造天地宇宙萬物ê人,講穿了就是m̄相信聖經所記載ê,而chit種人滲透tī教會團契中,主要目的就是beh人棄sak上帝,m̄-thang相信聖經ê話語。

「舊ê世界mā是由水,就是大水所消滅ê」,這是用創世記第六到九章有關挪亞kah大水氾濫淹滅世界ê記事,chit段記事主要並m̄是teh講全部lóng毀滅了,卻是teh講一個犯罪嚴重ê世代,kan-taⁿ會hō͘上帝ê傷心並為人帶來毀滅。

「Chit-má ê天kah地mā仝款是憑上帝ê話保留落來ê」,chit句話講出上帝確實是憐憫、慈悲ê上帝,祂是用大水淹滅了本來創造ê世界,m̄-koh卻mā因為祂ê慈悲、憐憫,而原本beh毀滅一切受造物mā ē-tàng藉tio̍h挪亞而保存落來,然後koh應允講:「我kah lín 立我ê 約:見若有肉體 ê,bē koh hō͘ 大水滅亡,mā 無koh 有大水毀壞土地。(全民版)」(創世記九:11)m̄-koh這並無表示上帝無koh懲罰犯罪ê人類世界,卻是hō͘人有悔改ê機會,因為án-ne,用「火」來處理犯罪ê世界。「火」,這有含去雜質ê意思。換句話講,ài kā hiah-ê雜七雜八ê、無規律ê部分除去,留落來美好ê、有規矩ê。這kah「大水」有點á差別;「水」,帶來ê是全部毀滅,而「火」則留落來koh khah好、純潔ê,並且ē-tàng hō͘無好thang變好,並thang保留純潔ê免受連累受拖累。

第8節,chit節thang參考詩篇第九十篇4節。作者引用詩人chit種詩歌,並且用「千年如一日,一日如千年」,chit種相對句型所beh表示ê,就是無確定ê時間表,mā就是講,人無法度數算上帝ê時間,因為tī人看起來真長ê時間,tī上帝眼中卻是目nih-á久;而tī人看起來是目nih-á久 ê時間,tī上帝ê作為中thang成做千年之久。換句話講,時間是屬tī上帝ê,祂ē-tàng跟tòe旨意運用。

第9節,chit節ē-sái講是chit本書信中siōng重要ê一句話:上帝無願意有一個人沉淪,祂ài ê是人人悔改。先知以西結án-ne講上帝「無願意任何人死亡」,只要人ē-tàng改過,就「ē-tàng存活」(參考以西結書十八:32、三十三:11)。Kui本聖經hō͘咱一個siōng基本ê認bat:只有悔改,chiah可能改變上帝忿怒ê懲罰計畫。

第10到12節,因為有基督徒teh等待耶穌基督koh再臨、世界末日kah上帝ê審判來到等日子kah現象尚且未出現,就已經往生,tùi án-ne引起m̄信ê人譏諷、嘲(sau)笑,mā因為án-ne hō͘ bē少信徒產生信心上ê懷疑。作者除了tī頭前談人無法度計算上帝ê時間外,mā tī chia進一步提起上帝ê行動lóng是tī人不知不覺ê中間忽然來臨。Tī福音書中記載耶穌基督kúi-nā pái提起chit種教示(參考馬太福音廿四:42—44,馬可福音十三:35—37,路加福音十二:35—38)。使徒保羅mā講tio̍h主koh來ê日子,ná親像賊á tī暗時忽然來到仝款(參考帖撒羅尼迦前書五:2)。

Tùi頂面所講chiah-ê經文thang看tio̍h「tio̍h警醒」,án-ne chiah是thèng候耶穌基督koh再臨應該有ê重要態度,卻m̄是一再teh算、chhōe異象出現。一個真正準備thang好潔淨ê心靈thèng候耶穌基督koh再臨ê人,伊會真清楚知影耶穌基督koh再臨ê事隨時會發生,甚至會發生tī咱厝裡、身邊,mā可能會tī咱面前出現。

作者mā提醒眾信徒知影tio̍h過聖潔、虔誠ê生活。作者講beh「加速」末日ê早日來到,m̄-koh因為上帝慈悲、憐憫,知影眾信徒尚且iáu未準備好勢,tùi án-ne延遲了耶穌基督koh再臨ê日子,因為hit日子mā是審判ê時刻,上帝疼祂揀選ê子民,愛護跟tòe耶穌基督ê信徒。因為án-ne,若是所有信徒lóng準備好勢了,hit日子mā就隨時會來到。

第13節,這是非常熟悉ê一個景象—「新天新地」ê來臨。作者講,tī耶穌基督來臨ê時刻一到,mā是一個全新ê創造重新開始。啟示錄ê作者講hit時mā是上帝重新創造kui個宇宙萬物ê時刻,天地一切lóng會改變,以前有ê,chit-má bē koh再出現,hit-ê hō͘人驚惶、會危害性命ê「海」mā phah m̄見去(參考啟示錄廿一:1),相對ê,tī新天新地出現後,充滿tio̍h上帝ê慈愛kah憐憫。

第14節,作者koh一pái強調過「聖潔」、「無thang指責」生活ê重要性,因為án-ne chiah ē-tàng kah上帝和好。這「和好」一詞mā是使徒保羅kui個中心思想。Tī羅馬書中,使徒保羅共有十三pái說明kah上帝「和好」ê重要性(參考羅馬書一:17、三:21、22、24、26、28、30、四:5、25、五:9、10、11、17)。

第15到16節,作者特別提起使徒保羅ê書信,認為伊ê書信就是一再強調chit種「聖潔生活」ê重要性,tī使徒保羅ê書信中,有一個真大ê特色,就是強調基督徒ê社會生活一定tio̍h見證出信仰ê內涵。Mā就是講,信仰並m̄是停留tī思想ê層面而已,卻是一定tio̍h tī日常生活、工作中顯現出來chiah有意義。因為án-ne,tī使徒保羅ê書信中lóng會有一段篇幅寫tio̍h基督徒ê社會生活方面應該tio̍h注意ê事。

作者tī chia並無詳細講出到底使徒保羅ê toh一kóa書信內容被有曲解,m̄-koh thang舉出幾個例;其一,使徒保羅強調tī耶穌基督內面,基督徒ê性命是自由ê,因為耶穌基督ê救恩,hō͘信靠伊ê人lóng因為án-ne tùi罪帶來ê死亡中得tio̍h釋放。罪jú重ê人,領受上帝ê恩典mā就jú chē(參考羅馬書五:20—21)。有人就因為chit種觀點,繼續過罪惡ê生活,thang hō͘上帝ê恩典koh khah豐富些,這是非常錯誤ê解釋。

其二,當使徒保羅teh強調一個基督徒ê性命是自由ê時,這並m̄是講thang放縱、隨便,顛倒ê,是beh有koh khah頂真ê態度,顯示出基督徒ê自律生活。這mā是伊強調ê:「Ta̍k 項tāi-chì lóng thang做」,總是,m̄ 是ta̍k 項lóng 有利益。雖然講ta̍k 項tāi-chì lóng thang做, 總是,無lóng 對人有幫助。(全民版)」(哥林多前書十:23)而且mā m̄是每一件thang自由去做ê事,lóng是有「益處」ê。

其三,tùi雅各書會án-ne寫出來,其中有另外一個原因,就是有人kā使徒保羅所強調ê只要「你若用嘴告白耶穌是主,心內 mā 相信上帝 hō͘祂tùi 死人中koh 活,你就會得tio̍h 拯救。(全民版)」(羅馬書十:9)Chit種見解,當做一種口頭禪,卻無想beh tī社會生活、工作中用實際行動見證出上帝ê救恩。因為án-ne,雅各書ê作者做個努力,beh hō͘大家知影一定tio̍h有確實ê行動來證明信仰ê氣力,chit種信仰chiah是真實ê。

作者tī chia強調講,chiah-ê故意曲解使徒保羅書信意思ê人,一定會自取滅亡,因為使徒保羅就是teh見證耶穌基督福音,若是有人故意曲解福音ê信息,就是tī阻礙福音ê廣傳,chit種人一定會hō͘上帝所嚴懲而滅亡。
第17節,ná親像tī頭前已經提過ê,有人lóng是會tī教會內部散播真chē不實ê話語,á是假扮「教師」ê角色,專行欺騙ê勾當。因為án-ne,伊呼籲眾信徒應該tio̍h清楚狀況,m̄-thang被hiah-ê荒謬ê言論引入歧途。這mā thang看tio̍h使徒書信中共有ê特點,就是有提醒、苦勸,這lóng是teh表明盡in做使徒(á是教師)ê責任。

第18節,tio̍h tī信仰上長進,這mā是tī前一講已經提過ê,信仰一定tio̍h日日進步,若無,真容易被一kóa光怪陸離ê邪門言論欺騙。注意chia所用ê「長進」之動詞,是用chit-má進行式,mā就是不斷來進步,m̄是過去ê,卻是chit-má ê,而且繼續tī進步中。只有án-ne,chiah ē-tàng kā「榮耀歸tī」chit位慈悲拯救ê性命之主。


重新查詢