重新查詢
經文:

約翰二書 1:1-1:13

註釋:

Ná親像tī約翰一書中所提起過ê,tī早期教會有人滲透進入教會內,專門teh破壞信徒ê信仰,約翰一書作者稱呼chiah-ê人是「假先知」,in ê特色,就是自稱是有「聖神」充滿ê人,作者希望眾信徒tio̍h小心謹慎,並且強調講:一個人是m̄是真正有tùi上帝來聖神同在,就看chit-ê人是m̄是願意公開tī眾人面前信仰告白講伊願意「承認耶穌基督降世為人」(參考約翰一書四:1—3),作者認為這是一個非常重要ê標準。

當時ê教會內部流傳tio̍h一種講法,認為耶穌基督是神聖上帝ê kiáⁿ,無可能是真實活tī這世間ê人。因為án-ne,in主張只要是有關耶穌基督人性ê記載lóng tio̍h刪除,包括伊厭倦tuh-ku、腹肚餓、受氣、哭、藉tio̍h人來出世,以及被釘死tī十字架上ê苦難等等。如果是án-ne,耶穌基督就bē有受苦難tī十字架ê事件,若耶穌無經歷被釘十字架ê苦難,就無koh活ê信息傳揚出來。M̄-koh耶穌基督ê koh活乃是基督教信仰siōng中心ê信息,失去chit-ê信息,基督教ê存在就會失去意義。

	每一個時代lóng有信仰ê爭議,這mā是基督教信仰不時teh反省、更新ê主要原因,因為不時對信仰提出反省,chiah會有更新ê氣力,mā chiah會hō͘基督徒tī信仰kah社會生活中chhōe-tio̍h連結ê中心點而bē致使脫節,mā bē致使因為有人亂傳講聖經ê信息致使毀壞了本來建構起來ê信仰根基á是hō͘信仰變質,chit點認bat是非常重要ê。

第1節,作者tī信件ê起頭就講家己是「長老」,原本ê意思是teh指「年紀比較大」ê人。M̄-koh tī早期教會中,長老mā是教會團契裡tī信仰上lóng受尊敬ê人,in負責料理教會事務kah決策(參考使徒行傳十一:30、二十:17,提摩太前書五:17),而初代教會ê使徒mā會自稱是長老(參考彼得前書五:1)。

「蒙揀選ê夫人」,這「夫人」到底是teh指甚麼人?有兩種可能ê意思,其一是某一個位無願意出名ê女性信徒,而chit位女性信徒ê年紀是已經中年以上ê年紀,án-ne chiah會kah續落來ê chit句「你ê kiáⁿ」相符。Mā因為án-ne,有人認為chit封書信是封私人信件。其二,chia所指ê「夫人」mā可能是teh指教會講ê,這thang tùi彼得前書第五章13節所提起ê「蒙揀選」仝款,lóng是teh指tio̍h教會講ê。因為án-ne,主張指教會ê講法比較容易被接受,而這教會是chit位寫phoe ê長老所熟悉ê教會。Án-ne,續落來chit句「mā hō͘你ê kiáⁿ」,就ē-tàng了解是teh指該教會內ê男女信徒。

「認bat真理」,thang參考約翰一書第五章6節提起ê「聖神就是真理」chit句話,表示「真理」是上帝拯救ê信息,而chit-ê信息就是teh指耶穌基督講ê。因為耶穌基督降生到世界上,就是為tio̍h beh見證上帝拯救ê疼。
第2節,tī chia作者用「真理」來表達上帝ê疼,有上帝ê疼,chiah ē-tàng hō͘人ê性命kah耶穌基督連結做伙,永遠bē分離。

第3節,這是當時寫phoe ê一種方式,起頭ê時chūn先有自我紹介,koh來就是請安kah祝福。Chit種書信模式tī使徒保羅ê書信中mā一再出現(參考羅馬書一:1—7,哥林多前書一:1—3,加拉太書一:1—3)。

Tī chia作者真特別地kā耶穌基督kah上帝同時並列做伙,作者強調耶穌基督是「上帝ê kiáⁿ」,chit句話真重要。因為chit種用語已經teh表示耶穌基督確實是一個人,bat真實ê生活tī咱中間。

「恩典」,通常聖經提起上帝ê恩典ê時,是teh指人原本不配得tio̍h ê,m̄-koh上帝為tio̍h表明祂ê疼而白白賞賜hō͘人「憐憫」,聖經提起上帝ê憐憫ê時,指ê是上帝對祂子民特別ê疼。「憐憫」一詞m̄-nā是有含「疼惜」ê意思,mā是teh指上帝ê公義kah上帝ê疼。

	「平安」,這原本用來表示戰爭已經停息,tùi án-ne性命無koh有受tio̍h威脅。用tī chia是teh指會hō͘人死亡ê氣力已經消失à。因為耶穌基督已經超越死亡ê關隘,因為伊ê救恩hō͘人有koh活ê希望,這就是平安。
第4節,chit-má作者講信徒ê教會中,有kóa人是確實遵守了「真理」ê教示做tāi-chì、過生活;相對ê,這mā暗示tī in中間有人並無遵守「真理」。因為án-ne,chia ê寫法ē-tàng看出受信ê教會內部可能因為án-ne發生紛爭。因為,tī仝一個教會中,若是無同心、真實ê疼,就真oh彼此接納而同齊同聲o-ló上帝。

第5節,chit節thang參考約翰一書第二章7節。
「彼此相疼」是早期教會tùi耶穌基督領受ê命令,tī約翰福音第十三章34到35節有提起過,tī約翰一書mā有提起,chit-má koh提起,因為án-ne,作者講這「並m̄是一條新ê命令」,卻是「tùi起初就領受了ê」教導。會koh一pái án-ne強調,表示教會內可能有信徒並未照chit種教示去遵行,這mā是引起作者寫chit封書信ê原因之一。

第6節,作者特別強調教會團契生活中siōng重要ê,就是彼此相疼,這是團契生活中絕對tio̍h堅持ê。摩西律法tī利未記第十九章18節就提起「tio̍h疼家己ê厝邊,親像疼家己仝款」,chit種律法tī耶穌基督時代ê猶太宗教領袖之教導中,是hō͘人看做kah疼上帝相連結、無法度分開ê教示(參考路加福音十:27)。作者強調tī信仰團契中,就是beh「以這命令為生活ê中心」。
這「命令」一詞tùi第4到6節就連續出現四pái,這表示chit-ê命令比任何規律lóng重要,疏忽bē-tàng。

第7節,tùi chit節開始,作者用真嚴肅ê語句針對hiah-ê tī信仰上有嚴重偏差,同時koh tī教會內部造成困擾ê人提出譴責,並且嚴厲警告「生活tī真理中ê人」mài kah chiah-ê信仰觀念偏差而且影響tio̍h教會信仰秩序ê人來往,chit種態度ē-sái講是真嚴格。

「真chē Pián仙á已經在世界上四界活動」,chia所講ê「Pián仙á」,就是teh指hiah-ê表面上看起來kah-ná真虔誠,而且相信上帝ê救恩,m̄-koh卻拒絕接受耶穌基督確確實實降生在世界上,以人ê形體出現,用人ê樣式「道成肉身」tī人類世界中間,chit種人siōng容易迷惑人。作者講,若是一個人公開否認耶穌基督降生tī chiah-ê世界上,chit-ê人就是「對敵基督者」。

第8節,這是作者對信徒提出ê警語。「Lín tio̍h小心」,chit句kah馬可福音第十三章23節,耶穌基督對當時門徒提出「Lín ài細膩」ê警語仝款。作者強調對信仰有正確認知,而且會知影持守到最後lóng bē改變ê人,必定會有來自天頂ê「獎賞」teh thèng候。Chia所提起ê「全部ê獎賞」之「全部」一詞,指ê是kui個性命ê koh活,mā就是「永恆ê性命」ê意思,chit點mā是約翰書信siōng重要ê中心思想。

第9節,chit句「不持守基督ê教示」,意思是teh指kā人ê教導看做比耶穌基督ê教導koh khah重要。Chit種問題早tī耶穌基督ê時代就已經發生,因為猶太人領袖,特別是hiah-ê經學教師kah法利賽人,in lóng kā聖經ê教導有曲解,而且故意用人ê教示來取代上帝ê教導,因為án-ne,耶穌基督真無客氣地指責當時chiah-ê宗教領袖講:「Án-ne, lín 是放sak 上帝ê 誡命來遵守人ê 傳統。」耶穌koh 講:「Lín 用奇巧ê 方法棄sak 上帝ê 誡命,來beh 遵守lín ê 傳統。(全民版)」(馬可福音七:8—9)相對ê,就是「持守基督ê教示」ê,這是非常明確以耶穌基督做中心ê人,in會得tio̍h「聖父kah聖Kiáⁿ」,並且明白耶穌基督確實是有降生到世間,是上帝ê kiáⁿ,被差遣到世界起來ê救主。

第10到11節,作者tī chit兩節koh進一步要求眾信徒bē-tàng接近chiah-ê否認耶穌基督降生到世界起來ê人,連向chit種人「請安」lóng bē-tàng,這表示 kah chit種人斷絕關係,kā in驅逐離開教會,mā m̄-thang接待in到「厝裡」,因為chit種人是迷惑人心ê邪惡者。因為接待chit種人,「等於tī pháiⁿ事頂面成做伊ê夥伴」,原因是會hō͘人掠做是in mā受tio̍h教會kah信徒ê歡迎。

為甚麼講連接待in到厝裡去mā bē-tàng?原因真簡單,當時ê教會大多數是用家庭聚會為主要模式,因為án-ne,若是接待chit種家庭去,就會hō͘ chit種人有機會中傳錯誤ê信息,而混淆信徒ê認知,致使信徒tī信仰上偏離了正確ê道路。Chit款tāi-chì就bat發生tī加拉太教會(參考加拉太書一:6)。伊甚至進一步講傳「另外一種福音」ê人,應該「受詛咒」(參考加拉太書一:8、9)。

第12到13節,chit兩節是本書信ê結尾用語。作者講「iáu有真chē話」tio̍h講,m̄-koh伊「無想beh藉tio̍h筆墨傳達」,原因可能有兩種,其一,紙已經寫滿,若是beh koh再寫,就beh koh再chhōe另外一張紙,而當時chit種紙並m̄是親像chit-má án-ne容易得tio̍h。其二,信仰ê事,有時並m̄是用筆墨ē-tàng解釋清楚,因為tùi文字中不時會引伸出真chē需要進一步討論ê問題來。因為án-ne,作者講真想親自去探望in,kah in「當面傾談」,伊講án-ne大家心內lóng會「喜樂滿溢」。 

重新查詢