羅馬書 3章9節 到 3章20節   背景資料  上一筆  下一筆
Chit段經文真清楚說明使徒保羅所強調ê一點:無一個人是好人,大家tī上帝ê面前lóng仝款是有罪ê人。

第9節,thang對照第1到2節來看。使徒保羅tùi人ê罪來看猶太人ê時,伊強調每一個人khiā tī上帝審判ê面前,是lóng仝款ê,無任何差別。

第10到12節,chit段詩歌是引用詩篇第十四篇1到3節,tī chit-ê短短ê三節經文中,連續出現四次「無XXX」,像「無義人」、「無明智ê人」、「無走chhōe上帝ê人」、「無行善ê人」等,chiah-ê用詞lóng teh表明人ê罪,是逃避不了上帝ê審判ê。

第13節,chit節是引用自詩篇第五章9節,這說明人心中ê罪惡。雖然人知影律法上禁止ê事,卻iáu是照樣去做無應該做ê事,為tio̍h beh圖利家己,mā會故意去陷害別人。

第14節,chit節是引用自詩篇第十篇7節。

第15到17節,引用以賽亞書第五十九章7到8節。Chit段經文是先知以賽亞傳出上帝譴責以色列人語。In teh聚會ê時chūn,向上帝祈禱祈求上帝ê拯救,kah-ná真敬虔ê款,其實,in手上流tio̍h真chē無辜ê人ê血。Tī chit-ê前提之下,上帝怎樣ē-tàng聽得下in祈禱ê聲音?無錯,in照律法規定參與聚會、祈禱,m̄-koh這lóng kah in所做出來ê事相違背。In濫殺無辜ê性命,就是做律法所禁止ê事。第17節ê「平安」,意思是teh指無戰爭,á是戰爭已經結束。人ê性命不koh受到威脅。先知以賽亞是teh指in ê行為「不公正」、造「邪僻ê路」、行ê路「無安全」,chiah-ê lóng會威脅tio̍h性命ê安全。

第18節,thang參考詩篇第三十六篇1節。使徒保羅ê看法,人真正罪就是tùi「m̄知敬畏上帝」開始。Chit種人ê態度是「m̄驚上帝」,表明ê是「無上帝」,甚至koh khah嚴重ê是家己扮演起上帝ê角色,自認為是上帝。

第19節,chit節是kā頭前ê詩歌、經文做一個總和,就是引用詩篇第一四三篇2節b句所講ê:Tī上帝面前,無任何一個人thang講家己是無辜ê。

第20節,這是引用詩篇第一四三篇2節ê詩歌:「求你mài審判我—你ê奴僕,因為tī你面前無無辜ê人。」使徒保羅tī chia引用chit句詩篇ê語意。「hō͘ 上帝宣佈」,意思等於上帝審判了後ê宣告仝款。當上帝宣告一個人是「義人」ê時,就是等於宣告chit-ê人無罪仝款。M̄-koh人若想beh óa靠律法來得tio̍h上帝chit種宣告,是愚戇ê想法。即使上帝有chit種宣告,mā m̄是因為chit-ê人完成了律法ê規定,卻是因為上帝ê恩典。

使徒保羅Tī chit段經文中強調:律法hō͘人koh khah知影家己犯了罪。Tī第七章7節,使徒保羅koh一pái重複一pái chit句話ê意思。

重新查詢 專卷研經 羅馬書系列
錯誤回報,請聯繫comm[@]fhl.net