羅馬書 2章1節 到 2章16節   背景資料  上一筆  下一筆
Chit章thang分做兩個部分來看,一是tùi第1到16節,二是tùi第17到29節。Chit章主要是針對猶太人所認為ê得救kah律法關係,講tio̍h上帝ê審判問題。

Tī chit章中,使徒保羅講tio̍h一個重要觀念:m̄是知影甚麼重要就ē-tàng,siōng重要ê是知影ài做甚麼,chiah會得tio̍h上帝ê賜福。

猶太人一直認為家己kah上帝有特殊ê關係,常常認為上帝kan-taⁿ會愛猶太人。Tī in ê觀念中,lóng是認為上帝kan-taⁿ會審判外邦人,m̄-koh對猶太人則會因為in是選民ê關係,擁有特權,會對in特別保護,賜in外邦人所無ê恩典。M̄-koh使徒保羅認為無chit款tāi-chì,顛倒,所有做惡ê人lóng會受tio̍h上帝ê懲罰。如果上帝ê獎賞是tùi猶太人到外邦人,懲罰mā是án-ne,猶太人並m̄是特殊分子。「因為上帝是不偏待人ê。」

第1到4節,tī chit段經文中,使徒保羅用「評斷」chit-ê詞,chit-ê詞一再出現tī羅馬書中。Tī chia,使徒保羅提起猶太人歡喜評斷外邦人ê錯,m̄-koh in所做ê,卻kah in所評斷ê對象仝款,chit種人koh怎樣ē-tàng逃避上帝ê審判?

第4到6節,使徒保羅tī chia用三個詞表示上帝特殊ê疼(1)仁慈。這是teh指上帝lóng是hō͘人悔改ê機會。彼得後書第三章9節:「有人想講主teh 延chhiân 祂ê 應允,其實是teh 寬容lín;祂無ài 有人滅亡,是ài ta̍k 人lóng 悔改。(全民版)」(2)寬容。是teh指上帝將祂對人ê受氣暫時停止落來,為tio̍h是beh beh hō͘人有機會趕緊悔改。(3)忍耐。這是teh指一再堅持落去ê意思,表示講上帝對人犯罪ê嚴重,本來就beh懲罰了,m̄-koh祂iáu是一再忍耐落來,就是為tio̍h希望人趕緊悔改。Án-ne thang看出上帝ê疼就是希望人悔改。悔改,mā是kui本聖經ê信息,因為只有悔改chiah ē-tàng消除上帝ê受氣。

第6節,上帝會照人所做ê事、行為來「報應」,chit種觀念是來自舊約聖經ê教導(參考列王記上八:32;詩篇廿八:4、六十二:12;箴言廿四:12;耶利米書十七:10;以西結書十八:30、三十三:20)。

第7到11節,chit段經文真清楚說明一點:善kah惡之間,上帝看kah非常清楚。所謂恆心行善,就是teh追求tùi上帝來ê榮耀,kah永恆ê性命。換句話講,真實ê行善,並m̄是為tio̍h beh榮耀家己,因為án-ne,上帝對chit種人會hō͘ in「尊貴、榮耀,和平安」;相對tī hiah-ê自私ê人,就是kah追求行善ê人顛倒,chit種人kan-taⁿ會想beh榮耀家己,kā家己當做一切ê中心,chit種人甚至會kā家己偶像化,chit種人,kan-taⁿ會為家己帶來上帝憤怒ê審判á遭遇痛苦kah患難。無論是猶太人á是外邦人lóng仝款。原因是上帝並無偏待任何人,tī上帝面前,任何人lóng仝款,無族群之別,mā無社會地位ê高低,koh khah無所謂身分ê貴賤。所有ê人,khiā tī上帝面前接受審判ê時,lóng仝款。

第12到16節,tī chit段經文中,使徒保羅真清楚指出一個觀念:m̄是只有聽摩西律法ê人,就有免受審判ê保障,這是錯誤 ê講法。上帝ê審判是根據每一個人所講所行為根據。有摩西律法ê猶太人,上帝會根據律法ê基礎來審判,á無摩西律法ê人犯罪,上帝mā有另外一種方式來進行審判,á chiah-ê審判lóng是公正ê。真實ê律法並m̄是tī外面表ê文字頂面,卻是在內心ê省思。上帝hō͘所有受造ê人lóng有「良知」,chit種來自心內ê「良知」,會做為將來審判ê根據。


重新查詢 專卷研經 羅馬書系列
錯誤回報,請聯繫comm[@]fhl.net