羅馬書 14章1節 到 14章12節   背景資料  上一筆  下一筆
使徒保羅所寫ê書信有一個特色,就是會用一kóa篇幅討論有關信仰kah生活ê關係。Chit種kah生活相關ê問題,m̄-nā是tī家庭、社會,同時mā tio̍h用tī教會共同信仰團契中。教會就是一個用信仰建立起來ê團契,有來自各種無仝社會、家庭生活背景,對事物ê看法真自然tek mā會有所差別。Koh khah值得注意ê是,當使徒保羅tī外面邦地區開拓教會後,教會內ê信徒就開始有所謂「猶太人」kah「外邦人」。Á猶太人信了耶穌了後,真自然mā會kā傳承自猶太人ê風俗、信仰認知帶入來。仝款ê,外邦人mā有in家己傳承落來ê風俗,這二者之間存在真大ê差別,卻beh因為共同信耶穌ê關係來相處做伙,這就需要真大ê容忍心胸chiah有辦法,若無,單單是食ê問題,就會引起真chē爭端。

羅馬教會雖然m̄是使徒保羅所開拓ê,mā仝款有類似頂面所講ê問題發生,ná親像食物ê問題,發生tī哥林多教會ê事(參考哥林多前書八:7—12),mā仝款發生tī羅馬教會。食物ê問題tī猶太人看起來,就有真chē ê限制,摩西律法寫得真清楚,分做清氣kah無清氣ê物(參考利未記第十一章),真自然tek,猶太人雖然信耶穌,m̄-koh對食物ê看法,必定受tio̍h傳統觀念ê影響。彼得tī異象中ê反應就是一個真好ê例(參考使徒行傳十:9—16)。相對tī外邦人來講,猶太人認為無清氣ê物,外邦人看法可能無仝。

Tùi第十四章開始,直到第十五章13節,使徒保羅lóng鎖定一個主題:tī基督ê信仰團契中,大家tio̍h彼此接納,互相扶持。用體諒別人ê軟弱,這就是tī耶穌內面愛ê一種表現方式。

第1到4節,chit段經文是討論到有關食物ê問題。Tī第1節ê「信心軟弱」,並m̄是因為tī性命中tú-tio̍h極大困難,á是因為發生挫折,致使對上帝ê信心產生懷疑、搖動,並m̄是án-ne,卻是指tī良心上ê感覺kah信仰之間有衝突,卻m̄知該án怎chiah好有giâu疑,á是良心上ê不安。Chit種情況差不多每一個人lóng會tú-tio̍h,因為án-ne,使徒保羅ài大家學習「接納」,á m̄是用爭論ê方式。Chia是tùi生活中每工lóng會tú-tio̍h ê問題講tio̍h,就是lim食ê事。聖經ê教導是所有上帝賞賜ê物,lóng是潔淨ê(參考使徒行傳十:15)。使徒保羅希望大家lóng ē-tàng接納彼此之間對食物看法ê差別,á m̄是一味地批評。

第5到6節,chit兩節是關於守toh一天才算是「安息日」ê問題。Chit點確實困擾tio̍h初代教會,即使tī今á日mā有chit種問題,只是無hiah-ni̍h明顯而已。耶穌講:「安息日是為tio̍h 人來設立,m̄ 是人為tio̍h 安息日來創造。(全民版)」(馬可福音二:27)使徒保羅強調每一個人lóng應該有家己ê見解,m̄-koh重要ê是無論食á是選擇聚會ê時間,lóng是為tio̍h尊崇主ê救恩chiah-tio̍h。

第7到9節,使徒保羅提供一個基督徒一定有ê觀念:為tio̍h基督á活。因為基督就是為tio̍h咱來死,mā為咱來koh活。因為án-ne,每一個領受基督恩典ê信徒,lóng應該有chit種認bat,無論是生、是死,lóng是為tio̍h kah基督連結。

第10到12節,chia真清楚講出一個重要ê信仰認知:每一個人lóng tio̍h向上帝交帳,接受審判(參考希伯來書四:13)。第11節是引用以賽亞書第四十五章23節。使徒保羅mā引用chit節詩歌tī腓立比書第二章10到11節,強調耶穌就是主,大家lóng beh向伊「下拜」。

重新查詢 專卷研經 羅馬書系列
錯誤回報,請聯繫comm[@]fhl.net