啟示錄 8章1節 到 8章13節   背景資料  上一筆  下一筆
頭前已經講過啟示錄tī編輯上有一個特色,就是用「七」ê數字連續轉換。Koh講,tī編輯上作者mā運用一種「連環扣」ê方式,就是tī第六kah第七ê異象之間,插入另外一個連續「七」ê異象。Á chit兩個「七」ê異象koh有仝款ê意義tī內面。啟示錄chit種中斷ê編輯方式,koh一pái出現tī chit種原本已經被中斷ê異象中,mā就是tùi第六章12到17節開啟第六個印了後,原本thang直連連續第八章1節ê第七個印,m̄-koh被第七章ê插入異象hō͘ phah斷à。然後,tùi第八章1節開啟第七個印了後,原本應該thang直接解說chit第七個印,m̄-koh soah koh插入第2到5節講有七個天使the̍h七支號筒。Án-ne表示,第七個印就是teh講述chit七個天使kah七支號筒。Chit種一再「插入式」ê編輯方式mā就成了啟示錄ê特殊編輯方法。

    第1節,這是七個印之異象中ê最後一個。Tī第六個印所顯示出來ê景象,ná親像末日來臨ê時天翻地覆ê狀況,所有ê人、不分任何階級,lóng躲進了巖石洞穴,甚至呼喊hiah-ê山嶺巖石倒塌掩蓋tòa in來躲避災難(參考六:12—17)。因為án-ne,大家lóng安靜地等待「第七個印」phah開,án-ne大約等了「半小時」,這表示時間是目nih-á久。換句話講,上帝ê審判真緊to̍h會來臨。這對當時tú-teh受難ê基督徒來講,是一個真大ê ǹg望。

    第2節,作者講伊「看見七個天使」,in lóng「khiā tī上帝面前」,而且「接受七支號筒」,chia thang看出chit-ê新異象又koh是另外一個「七」ê開始。Chia ê「七個天使」,tī希臘文ê「七」chìn前,有加上冠詞「tous」,表示chit「七個天使」並m̄是一般天使,卻是指特定對象,á是被選派出來ê天使,而且有代表性。除了tī chia提起有「七個天使」之外,tī第十五章1節、6到8節、第十六章1節、第廿一章9節等等,lóng有提起chit「七個天使」kah in ê工作。

    第3節,除了七個天使the̍h七支號筒外,chit節講「另外有一個天使出來,the̍h金香爐,khiā tī祭壇前」。Chit-ê天使並m̄是七個天使中ê一位,卻是「另外有一個天使」。Chia ê「金祭壇」是teh指敬拜上帝ê所在。Chia ê「金祭壇」,thang參考耶路撒冷聖殿ê「祭壇」是用金kah銅為材料製成(參考出埃及記廿七:1—8)。

    第4節,hit-ê點to̍h ê香「tùi天使ê手中升到上帝面前」,chit句話真清楚表明天使ê工作之一,就是kā人ê祈禱轉達hō͘上帝(參考詩篇一四一:2)。

    第5節,這是另外一幅畫,頭前講祈禱thang藉tio̍h天使手中ê金香爐呈獻到上帝面前。chit-má則講天使「Kā香爐裝滿祭壇頂ê火,hiat去地上去」,然後出現各種hō͘人震撼ê景況,包括「有雷轟、響聲、sìh-nà,kah地動」。這是tùi天頂降落來ê,象徵tio̍h上帝對信徒祈禱ê回應。聖經一再用「雷轟、響聲、sìh-nà,kah地動」來表示上帝ê顯現kah懲罰。因為án-ne,作者用chit種方式teh表示:上帝聽信徒祈禱了後一定會回應chiah-ê為tio̍h見證福音而受難者ê祈禱。

    第6節,chit節若續接tī第2節後面,讀起來會比較順。作者tī chia講chiah-ê天使「the̍h七支號筒準備ài吹號」,這是為tio̍h beh宣布上帝審判ê結果。吹號,表示上帝來臨、顯現,ài眾人lóng注意。

    第7節,tùi chit節開始,一直到第十一章,就是chit七個天使吹出號筒ê聲音。chit七個號筒mā分做兩組,第一組有四枝號筒,第二組有三枝號筒。這ná親像tī頭前七個印仝款,頭前有四個印一組,後面三個印另成一組;前者是對自然界造成嚴重打擊,後者則對人類ê社會生活帶來極大痛苦。

    「第一個天使一吹號」,所發出號筒ê聲音是出現「冰雹kah火,攙tio̍h血」,這kah出埃及記第九章23到25節記載ê第七個災難真接近。

    地上「三分之一」ê青草、樹木lóng被毀à。原本tī第七章1到3節,是講有一個捧tio̍h永遠活ê上帝ê印之天使,來對khiā tī地ê四極ê四個天使講,beh擋tiâu地上ê大風來毀滅「地、海、樹木」,不beh hō͘會摧毀地上一切萬物ê大風來傷害,chit-má soah講有「三分之一」被毀滅à。Tùi chia mā看tio̍h上帝ê恩典,因為上帝並無全面性ê毀滅。

    第8到9節,這是「第二個天使」吹號筒。Chia無記載是甚麼人kā一座tio̍h了火ê山hiat去海中。Chia mā是提起「三分之一」ê海洋變色,包括海水變成血,「海中ê生物死去三分之一」,另外「船隻mā損pháiⁿ了三分之一」。Chit種海洋變成血ê景況,真類似出埃及記前ê第一個大災難(參考出埃及記七:20—21)。而且kah第一枝號筒造成ê結果仝款,前者講tio̍h大地ê花草樹木被燒毀,chia講tio̍h ê是海洋生態ê劇烈改變。

    第10到11節,這是「第三個天使」吹號筒。Tī第二枝號筒發出聲音了後,海洋變了色,chit-má則移轉到江河,這kah人ê生存有密切關係,因為江河若變色,人ê性命就有危險。「有一粒大星,像火燒tio̍h ê火把仝款,tùi天頂墜落來」,因為chit-ê緣故,致使河流、水源ê生態lóng改變à。而且有「三分之一ê河流kah一切水源」,lóng因為án-ne變成「苦」ê水一般。這ná親像出埃及記描述第一個災難中,尼羅河ê水變色,河水發臭無法度lim(參考出埃及記七:17—19)。M̄-koh tī chia則koh khah嚴重,因為有「真chē人lim了」chit-ê變苦ê水lóng「死去」。

    第12節,這是「第四個天使」吹起第四枝號筒。日頭、月娘、星辰等「lóng被打擊」而黯然失色,亮度減少「三分之一」。Chit-ê災難kah出埃及記描述ê第九個災oh得有類似ê所在(參考出埃及記十:22—23)。M̄-koh chia所指出ê天色烏暗,受tio̍h影響ê乃是大地,並m̄是天頂。因為欠缺日月星辰ê光照,大地五穀等生長必定受tio̍h嚴重ê影響,人民ê生活mā連帶受tio̍h災害ê波及。

    第13節,chit節中斷了第五個天使續接pûn號筒ê時刻。因為出現「一隻tī高空飛翔ê鷹」,牠高聲呼喊「慘lah」ê聲音。Chit隻「鷹」ná親像報幕者teh提醒讀者tio̍h注意,下一波ê災難會koh khah嚴重。


重新查詢 專卷研經 啟示錄系列
錯誤回報,請聯繫comm[@]fhl.net