Chit封是第六封phoe，是寫hō͘非拉鐵非教會ê信息。該教會kah示每拿教會仝款，chit兩間教會lóng是無被譴責ê教會。原因是hit-ê教會信徒對上帝忠實，而且有忍耐到底ê信心，hō͘上帝ê使者非常感動。Siōng特別ê所在，乃是非拉鐵非教會ê能力雖然弱小，m̄-koh信心卻是非常堅強，這kah其它教會比較來講，非常無仝款。

第7節，「非拉鐵非」chit-ê名，希臘文ê意思是「愛其兄弟者」。

Chit-ê城大約是tī主前140年，由別迦摩王阿他拉斯二世（Attalus Ṳ）非拉鐵非所建造ê。它設tī撒狄城ê東南方，大約距離六十公里處。Chit-ê城市因處tī地動帶，不時發生地動。Tī主後17年就bat因為大地動而全城遇tio̍h毀壞，m̄-koh因為是羅馬帝國通往東方世界ê主要交通要道，因為án-ne羅馬皇帝提庇留提供大筆經費援助，致使hit-ê城ē-tàng koh一pái重建，恢復往前盛況。hi̍t 所在盛產葡萄，商業發達，經濟非常繁榮。城裡有基督徒聚會，m̄-koh人數m̄是真chē，ē-sái講是信徒ê信仰素質非常高，無受tio̍h異端á是其它怪異ê信仰謬論影響。這mā是hit-ê教會被o-ló ê主要原因。

第7節，對非拉鐵拉傳達信息ê是一位「神聖而信實、執掌tio̍h大衛ê鎖匙」者。chit-ê「神聖而信實」形容詞koh一pái出現tī第六章10節。聖經中不時用「神聖」來形容上帝。另外一方面，「神聖」mā用來形容屬tī上帝ê一切，包括人、事、物等等lóng是。Á「信實」chit-ê詞是teh指上帝對人類ê疼是可靠、永bē改變ê。

「大衛ê鎖匙、開了門無人ē-tàng關、關了門就無人ē-tàng開」，chit句話是取自以賽亞書第廿二章22節。先知以賽亞預言揀選新ê奴僕以利亞敬，掌掠tiâu大權。啟示錄引用chit句話，用來形容耶穌基督就是上帝差派ê奴僕，伊teh代表上帝ê大權，伊所決定ê事，等於是上帝所做ê決定仝款有權威（參考約伯記十二：14）。伊ná親像上帝國度ê掌門者，伊決定甚麼人thang進入「門」內，甚麼人被拒tī門外（參考馬太福音七：21—23、廿五：11—12）。

第8節，chit節講出非拉鐵非教會會án-ne被o-ló ê原因。一是hit-ê教會雖然能力薄弱，m̄-koh卻堅守對上帝ê忠心。二是遵行上帝ê話語。三是對上帝一直是真忠誠ê態度。為tio̍h án-ne，上帝「開了一個門」，hō͘非拉鐵非教會一個真好ê賞賜，就是ē-tàng進入上帝ê救恩裡。

第9節，所謂「撒旦ê黨羽」，意思就是專門teh破壞上帝福音ê人。Á「自稱是猶太人而其實m̄是猶太人ê hiah-ê Pián仙á」，表示in嘴中雖然一再提起摩西律法、遵行上帝ê教示，其實in並無如in嘴中所講án-ne做。Chia講beh hō͘ chiah-ê迫害基督徒ê「假猶太人」來向真正基督徒「下拜」。因為上帝疼惜遵行祂旨意ê子民，會hō͘祂ê子民顯現出榮耀（參考以賽亞書四十三：3—4）。

第10節，chia第一pái提起「患難臨到kui個世界、全人類」，這表示上帝ê審判kā是全面性ê發生。Á遵行上帝旨意kah教示ê非拉鐵非教會信徒，會受tio̍h上帝特別ê庇護，hō͘忠心tī上帝旨意ê hit-ê教會信徒，ē-tàng「忍耐到底」，直到世界ê末à。

第11節，thang參考第二章16節、第廿二章7節、12節、20節等等，lóng一再提起耶穌基督就teh要koh再臨。Chit點mā是啟示錄chit本經冊ê主題之一。

Chia所講ê「快」，表示時間真短，bē等siuⁿ久，馬上就會來臨。Chit種講詞對當時受迫害ê基督徒來講，真有安慰、鼓舞ê作用。「tio̍h持守」，意思是teh指「握緊m̄放」，mā指bē改變堅持所有ê意思。「勝利ê華冠」，是teh指hiah-ê tī競賽場上奪tio̍h冠軍者所戴tī頭殼頂、用桂花編織而成冠冕。象徵tio̍h一種極高ê榮譽，mā是眾人所欣慕、稱頌ê（參考提摩太後書四：7—8）。

第12節，「新耶路撒冷」，指新天新地來臨ê時，跟tòe來ê「上帝之城」，表示上帝khiā起ê所在（參考啟示錄廿一：1—2），m̄-koh chit-ê「新耶路撒冷」kah chit-má ê耶路撒冷無仝；因為新ê耶路撒冷並m̄是人ê手建造ê有形建築物，卻是直接tùi天頂降落來ê「聖城」（參考啟示錄廿一：22—27）。這是屬tī上帝ê城，有上帝ê名刻tī柱á頂。「柱子」，表示重要ê地位ê意思（參考加拉太書二：9）。