啟示錄 22章1節 到 22章5節   背景資料  上一筆  下一筆
Chit章1到5節是繼續第廿一章9到27節所描述新耶路撒冷ê景況。續落來第6節開始一再地強調講:koh活ê耶穌teh beh來臨。Á伊ê來臨會是真清楚ê審判,而且按照每一個人ê行為hō͘ in應得ê報應。

Chit-má第廿二章1到5節是繼續講tio̍h新ê耶路撒冷城之內部。雖然是只有短短ê五節經文,ē-sái講是卻hō͘讀者真容易想tio̍h創世記第二章伊甸園內部ê景象,有河流、性命樹,以及歌頌o-ló上帝,因為tī chit新ê城裡,無koh有烏夜、死亡,這是上帝完全ê統治之地。這真清楚表明新ê耶路撒冷城,m̄是用人ê手建造起來ê,卻是上帝親手建造ê城。

    第1節,thang參考以西結書第四十七章1到12節;該處描寫先知以西結tī異象中看tio̍h聖殿ê門口,有泉水tùi門ê入口所在下底湧出,流向東方,就是聖殿頭前ê方向。Tī撒迦利亞書第十四章8節,soah講tī耶路撒冷kā有「活水」流出來,分做兩半,一半流到死海,另外一半流到地中海。

    「天使」,這是teh指第廿一章9節提起ê hit位天使。

    「性命ê河流」,tī第七章17節、第廿一章6節lóng bat提過chit-ê性命ê泉水。Hit-ê詩人mā án-ne講:「有一道河流kā喜樂帶到上帝ê城,到至高者khiā起ê聖所。(全民版)」(詩篇四十六:4)先知約珥ê預言中mā án-ne提起,有án-ne ê一工,上帝beh臨到耶路撒冷,hit時chūn「有一條泉水beh tùi上主ê聖殿流出來」(參考約珥書三:18)。

    「tùi上帝kah羊羔ê寶座流出來」,chit句話已經真清楚說明,ē-tàng賞賜性命泉水ê,是上帝kah羊羔耶穌,卻m̄是任何人為ê氣力。

    啟示錄作者用chit種方式真清楚teh說明一個基本認bat:用真誠kah心靈敬拜上帝ê人,chit種人ê性命kā有上帝同在,而伊會ná親像得tio̍h永遠bē止息ê泉源一般,有永恆ê性命(參考箴言十五:27),因為上帝就是「性命ê泉源」(參考詩篇三十六:9)。

    第2節,thang參考啟示錄第二章7節,以西結書第四十七章12節。

    Tī伊甸園中有一棵是分別善惡ê果子樹,另外一棵是性命樹。M̄-koh人違背上帝旨意偷食了分別善惡ê果子,結果上帝派出天使kā性命樹包圍起來,hō͘人無法度接近,直到啟示錄講出未來ê景象ê時,人才有機會koh一pái得tio̍h chit-ê性命樹ê果子。

    「性命樹」,就是用性命ê泉水灌溉ê,結出來ê果子就蘊含永恆ê性命。chit-ê樹ê果子mā ē-sái病人得tio̍h醫,因為樹ê葉áthang當藥材。換句話講,新ê耶路撒冷並m̄是只提供福氣hō͘ khiā起tī內面ê人,甚至mā thang幫助hiah-ê iáu未進入ê人,性命得tio̍h醫。

    「河ê兩pêng有性命樹」,chit句話是teh表示隨時伸手lóng thang摘得tio̍h性命樹ê果子,而且永bē缺乏,因為是「每年結果子十二次」,這「十二」,thang表示齊全、完美ê意思,mā表示果子夠額提供給上帝所有ê子民。

    第3節,參考創世記第三章14到19節,chit段經文記載當人犯罪了後,上帝對人進行嚴厲ê懲罰。Taⁿ是tī新ê耶路撒冷城裡,kā「無koh有上帝所詛咒ê事」,bē koh再發生因誘惑而棄sak上帝ê事,mā bē有上帝ê忿怒kah懲罰ê tāi-chì發生,mā teh表示上帝kah人之間ê關係已經和好,已經修復。

    Tī chit城裡有「上帝kah羊羔ê寶座」,表示上帝kah chit-ê城同在,敬拜上帝ê子民lóng會聚集做伙tī-chia,mā表示此城是一個榮耀ê城。

    第4節,「in beh朝見上帝」,過去hiah-ê人認為若是看見上帝ê面必定會死亡(參考創世記十六:13、三十二:30,出埃及記三十三:20、23),chit-má是tī新ê耶路撒冷城裡,所有敬拜上帝ê人,lóng thang真自然tek朝見上帝ê面,看見上帝ê榮耀。因為上帝已經kā伊ê名寫tī chiah-ê人ê「額頭」,表示chiah-ê人lóng是屬tī上帝特別揀選出來ê子民,hō͘ in有chit種特別ê福份。

    第5節,chit節回應啟示錄第廿一章23節所講述ê,tī chit新ê耶路撒冷城裡,無需要日光á是月光,因為上帝kah羊羔就是亮光。

    「無koh有烏夜」,表明無koh有死亡ê意思。相對tī「烏夜」,就是「光」,表明ê是性命。「上帝是in ê光」,意思是teh指上帝是in性命ê來源(參考約翰福音一:4—5)。

重新查詢 專卷研經 啟示錄系列
錯誤回報,請聯繫comm[@]fhl.net