啟示錄 21章1節 到 21章8節   背景資料  上一筆  下一筆
Tùi chit章開始直到第廿二章5節,作者Tī chit段經文中用兩個主題來敘述:邪惡ê氣力被制服了後,一個ná親像創造之初全新ê天kah地隨時出現,呈現出得勝ê榮耀景象。兩個主題分別是:一是第廿一章1到8節ê新天新地;二是第廿一章9節到第廿二章5節ê天頂之耶路撒冷城。

    Tī chit段經文中,作者kā耶路撒冷、聖殿、伊甸園等三個合併做伙論述。Tī新ê天地裡,新ê耶路撒冷就是一個神聖敬拜上帝ê所在(聖殿),mā是人間siōng súi ê khiā起環境(伊甸園)。Chit-ê新天kah新地是上帝ê「家」(指新ê耶路撒冷),是直接tùi天頂降落來ê。作者用chit種方式teh表示:上帝kah祂tī土腳子民khiā起ê「家」同時並存,chit種「家」mā是siōng美好ê境界。作者約翰為tio̍h beh表示chit種siōng koân ê súi境界,差不多是用伊所ē-tàng想像會tio̍h ê人間siōng珍貴ê物來描述chit-ê新天新地ê美。

    Chit段ē-sái講是描述新天新地siōng美好ê經文。同時koh一pái講出審判ê結果。M̄-koh強調ê是kah上帝有性命之「約」ê子民,lóng會得tio̍h永遠ê性命,是「新」ê性命。相對ê,mā有「永死」ê懲罰teh等待。

    第1節,chia所講ê「新天新地」,作者用「天地」所表示ê意義是teh指kui個宇宙ê意思,卻m̄是指上帝khiā起ê「天」。Chia ê「新」字,表示m̄-bat使用過ê意思,就ná親像創世記第一章開始所描述ê,是tùi混沌到開始,mā就是tùi「無」到「有」ê境界。Tī「新天新地」來臨ê時,「海mā消失à」。因為tī以色列文化中,認為「海」是對人kah萬物ê性命構成威脅ê氣力,chit字不時用來表示「bē穩定」kah「失衡」ê狀態。M̄-koh當「新天新地」出現ê時,chiah-ê對性命構成威脅、bē穩定ê氣力lóng會消失,因為「新天新地」帶hō͘性命是安全、穩定、永恆ê,就án-ne「海」就bē koh再出現。

    第2節,所謂「聖城」,指ê就是新耶路撒冷,表示有上帝khiā起ê所在,chiah被會稱做「聖」,這有mài-koh tī舊ê耶路撒冷。Koh講,作者tī chia特別強調「新耶路撒冷,由上帝hia,tùi天頂降落來」ê,這teh表明chit-ê新ê聖城,並m̄是用人ê手建造ê,是上帝親手建造。

    Chit節mā回應第十九章7節所講ê「新娘準備好勢了」ê觀點,這是採用了以賽亞書第六十一章10節ê資料。作者引用以色列人民siōng歡喜表達in kah上帝之間ê關係:上帝就ná親像是丈夫,以色列民族ná親像bó͘。用chit種夫妻間親密ê關係來形容一個全新、重造ê生活世界。因為án-ne,chia用「像打扮好勢ê新娘來迎接伊ê丈夫」,表示這是非常歡喜、歡欣ê心境,一切lóng已經準備好勢à。

    第3節,「有大聲音tùi寶座發出」,是tùi天頂ê主宰上帝所發出ê聲音。Chit聲音mā是審判kah賜福ê聲音。

    「上帝ê殿tī人間了」,這ná親像創造之初所描述ê伊甸園仝款(參考創世記第二章)。另外一方面,chit句話mā teh表明上帝kah人khiā起做伙。因為án-ne,「上帝beh親自kah in同在,beh做in ê上帝」,chit句話ê意思ná親像先知以賽亞所講ê「以馬內利」(參考以賽亞書七:14,馬太福音一:23)。

    第4節,chit節充分顯示過去性命受苦難ê日子,是哀傷、痛苦ê,taⁿ卻因為上帝拯救ê疼,hō͘祂ê子民因為án-ne「無koh有死亡,mā無悲傷、啼哭,á是痛苦」,取而代之ê,就是歡笑kah滿足,因為上帝ê拯救已經來臨。

    第5節,「坐tī寶座上ê hit位」,指ê就是上帝,因為只有上帝chiah是天頂寶座ê主人。祂一開嘴就講:「看ah,我更新一切!」,chit句話ná親像祂開始創造ê時所講ê「看ah,ài有光」chit種句型仝款。

    「伊koh講」,原文是teh指另外有一個聲音講話,卻m̄是坐tī寶座上ê全能者上帝所講ê話。真可能是天使受命kā啟示錄ê作者約翰講ài伊kā所聽tio̍h ê話lóng「beh寫落來」,因為上帝ê話是「真實可靠」ê。所謂「真實可靠」,指ê是公義、憐憫,而且會永遠遵行所立ê「約」。

    第6節,chit節經文mā thang參考啟示錄第一章8節、第廿二章13節。

    「成了」,表示已經照上帝ê旨意,完成了應該做ê事(參考約翰福音十九:30)。這m̄-nā是tī懲罰hiah-ê邪惡ê氣力,mā賜福hō͘ hiah-ê因為堅持信靠耶穌到最後ê信徒,in終其尾得tio̍h拯救ê恩典。

    「開始」,chit字原本ê意思是teh指一切ê起頭,帶有「根」ê含意在內面。表示上帝就是一切性命ê根源,tī上帝內面chiah有性命thang講。

    「終結」,chit字ê意思是teh指「完成」,是圓滿達tio̍h目標,卻m̄是「結束」。

    「性命ê泉水」,thang參考詩篇第三十六篇9節。Tī上帝ê懲罰中,原本所有ê泉水、河水、海水lóng已經變色,而且對所有ê性命構成災害(參考啟示錄十六:3、4)。M̄-koh chit-ê「性命ê泉水」,則相對ê帶hō͘人類kah所有性命。chit-ê泉水beh賞賜hō͘真正「嘴乾ê人」。

    第7節,「得勝ê人thang領受chiah-ê」tùi上帝來「白白」賞賜ê恩典(參考啟示錄二:7、11、17、26、三:5、12、21)。Chit種恩典就是上帝kah chiah-ê「得勝ê人」之間,有特殊ê性命之「約」ê關係,chit關係ná親像「父kah Kiáⁿ。」,mā像夫妻之間hit種親密。

    第8節,相對tī「得勝者」,就是失敗者,有下列幾種:

    一是「懍neh」:指驚惶而放棄信仰者。

    二是「背信」:kah懍neh類似。指對信仰無法度堅持到最後,tú-tio̍h困境隨時改變者。

    三是「腐敗」:指放縱行為、敗壞性命紀律者。

    四是「刣人」:特別是teh指hiah-ê迫害基督信徒致死ê統治者、幫兇。

    五是「淫亂」:指tī信仰上不純潔。另外mā thang指hiah-ê tī倫理道德生活中無嚴守紀律者。
    六是「行邪術」:指誘惑人棄sak上帝ê人。

    七是「拜偶像」:kah「淫亂」ê意思仝款。另外一方面,mā是teh指kā人當做神明崇拜。

    八是「所有講白賊ê人」:是teh指不誠實ê人,mā是teh指會用虛假ê話來迷惑人棄sak上帝ê人,chit種人ê心中無上帝、mā bē承認上帝ê存在,in siōng具體ê表現就是驕傲、狂傲(參考詩篇十四:1)。

    「第二pái ê死」,這是teh指永遠tī死亡中受苦(參考路加福音十六:24)。

重新查詢 專卷研經 啟示錄系列
錯誤回報,請聯繫comm[@]fhl.net