這是第二封phoe，是發hō͘示每拿教會。Kah對以弗所教會發生ê信息真無仝款，因為聖神透過作者約翰所傳hō͘示每拿教會ê信息中，並無責備ê內容，卻是hō͘ hit-ê教會真chē鼓勵。示每拿教會mā是chit七間教會中，無受tio̍h譴責ê教會之一。

第8節，這是寫hō͘「示每拿教會ê天使」。
「示每拿」chit-ê城市今á日ê名稱是「伊士麥」（Izmir）。這是tī以弗所北方大約五十五公里遠。Chit-ê城市以效忠羅馬皇帝而出名，大約tī主後26年bat為羅馬皇帝提庇留建造一座廟，極力推廣對羅馬皇帝ê崇拜而出名。因為tī hit-ê城khiā起ê猶太人真chē，因為án-ne比較有緊張ê對立。Mā因為án-ne，tī hit-ê城khiā起ê基督徒就夾tī羅馬政府kah猶太人之間，左右為難。猶太人會kā反羅馬政府ê罪狀，無故地kā它歸罪tī基督徒身上，hō͘基督徒不時tú-tio̍h到無妄之災。

是甚麼人kā福音傳到示每拿？這已經無法度thang考。不過使徒行傳第十九章10節ê記載，使徒保羅tī以弗所城ê時chūn，福音廣傳tī kui個亞細亞地區，差不多當地ê hiah-ê人lóng聽tio̍h à。

Chit節明確地指出講話者就是耶穌基督，因為伊是「開始kah終結、死去koh活ê」永恆者。

第9節，講tio̍h示每拿教會tú-tio̍h ê「患難kah sàn-chhiah」，chit-ê「患難」是teh指來自羅馬政府kah猶太人ê迫害、嫁禍所造成ê。Tī chia，約翰特別指出chit種迫害是來自hiah-ê「自稱猶太人ê人所毀謗」引起ê，伊講chiah-ê人乃是「撒旦ê黨羽」，chit句話mā koh一pái出現tī第三章9節。Koh講，「sàn-chhiah」，thang參考希伯來書第十章34節，就會明白早期教會tī受迫害ê時，執政者會kā基督徒連財產mā一併沒收，有時會hō͘人搶奪伊去。M̄-koh作者約翰卻o-ló示每拿教會ê信徒，講in人雖然tú-tio̍h迫害，而且財產被沒收來致使tī物質生活上sàn-chhiah，ē-sái講是in ê心靈卻因為耶穌基督而「富足」，tī人看起來in是sàn-chhiah ê，m̄-koh看tī上帝ê救恩裡，卻是富有ê（參考約翰福音十：10，雅各書二：5）。

第10節，chit節特別提起魔鬼beh考驗示每拿教會中間ê一kóa人「十工」。為甚麼是「十工」？真oh解說。Chit-ê「十工」，可能是teh指一個「有限期」ê時間，表示「目nih-á」、「thang數ê」。這mā是用來鼓勵示每拿教會信徒，只要支撐一下，苦難真緊to̍h會過去，迫害ê時間bē拖真久。魔鬼是透過苦難，「考驗」示每拿教會眾信徒ê信心。Chit種「考驗」包括信徒會hō͘掠「投進監獄」ê災難。M̄-koh in必定會得tio̍h上帝ê獎賞，賜hō͘ in「性命ê華冠」。Tī chia所用ê「華冠」，是teh指當時運動員得獎ê時，頭殼頂戴tio̍h會得tio̍h一頂用桂花葉編織而成ê冠冕，希臘字是「stephanos」，有mài-koh tī宮廷所用ê王冠（diadema）。雅各書第一章12節講chit種「華冠」乃是指性命ê冠冕。是來自天頂永恆ê獎賞ê意思（參考哥林多前書九：24—25）。

第11節，thang對照第七節b句。表明信耶穌基督ê人，其性命是koh活ê，bē「受第二pái死亡ê災害」，因為耶穌基督已經有復活。所謂「第二pái ê死亡」，這是teh指死後所teh beh面臨ê審判（參考啟示錄二十：14、廿一：8）。