啟示錄 18章1節 到 18章8節   背景資料  上一筆  下一筆
Chit章是繼續第十七章所提起有關巴比倫帝國淪亡ê事,ná親像chit章雖然是採用了詩體來形容巴比倫滅亡。頭前已經有提起過ê,啟示錄作者引用了真chē舊約ê資料,類似chit種詩歌ê型態tī先知文獻中是屢見不鮮。Á tī chia所引用ê資料是kah耶利米、以西結等先知ê作品有關,而且tī第二段經文中特別用君王、商賈,kah水手等三種人物來描述巴比倫帝國ê滅亡。

    Tī chit章作者一再用「慘ah!慘ah!Chit-ê大城」(第2節、10節、16節、19節)來表示巴比倫帝國滅亡ê慘狀。頭前已經講過所講ê巴比倫帝國,就是tī指羅馬帝國講ê。作者寫作ê時,tú好是羅馬帝國siōng輝煌ê時代,因為án-ne,tī he樣ê時空背景之下,預言羅馬帝國會親像巴比倫帝國hiah-ni̍h-á毀滅,是真少人會接受ê。M̄-koh對hiah-ê正tī受苦中ê基督徒來講,卻是真大ê慰藉,而且in mā深信chit種tùi上帝來ê信息必定真緊to̍h會實現。

    另外一方面,mā應該有chit種看法:啟示錄作者時代,to̍h是羅馬帝國國勢siōng興旺,而且tī軍事武力、經濟、政治等lóng是siōng強盛ê時期,hit時chūn ê統治者lóng會ài kā家己扮演做神明,tī chiah-ê統治者ê眼中,世間無任何一個神明thang kah伊相比。雖然羅馬皇帝mā鼓勵人民崇拜宇宙ê神明宙斯,其實,he只是表面ê,真正用意是beh人民拜皇帝為神。因為án-ne,當啟示錄作者teh表明羅馬帝國會hō͘ 上帝徹底摧毀、消滅ê時,mā是teh表達羅馬帝國所代表ê一切,包括它ê建設、文化活動等等,lóng會hō͘上帝摧毀殆盡。作者khah強調一個基本信仰觀念:凡是對敵上帝ê,其結果就是會tùi chit-ê世界上消失。

    Chit段經文是用詩歌ê文體寫ê,而且有兩pái宣告巴比倫帝國ê毀滅。

    第1節,「另外一個天使tùi天頂落來」,tī第十七章1節講tī七位天使中,有一位對作者約翰講話,chit-má則看tio̍h「另外一位天使tùi天頂落來」,而且chit位天使真有權威,tī伊手上是「掌握大權」,身上會散發出「光輝」,「大地」lóng被伊ê「光輝照耀」tio̍h。

    第2節,「倒塌了!大巴比倫倒塌了!」chit句話kah第十四章8節之天使所講ê仝款。

    Chia用「邪魔ê窩,邪靈ê穴」、「鳥類ê巢」等詞來形容巴比倫帝國會遇tio̍h ê結果(參考以賽亞書十三:21—22,耶利米書五十:37,西番雅書二:13—15),chiah-ê用語lóng是teh說明巴比倫帝國過去繁華ê城市,taⁿ 會成做廢墟,無koh是人khiā起ê所在,卻是野獸、野鳥、野狗等出入、盤居ê荒涼ê所在。

    第3節,「列國lóng lim了大淫婦淫亂ê烈酒」,chit句話thang參考第十四章8節。

    天使指出巴比倫帝國ê毀滅,m̄-nā是因為它犯罪致使ê結果,koh khah驚人ê乃是官方統治者跟tòe犯罪,以及商人為tio̍h thàn錢mā tī犯罪ê事頂面推波助瀾。Chit兩種共犯,以今á日ê話語來講,就是所講ê「官商勾結」。

    第4到5節,「另外一個聲音tùi天頂來」,這是teh指另外一個天使發出ê聲音。

    「出來!我ê子民」,chit句話是天使teh呼喊khiā起巴比倫城內ê上帝子民,tio̍h趕緊逃離出來。Chit種呼籲mā有含另外一種隱喻ê主要目的,就是beh上帝ê子民m̄-thang kah犯罪ê人做伙,免得受tio̍h污染,á是因為耳濡目染了後,對犯罪ê事麻痺。

    「罪惡滔天」,chit-ê詞thang參考以賽亞書第十四章14節、第四十七章8節、10節。上帝「會記得伊邪惡ê行為」,chit句話是teh指統治者kā家己當做神明,想beh取代上帝。Mā就是chiah-ê統治者偶像化、神化了家己,這是上帝siōng討厭ê事,mā是無法度原諒ê行為。

    第6節,chit節指出上帝ê懲罰有含「報應」ê用意,而且是beh「加倍」,ná親像倒滿「雙倍濃烈ê酒」仝款。

    第7節,說明加倍懲罰巴比倫帝國ê方式,就是用它所誇耀kah犯罪行為有jōa重,就用同等ê重量作懲罰。換句話講,懲罰kah犯罪是同等ê。先知以賽亞對耶路撒冷ê以色列婦女提出警告mā是án-ne(參考以賽亞書三:16—17)。

    「我m̄是寡婦」,chit句話可能引自以賽亞書第四十七章8節,意思是teh指丈夫並無死tī戰場。這mā是teh指家己ê國家、軍隊甚強,m̄免擔心婦女會成做寡婦,mā bē有哀傷ê事件發生。

    第8節,「tī仝一工裡」,意思是teh指變化極快,差不多無法度預測ê意思。當人當teh享受所得tio̍h ê榮華富貴ê時,卻隨時發生變故(參考路加福音十二:20)。

    Chia提起饑荒、哀傷、死亡、火燒等四種災難,而且lóng是tī同時發生。意思是teh指無任何thang逃避、預防、承受ê機會。Mā teh表示是當時ê人料想bē到ê事。

重新查詢 專卷研經 啟示錄系列
錯誤回報,請聯繫comm[@]fhl.net