啟示錄 17章1節 到 17章18節   背景資料  上一筆  下一筆
第十七到十八章lóng是teh描述有關巴比倫帝國淪陷ê情景。其實chia講是巴比倫帝國,真正意思是teh指羅馬帝國。Thang án-ne了解:kui本啟示錄siōng主要ê目的,就是beh安撫hiah-ê tú-teh受難中ê基督徒,á是已經因為福音ê緣故而遇tio̍h殘酷迫害ê基督徒家庭,beh hō͘ in知影上帝必定會審判hiah-ê迫害者,而且審判ê時間隨時就會來臨。作者ê主要用意在tī鼓勵chiah-ê受難者、安慰in,hō͘ in知影上帝一定會伸手救助in,替in伸冤。

    Tī啟示錄中共有七pái提起巴比倫帝國ê滅亡:第十四章8節、第十六章17到21節、第十七章5節、第十八章2節、10節、21節、24節等等。雖講巴比倫帝國是象徵tio̍h羅馬帝國ê意思,m̄-koh mā有另外一個意義,就是撒旦、淫亂ê記號。作者同時mā用天頂ê耶路撒冷來譬喻上帝子民ê團契,因為耶路撒冷ná親像屬tī上帝國度度ê城市仝款。

    第1節,「大淫婦」,聖經作者ài用chit種形容詞來描述一個犯罪深重ê城市、國家(參考以賽亞書廿三:15b—16)。Chit-ê「大淫婦」指ê是一個城市,而且又koh是「建造tī河流邊ê大城」,這是teh指巴比倫帝國,因為巴比倫城就是建造tī幼發拉底河邊。用淫亂來譬喻犯罪,意思是teh指對上帝無忠實(參考耶利米書三:9—10,以西結書十六:30—34),特別是teh指自認為是神明á是teh代表神明ê chit種心態(參考以賽亞書十四:12—15),siōng受聖經作者所討厭。因為án-ne,tī chia指出七位天使中ê「有一個」kā作者約翰講上帝beh懲罰chit位「大淫婦」,mā就是beh懲罰chit-ê罪惡甚重ê城市—巴比倫,意思就是beh懲罰羅馬帝國。M̄-koh真正懲罰到第十八章chiah出現。

    第2節,真正ê問題是tī chit帶頭者之背後á是身邊會有一大陣擁護者,大家共同參與了淫亂ê事。Chit種共同犯罪ê行為,作者tī chia用「地上諸王」kah「世間ê人」chit-ê詞來表示真chē共犯。Á所謂「行過淫」、「淫亂ê酒」,意思是teh指chiah-ê依附tī羅馬帝國領導下ê附庸國家,kā羅馬帝國看做是「神明」一般teh敬拜,chiah-ê國家ê人民mā tòe統治者ê號令起舞。

    第3節,「受聖神支配」,thang參考第一章10節。

    Chia作者約翰講伊被聖神帶到「荒野」ê所在。「荒野」,mā teh表明是人kah上帝siōng親近ê所在(參考何西阿書二:14)。「朱紅色ê獸」,chit-ê獸kah第十一章3節所描述ê紅色大戾龍ê長相仝款,lóng是有「七個頭kah十個角」。Chit隻獸身上是「遍體寫滿褻瀆ê名號」,表示對上帝極盡ê侮辱。「七」kah「十」lóng有含「chē」ê意思,thang表示「chē」到無法度thang數hiah-nih-chē。作者用「遍體寫滿褻瀆ê名號」chit種語句,teh表示羅馬帝國時代,崇拜偶像神明ê風氣非常興盛。

    第4節,chit節真詳細地描述著chit-ê「大淫婦」ê穿插,除了有「朱紅kah紫色ê衫褲」,iáu配戴tio̍h「金飾、寶石,kah珍珠」,這lóng teh顯明這是一個富有ê cha-bó͘人,mā同時表示伊藉tio̍h淫亂累積了真chē財富。Chit-ê隱喻tú好說明tī羅馬帝國富裕景況下ê社會非常淫亂。Chit-ê cha-bó͘人手中the̍h「金杯」,而杯中卻是「貯滿伊淫亂thang憎ê穢物」,這說明「金杯」看起來真耀眼,m̄-koh卻是裝滿hō͘人棄sak上帝教示ê「穢物」。

    第5節,chit節講出羅馬帝國teh崇拜偶像神明上非常嚴重,koh加上因為經濟富裕所帶來ê淫亂、荒誕行為真chē。所謂「thang憎ê物ê母」,chit句話表示chit種淫亂ê行為m̄-nā會影響tio̍h koh khah chē人,而且iáu會繼續流傳到下一代。

    第6節,「血」,Tī聖經中teh代表性命ê意思(參考利未記十七:11)。Tùi chit節thang koh khah清楚羅馬帝國對迫害基督徒採取ê手段有jōa-ni̍h-á嚴厲,因為基督徒被刣ê chē,其所流ê血chē到差不多thang當做「酒」一般hō͘人lim到「醉」,這表示因迫害而遇tio̍h刣死ê人數極chē。Chia作者約翰用「大大驚奇」,描述伊tī異象中看tio̍h hit-ê種悽慘ê景象,kah伊本來所期待看tio̍h情景差別非常大。

    第7節,天使beh掀開chit-ê「大淫婦」cha-bó͘人kah伊所騎ê chit隻怪獸ê秘密。Chia講chit-ê cha-bó͘人是騎tī怪獸頂面,而chit-ê怪獸就是teh指tio̍h羅馬帝國講ê。因為án-ne,講tio̍h cha-bó͘人騎tī怪獸身上,這lóng是kah羅馬帝國有關,有可能是teh指tio̍h羅馬帝國ê皇帝。

    第8節,chit隻獸家己有修復傷痕ê能力,表示chit隻怪獸ê能力真強,mā因為有chit種奇特ê能力,就自認為是神,m̄-nā顯現出真驕傲ê心,koh khah hō͘大家看了lóng驚奇地認為牠就是神而崇拜牠。M̄-koh牠「bat活過、chit-má無koh活teh」,這表示m̄是永恆,kah第一章4節、8節、第四章8節、第十一章17節等等所描述ê「昔tī-teh、今tī-teh、將來mā永遠tī-teh」ê上帝成強烈ê對比。

    Chia講只有名「無被登記tī性命冊上ê」人,chiah會驚奇chit隻怪獸ê koh一pái出現。M̄-koh tī性命冊上有名ê人,in並無會驚奇,因為in lóng清楚知影為福音受苦難乃是「正常」ê事,不足驚奇。

    第9到11節,因為啟示文學siōng典型ê表現方式,就是用「隱喻」ê方式來描述作者時代ê社會現象,á是想beh傳達ê信息,因為án-ne,需要有「智慧」ê人chiah ē-tàng明白chiah-ê數字所代表ê到底是怎樣一回事。

    Chia提起「七個頭」,指ê是chit-ê cha-bó͘人所坐ê「七座山」,是teh代表七個皇帝。「五個已經倒了」,這是teh指羅馬帝國已經往生ê五位皇帝,分別是(1)奧古斯都、(2)提庇留、(3)加里古拉、(4)革老丟、(5)尼祿等五位,而hit位尚且iáu teh ê真可能就是teh指tī尼祿了後,kā混亂ê局勢穩定落來ê(6)威斯巴先(Vespasian,68~79)。Á續落來威斯巴先了後ê,乃是(7)提多(Titus,79~81),伊在位期間真短,只有短短兩年gōa而已。Á第(8)個就是多米田皇帝,伊是啟示錄作者時代ê羅馬統治者,因為án-ne,第11節講伊「當teh行向滅亡」,chit點chiah是作者約翰所khah強調ê,伊beh hō͘受苦中ê基督徒得tio̍h安慰,知影所有ê苦難lóng會tī真短ê時間內過去,只要忍耐到底,必定得tio̍h拯救kah天頂ê冠冕,án-ne chiah是作者真正希望傳達ê信息。

    第8節ê「ná bat活過、chit-má無koh活teh」chit句話,就是beh kah「昔tī-teh、今tī-teh、將來mā永遠tī-teh」相對照;人無論怎樣強盛,lóng無法度kah永恆ê上帝相比,koh khah無法度取代上帝。因為人是有限ê,無法度永遠存在tio̍h。

    第12到14節,「十個角是teh指十個iáu未開始統治ê王」chit句話thang參考但以理書第七章24節。聖經作者常用「角」表示權力、權柄ê意思。作者約翰講chit-ê「十個角」所象徵ê統治權並無會真久,只有短短ê「一點鐘」。作者beh表明一點:只要是對敵基督者(參考第14節),lóng會真緊會滅亡,in生存ê時間lóng真短促。

    Chit-ê「十個角」並m̄是真有權力,卻是小角色而已,因為án-ne,in「ài kā家己ê能力權柄交hō͘ ná獸」,表示in只有ē-tàng聽從大怪獸ê指揮。

    「羊羔」teh代表基督,因為án-ne,真正ê問題就是chiah-ê擁有世間權力ê人,lóng想beh kah基督對敵。M̄-koh羊羔(基督)kah所有跟tòe ê人lóng kā贏過chiah-ê擁有世間權柄m̄-koh卻想對敵基督ê統治者。

    「萬主之主,萬王之王」,thang參考tī第一章5節所講ê:耶穌基督就是「作地上諸王統治者」。Chit句「萬主之主,萬王之王」mā是用來形容創造宇宙萬物ê主上帝(參考申命記十:17,詩篇一三六:2—3,但以理書二:47)。

    第15節,chia ê「各民族、各種族、各國家kah講各種語言ê人」,lóng是tī chit位大淫婦ê統治之下,順服tio̍h伊。表示伊ê勢力真強大,統治ê範圍差不多就是「萬國萬民」chiah-ni̍h chē,mā因為án-ne,chit-ê帝國chiah會kā家己當做是神明仝款,並且逼kah眾人lóng tio̍h敬拜伊。

    第16節,chit節mā thang參考以西結書第廿三章28到30節。

    Chia講出上帝懲罰ê結果,是hō͘ chiah-ê原本都是順服大淫婦統治ê,會背叛伊。In beh聯合起來對抗大淫婦,而且hō͘ in自相殘殺。結果是hō͘ chit位大淫婦付出代價,包括「奪行伊所有ê一切」,原因是chiah-ê過去附庸tī伊ê國家lóng背叛,hō͘ chiah-ê原本所有ê,lóng tī忽然之間消失à。Chit句「hō͘伊赤身露體」,表示強暴伊、侮辱伊ê意思。Á「食伊ê肉」,這表達一種極大ê痛恨(參考彌迦書三:2—3)。續落來是「用火燒」,這是古代siōng嚴厲ê酷刑之一(參考利未記二十:14、廿一:9),尼祿皇帝當時迫害基督徒siōng不時使用ê刑罰之一種,就是用火kā基督徒活活燒死。chit-má變成羅馬統治者會受tio̍h仝款ê懲罰,表示迫害人ê,mā會有「報應」臨身。整節經文表達一個意思:上帝beh用嚴厲ê手段懲罰羅馬帝國,而且beh hō͘它完全滅亡。

    第17節,tī第13節已經提起過chit「十個王」會「kā家己ê能力權柄交hō͘ hit-ê獸」。Á tī chit節soah講出全能ê上帝有奇妙ê作為,祂用奇妙ê方法,會án-ne kā統治權交hō͘大淫婦,乃是因為上帝ê奇妙旨意,hō͘ chiah-ê小角色ê王會知影聯合起來,有「仝款ê目標」交出統治權。M̄-koh chit種動作,mā是為後來聯合起來抵抗大淫婦作準備ê,thang hō͘「上帝ê話實現」。這mā teh說明無論chiah-ê暴君jōa-ni̍h-á偉大,上帝只要伸出手,就ē-tàng hō͘ in自認ê偉大變成火灰。

    第18節,「統治地上諸王ê hit-ê大城」,chia ê「大城」是teh指羅馬城。如果以今á日來看,則是teh指因權力大而驕傲,並且對敵上帝救恩ê人、團體á是國家。

重新查詢 專卷研經 啟示錄系列
錯誤回報,請聯繫comm[@]fhl.net