啟示錄 16章1節 到 16章21節   背景資料  上一筆  下一筆
Chit章描述七個天使帶「最後ê七種災難」,上帝用chit種方式ài beh進行最後ê審判。chit七個災難kah出埃及ê災難mā有類似ê所在,顯示啟示錄chit本作品ê特色,m̄-nā數字上一再重述使用,而且以數字「七」siōng常見。另外一方面,mā有災難內容ê重複運用,chit種災難則以出埃及前,發生tī埃及遍地ê大災難做基礎。M̄-koh tī chit組ê七個災難中,以第四個災難siōng特殊,mā是頭前災難所無出現過ê。

    第1節,chit節提起有「大聲音向七個天使」發出命令,chit-ê大聲音是tùi「聖殿」發出來ê。如果聖殿代表上帝ê居所,則chit聲音就是tùi上帝來,祂ài beh進行審判kah忿怒而發出聲音。

    「碗」,是一種淺淺ê碗,而且tī chit「七碗」ê頭前有加上定冠詞,表示chiah-ê碗lóng是為某一kóa對象特別訂製ê。Chia強調碗中所盛ê,乃是「上帝ê忿怒」。

    第2節,這是「第一個天使」所the̍h ê碗,chit-ê碗「倒tī土腳」,而所帶來ê刑罰是hō͘ hiah-ê身上有獸ê印記ê人身上lóng長滿「既臭而且毒ê瘡」,這mā是hō͘人ê性命受tio̍h嚴重折磨ê一種方式(參考約伯記二:7)。

    Tī出埃及chìn前ê第六個災難中,就是「瘡災」(參考出埃及記九:8—12)。申命記記載摩西警告以色列人,若是無遵守上帝ê誡命而過「淫亂」ê生活,會因為án-ne帶來上帝ê忿怒而遇tio̍h chit種嚴厲ê毒瘡之災(參考申命記廿八:35)。

    第3節,這是「第二個天使」the̍h第二個碗,伊kā碗裡所盛上帝ê忿怒傾倒tī「海上」,結果「海水」lóng變成「死人ê血」,hō͘海中所有ê「生物全lóng死去」。Chit種災難tī出埃及ê災難中mā發生(參考出埃及記七:17—21)。Á tī第一回ê連續七個天使the̍h七支號筒中ê第二個天使,其所造成ê災難mā是án-ne,hō͘海水變成血,海中生物全lóng死亡(參考啟示錄八:7)。海是以色列文化中用來表示邪惡ê khiā起ê所在。如果海水lóng變成血,mā表明chiah-ê邪惡者lóng會遇tio̍h死亡ê結果,其所以賴以維生ê環境變遷,無koh適合in khiā起。

    第4節,「倒tī河流kah水源裡」,chit種災難ê方式mā是ná親像海水變成血仝款,tī chia是hō͘所有河流kah水源變成血,án-ne,kā會hō͘人ê生存tú-tio̍h嚴重ê威脅。

    第5節,「管理水ê天使」,chiah-ê天使只是負責「管理」,並無發出命令,天使是beh聽從上帝發出ê命令做tāi-chì。上帝創造人ê時,mā是賦予人有「管理」ê責任(參考創世記一:28)。

    上帝是「到聖者」,chit句話講出當時羅馬帝國皇帝自認是「神聖」者,m̄-koh啟示錄作者就是beh hō͘讀者知影,只有創造宇宙萬物ê上帝,chiah是惟一永生ê主宰(參考出埃及記三:14,以賽亞書四十一:4、四十三:10,啟示錄一:4、8、四:8),只有祂chiah是「神聖」ê。M̄-nā án-ne,chit位創造萬物ê上帝mā是「公義ê審判者」,因為án-ne,祂一定會替受tio̍h冤屈者伸冤。

    第6節,chia所提起ê「先知」並m̄是指舊約ê先知,卻是指tī早期教會中hiah-ê傳達上帝信息ê福音工作者(參考使徒行傳十一:27、十三:1、廿一:10,哥林多前書十二:28,使徒行傳四:11)。

    「上帝子民」,thang參考啟示錄第六章9節。

    第7節,上帝ê審判是公義ê,chit點mā是kui本聖經ê信息之一。上帝ê公義包括祂ê慈愛(憐憫),憐憫慈愛ê上帝,絕對bē hō͘無罪ê人受tio̍h冤屈(參考創世記十八:25)。

    第8節,描述第四個天使。Chit節kah第七章16節相對。啟示錄ê作者認為歸屬tī上帝ê子民,in並無會hō͘日頭á是任何炎熱ê光線所燙傷。會hō͘日頭燙傷ê人,就是hiah-ê迫害上帝子民ê人tī土腳掌權ê人。

    第9節,thang參考第21節。人心墮落甚至tú-tio̍h嚴重ê災難「猶原不悔改」,ná親像埃及王仝款,即使受tio̍h hiah-nih-chē ê災難,mā是想出所有ê辦法beh對抗性命ê主宰上帝,chit點chiah是上帝siōng痛心ê事。

    第10到11節,這是第五個天使施行ê大災難,對象是坐tī「王座」上ê獸,這表示ná專門teh迫害基督徒ê統治者,其實,就是teh指tio̍h羅馬帝國皇帝講ê。當chit-ê忿怒ê碗傾倒落去ê時,發生嚴重ê變化,一是「烏暗罩tiâu了獸ê國度」,kah以色列人tī出埃及chìn前所經歷到ê烏暗仝款,災難ê情景是埃及人khiā起ê所在chiah有烏暗,而以色列人ê地區lóng大放光明,兩個呈現出明顯ê對照(參考出埃及記十:21—23)。Chia講只有「獸ê國度」chiah會被烏暗所罩tiâu,並且hiah-ê人會痛苦到咬舌,chit-ê情景就比埃及所tú-tio̍h ê烏暗iáu koh khah嚴重à。二是in猶原被毒「瘡」纏身,若koh加上烏暗ê痛苦而咬舌,án-ne就是雪上加霜ê痛苦。M̄-koh chit種加重痛苦ê經歷,並無hō͘ chiah-ê有權勢ê統治者知影謙卑、認罪、悔改,反tńg是變本加厲,拒絕上帝ê恩典。

    第12節,這是第六個天使。伊kā上帝ê忿怒傾倒tī「幼發拉底大河上」,造成河水乾涸,並且出現thang通過chit-ê河ê道路。這有kah頂面仝款帝帶領以色列人民過行過乾涸ê紅海(參考出埃及記十四:21)、約旦河(參考約書亞記三:17)仝款。先知以賽亞講上帝會吹乾埃及ê海,並且kā幼發拉底河用燒熱風吹乾,好帶領以色列人tùi受掠之地tńg來故鄉(參考以賽亞書十一:15)。

    第13到16節,chit段thang講是第六個天使kah第七個天使之間ê插入段落,ē-sái講是另外一個異象。Ná親像頭前兩組異象中所提供ê,tī第六kah第七之間koh有新ê異象出現仝款。Thang參考第七章、第十章1節到第十一章14節。

    第13節,tùi「戾龍ê口、獸ê口,kah假先知ê口出來」ê邪靈,tī chia用「水雞」來表示。作者用水雞teh代表lah-sap、吹噓ê意思,teh代表邪惡者ê面目。Tī出埃及災難中ê第二個就是水雞之災(參考出埃及記八:5—7)。作者指出三個邪靈分別出tī「戾龍ê口、獸ê口,kah假先知ê口」出來。

    「假先知」,指ê是專門teh講白賊言ê人(參考耶利米書十四:14—15),in以欺騙博取人ê信任,喜愛講諂媚ê話(參考列王記上廿二:6)。

    第14節,chit節提起「邪惡ê靈」ê特徵,就是「會行奇蹟」,這是in欺騙人去跟tòe ê pián仙á。

    「偉大ê日子」,這是teh指末日來臨,mā是上帝審判ê時刻,m̄-koh同時mā是teh指上帝拯救ê來臨(參考瑪拉基書四:5—6)。

    第15節,chit節thang參考馬太福音第廿四章42到44節、路加福音第十二章35到40節、帖撒羅尼迦前書第五章2節。

    「jōa-ni̍h-á有福」,這是啟示錄中記載七pái「有福」中ê一個,另外六個記載tī第一章3節、第十四章13節、第十九章9節、第二十章6節、第廿二章7節、14節等等。

    第16節,作者講beh kah上帝對抗ê所在是tī「哈米吉多頓」。有bē少學者認為這是teh指一個名叫「米吉多」(Megiddo)ê山,m̄-koh卻無真正chhōe-tio̍h chit座山。真可能是作者為tio̍h m̄ hō͘統治者發見伊所講ê意思,故意kā古代軍事必爭之地,用含糊ê方式來表達,為tio̍h是beh說明上帝絕對bē放過chiah-ê迫害祂子民ê統治者,beh hō͘ chit-ê審判ê日子成做一場類似重大而且殘酷ê戰爭hit種,kā所有ê背叛者全部lóng帶來懲處。

    第17節,「成了」,chit句話出現tī耶穌基督被釘死十字架chìn前(參考約翰福音十九:30),表示伊完成了上帝ê使命。Tī chia作者約翰是kā它用來表示迫害上帝子民ê殘暴統治者淪亡了(參考啟示錄十四:8),kah耶穌完成上帝使命完全無仝(參考啟示錄廿一:6)。M̄-koh lóng是teh表示結束ê意思。

    第18節,有大ê響聲出現,chiah-ê lóng是啟示錄作者引用來形容上帝出現ê方式之一(參考詩篇十八:6—15、五十:3—6)。Chit節「地動」用兩pái,表示「地動」乃是上帝表達忿怒ê主要方式之一(參考以賽亞書廿九:6,耶利米書十:10、五十:46,以西結書三十八:19—20)。

    第19到20節,地動造成ê災難非常大。巴比倫「裂為三段」,這表示是徹底ê倒塌,無法度koh再恢復á是khiā起來,mā代表完全毀滅ê意思。Tī chia表面上講是巴比倫,其實beh講ê是羅馬帝國。

    第21節,「大冰雹」phah到人ê身上。這是上帝用來懲罰背叛者ê工具之一(參考以西結書三十八:22)。Chit種冰雹ê災難mā是出埃及前ê十大災難之一(參考出埃及記九:22—25)。上帝mā用冰雹來打擊kah以色列人對敵ê亞摩利人,hō͘ in死亡慘重(參考約書亞記十:11)。Chia講tùi天頂降落ê冰雹重達四十公斤,表示被chit-ê冰雹phah到身上ê人,絕對無生存ê可能。因為「四十」mā代表是極限ê意思。

重新查詢 專卷研經 啟示錄系列
錯誤回報,請聯繫comm[@]fhl.net