啟示錄 11章1節 到 11章14節   背景資料  上一筆  下一筆
Chit章thang分做兩個段落來看,一是第1到14節,這是繼續第十章插入ê資料。Tī chit段資料中,講tio̍h有兩個見證人,chit兩個見證人是khiā在世界之主面前ê兩棵橄欖樹kah兩個燈台。二是第15到19節,chit段經文講tio̍h第七個天使吹號後所顯現出來ê景象,就是看見天頂ê聖殿開了,上帝坐tī寶座上,上帝進行審判。

    Chit段經文描述天頂ê聲音傳出,beh差派兩個「穿麻衣ê見證人」傳揚上帝ê信息。Á chit兩位見證人所傳ê是審判ê信息。

    第1節,作者約翰「接受一條像杖仝款ê尺」,然後聽tio̍h聲音ài伊去「量一量上帝ê聖殿kah祭壇,並數一數tī聖殿敬拜ê人」,chia ê「聖殿」,mā是teh指tio̍h基督ê教會。每一個信徒lóng是屬tī建造聖殿ê「石頭」(參考彼得前書二:5)。Chia ê「祭壇」thang講是teh指所有為tio̍h維護耶穌基督ê信仰,而慘遭殺害ê人,上帝beh伊數算確實ê數目有jōa-chē。

    第2節,「外院」,這是teh指聖殿正殿之外ê所在,允准外邦人聚集ê所在。M̄免去計算in ê數字,in是迫害者。因為量聖殿、祭壇ê主要用意,是表明kah上帝和好,則chiah-ê迫害者,相對ê就是對敵上帝者。

    「in beh踐踏聖城四十二個月」,這等於三年半ê時間,就是一千兩百六十工。

    第3節,「兩個穿麻衣ê證人」,tī以色列文化中,穿麻衣是teh表示高度哀傷、痛苦ê一種穿插方式,表示厝內有至親ê人過世,用穿麻衣來表示哀傷。Koh講,mā表用來表示誠懇ê痛悔ê意思(參考,耶利米書四:8,約拿書三:6)。

    「兩個」見證人,這mā是申命記摩西律法ê規定(參考申命記十九:15)。「一千二百六十工」,這mā tú好是三年半之久。

    第4節,「hit兩個見證人就是khiā在世界之主面前ê兩棵橄欖樹kah兩個燈臺」,這表示in傳達出去ê信息,是óa靠上帝ê能力,m̄是來自人ê智慧á是言語(參考撒迦利亞書四:6)。

    第5節,「如果有人想beh傷害in」,因為chit兩個見證人就是上帝忠實ê奴僕,因為án-ne,甚麼人傷害上帝忠實ê奴僕,等於是傷害上帝仝款。In ê任務是beh傳出上帝ê信息,因為án-ne,tī上帝ê信息完全傳達出去chìn前,無法度受tio̍h阻礙á是受難。

    第6節,chit兩位見證人有上帝所賦予 ê神奇力量,in擁有先知以利亞仝款ê能力,會祈求上帝「叫天不落雨」(參考列王記上十七:1),並ná親像摩西「hō͘水變成血」(參考出埃及記七:20—21)ê背景。

    第7節,chit兩位見證者,mā就是上帝忠實ê奴僕teh傳達上帝信息ê時,緊tòe而來ê,是khiā起tī「無底深淵」中ê對敵者,會攻擊上帝忠實ê奴僕,甚至殺害上帝忠實ê奴僕。

    第8節,作者約翰特別強調受難ê所在tī耶路撒冷城外,mā就是耶穌「被釘十字架ê所在」,用chit種方式來表達chiah-ê受難者,ná親像背負了耶穌ê十字架仝款,in lóng會因為án-ne kah耶穌同koh活,因為in是kah耶穌同受苦難tī十字架上ê奴僕(參考羅馬書六:5、8)。

    Chia用「所多瑪」kah「埃及」,前者用以表示上帝會tùi天頂降落大火燒毀,當做in迫害上帝忠實奴僕ê懲罰(參考創世記十九:24)。後者ê「埃及」用來表示像以色列人tī出埃及chìn前ê大災難,ná親像上帝懲罰全埃及地所有頭胎生ê人kah家禽動物仝款(參考出埃及記十二:29)。

    第9節,「三工半」tú好回應「三年半」ê時間。屍首若是「三工半」無埋葬,會發生屍體腐臭、浮腫變形像ê款。這說明上帝忠實ê奴僕受難ê殘忍鏡頭。Koh講,為chit種tú-tio̍h迫害來死ê事件,是無法度掩蓋、遮蔽ê,原因是有來自世界各地ê人—包括有「各民族、各部落、各語言,kah各國家」ê人,in lóng看tio̍h à,in就是chit-ê迫害事件ê共同見證者。

    第10節,「地上ê人因in ê死而歡樂」,原因是chit兩個奴僕傳ê是上帝ê信息,hō͘ chiah-ê迫害別人ê感受tio̍h極大ê痛苦。因為上帝ê話,往往像雙刃ê劍仝款,刺入人ê骨髓,hō͘人難耐其中ê痛苦。

    第11節,chit節講上帝tī祂ê奴僕苦難中,伸出創造性命ê手。Tī過「三工半」了後,上帝賞賜「性命ê氣息」hō͘ chiah-ê為福音做見證而受難ê人,hō͘ in tùi死亡中「khiā立起來」,看見ê人,特別是hiah-ê迫害者看見了後lóng「大大驚惶」。

    第12到13節,chit兩位受難ê奴僕m̄-nā koh活起來,而且被接到天頂去享受tio̍h榮耀。相對ê,殘害上帝忠實奴僕ê,會受tio̍h悲慘ê嚴厲懲罰。

    Chia ê「十分之一」,teh表示一種警訊,意思表示m̄是全部。因為上帝是慈悲ê,祂希望做惡ê人知影悔改,希望所有ê人lóng ē-tàng因為悔改而得救。仝款ê「七千人」,只是一個必要ê數目,並m̄是全部,因為iáu有「chhun落來ê人」,m̄-koh in lóng「非常驚惶」。並且為親目所見ê 事實而知影「頌讚」上帝。

    第14節,ná親像tī第九章12節仝款,chia講「第二個災艱苦心去à」;同時宣佈「第三個災難」kā tòe之來臨。

重新查詢 專卷研經 啟示錄系列
錯誤回報,請聯繫comm[@]fhl.net