啟示錄 10章1節 到 10章11節   背景資料  上一筆  下一筆
Tùi第十章1節到第十一章14節,chit段經文是介tī第六個天使kah第七個天使之間插入ê資料,ná親像tī第六章提起ê第六個印kah第八章1節提起ê第七個印啟開之間,插入第七章ê「四個天使khiā在地ê四極」,以及數目無法度估計ê人,khiā tī「寶座kah羊羔面前」仝款。Tī chit章作者提起上帝忠心ê奴僕á是信徒tú-tio̍h極大ê苦難。

    第1節,「大力ê天使」,伊是直接tùi天頂降落來ê。作者特別形容chit位天使是「teh moa雲彩,頭ê頂面有一條虹」。這teh代表上帝審判ê時刻已經來到。Koh講,「虹」mā象徵tio̍h上帝審判後ê拯救恩典之記號(參考創世記九:8—17)。

    「面像日頭」,chit種像似日頭ê光芒,就是teh代表上帝ê榮耀。「腿像火柱」,火柱是以色列人民tī曠野漂流ê時,上帝hō͘ in知影身邊有祂保護kah同在ê記號(參考出埃及記十三:21—22)。

    第2節,chit位大力ê天使ê手上是the̍h「展開ê小冊卷」,表示無koh是隱藏ê秘密,是公開ê,而且thang清楚知影冊卷內面所記載ê事。

    「正腳踏tī海上,左腳踏tī土腳」,這是一種奇特ê景象。古代ê人若是同時提起「海」kah「地」ê時,是teh指kui個世界ê意思。Chia teh表示:無論是tī深淵(海)中,á是tī陸地上ê,lóng是tī伊ê掌管之下,mā是tī伊審判所及ê範圍內。

    第3到4節,chia koh hō͘咱看tio̍h另外一個「七」ê數字出現。

    「七個雷發出tńg來響」、「七個雷所講ê話」,kah-ná「獅吼叫」ê聲音,這是一種hō͘人聽起來會心內起驚惶ê聲音。作者約翰講原本beh kā所聽tio̍h ê「寫落來」記載落來ê時,m̄-koh卻聽tio̍h「有聲音tùi天頂來」,ài伊「bē-tàng記錄」所聽tio̍h ê話,主要原因就是chit「七個雷」發出ê內容是秘密。

    第5節,「向天舉起正手」,這是一種chiù-chōa ê姿勢。

    第6節,chit位天使是對tio̍h「創造天、地、海,kah其中萬物ê永遠活ê上帝chiù-chōa」,這mā是聖經一再紹介咱認bat ê真正上帝之特徵(參考出埃及記二十:11,詩篇三十三:6、一一五:15、一四六:6,以賽亞書三十七:16、四十二:5)。Chit句話表示除了創造宇宙萬物ê真神外,其餘ê神lóng是人ê手所造ê偶像神明,chiah-ê偶像神明是「無法度看、無法度聽、無法度行ê物件」。

    「bē koh再遲延了」,chit句話對早期教會信徒來講非常有意義,對當時ê信徒來講,確實是真有鼓舞作用,hō͘ tī苦難中á是灰心喪志中ê信徒,重新點to̍h性命ê ǹg望。世界末日就beh來臨à,這是早期教會共同認定ê信息(參考約翰一書二:18)。

    第7節,chia講出「第七個天使吹號ê時chūn」,就是上帝實踐祂ê旨意ê時刻。Á上帝ê旨意早tī先知ê預言中就已經提過了(參考阿摩司書三:7)。

    第8節,作者約翰koh一pái聽tio̍h「chìn前tùi天頂來ê聲音」,ná親像伊tī第4節所聽tio̍h來自天頂ê聲音。

    第9到10節,chit位天使beh做者約翰kā chit本冊卷hō͘「吞」食落去。Chit種異象kah以西結書第三章到3節提起ê命令仝款,lóng是beh吞食冊卷。Chit種吞食冊卷所象徵ê意思,就是beh hō͘作者約翰明白所有冊卷內ê意義。而且講食了chit冊卷了後,「嘴裡卻像蜜仝款ê甜」,這mā是詩人所講ê仝款(參考詩篇十九:10、一一九:103),而先知耶利米mā講,上帝ê話,hō͘伊ê心內充滿喜樂(參考耶利米書十五:16)。Ē-sái講是,作者kā小冊卷吞下了後,「腹肚就真正感覺苦」。Thang án-ne了解:當奴僕去傳播上帝ê信息ê時,hit種感覺是非常好ê,甜美ê。M̄-koh領受tio̍h上帝ê信息ê人,可能感覺就m̄是án-ne,因為這會hō͘伊發覺kah生活經驗、價值觀念相差真chē,beh改變過來,心內確實是會有真大ê掙扎、痛苦。

    第11節,作者強調上帝ê話,是beh傳達hō͘所有ê人lóng聽tio̍h,包括「各民族、各國家、講各種語言ê人kah君王」,無論是甚麼身分ê人lóng需要上帝ê話。Koh講,無論所beh宣佈ê信息是jōa-ni̍h-á難聽,甚至可能因為án-ne為奴僕帶來性命ê災難,mā是beh傳達出去。

重新查詢 專卷研經 啟示錄系列
錯誤回報,請聯繫comm[@]fhl.net