這mā是kah第九十六篇仝款，lóng是teh歌頌上帝ê榮耀，因為祂是王，是統治者。

第1到5節，因為chit位創造ê主宰做王，所有被造之地lóng當歡呼歌頌，m̄-nā是大地，mā包括島嶼。Chit位創造ê主宰，統治ê方式ná親像第九十六篇所提起ê，公義是祂統治ê根基。

Tùi第3到4節來看，真緊to̍h會想tio̍h以色列人出埃及ê經歷（參考出埃及記第十三、十九章）。

Chia ê「火」kah「sìh-nà」tú好回應了第2節所提起ê「密雲幽暗」，lóng會因為án-ne被照亮顯現出來。Sìⁿ-nà附帶來ê便是雷轟，聽tio̍h雷轟ê聲音，就算是大山mā會驚惶phi̍h-phi̍h-chhoah，甚至會親像蠟一般鎔化掉，意思是teh指就算ná親像群山一般ê堅固、穩定，只要聽tio̍h上帝ê聲音mā仝款（參考彌迦書一：4），因為上帝是創造宇宙萬物ê主宰。

第6節，「諸天」，mā表示所有ê天使。另外一方面，tī以色列人民ê宇宙觀中，認為天至少有三層（參考哥林多後書十二：2）。詩人用chit種詞彙，主要teh表示宇宙浩瀚之大，lóng是上帝所創造、管理。M̄-koh所有上帝所創造ê萬物，lóng tio̍h齊聲宣揚，上帝是公義ê，tī祂治理之下lóng thang看見上帝ê「榮耀」。

第7到9節，第7節kah第9節真清楚表明，拜虛假ê偶像神明kan-taⁿ會hō͘人帶來侮辱，因為無任何神明ē-tàng khiā立tī創造萬物ê上帝面前。

第8節ê「錫安」、「猶大」，lóng是teh表明有上帝同在ê所在。

第10到12節，chit段詩歌有含勸勉ê韻味。Kā所有上帝喜愛ê子民講，ài in lóng清楚知影上帝喜疼in，m̄-koh討厭邪惡者，會拯救祂ê子民脫離邪惡者。因為án-ne，上帝ê子民應該mā tio̍h學習「憎恨邪惡ê人」，án-ne，邪惡ê人就無法度囂張，mā會知影見笑。

第11節ê「光照耀」，mā表示上帝ê賜福、拯救，而ē-tàng領受chit種恩典ê人，是「心地正直ê人」。Chit種人會知影怎樣歌頌上帝、o-ló上帝ê聖名。