詩篇 96章1節 到 96章13節   背景資料  上一筆  下一筆
詩篇第九十六到九十九篇,以及第四十七篇kah第九十三篇等,lóng是用來歌頌上帝,認為上帝就是以色列民族ê君王,以及過新年ê時歌頌ê詩歌。Chit首詩歌mā thang tùi歷代志上第十六章23到33節看tio̍h chit首詩ê內容,mā常常hông看做是tùi巴比倫奴隸之地釋放tńg來後所寫ê,因為tī以賽亞書第四十到六十六章中,thang看tio̍h真chē類似chit首詩歌內容ê資料。因為án-ne,解釋chit首詩歌mā常常hông看做是一個全新ê世代ê來臨,因為上帝帶領以色列人民脫離外族ê統治,thang回鄉重建耶路撒冷城、聖殿,kah故鄉。以感恩kah歡欣ê心境o-ló上帝ê恩典,並堅信上帝就是in ê君王,會帶領in,並以公義kah信實統治in。

第1到6節,ná親像第九十五篇仝款,族群á是部落ê長老、領袖出來,高聲呼喊所有ê人lóng tio̍h出來歌頌上帝,而且是beh「ta̍k工」lóng來傳揚上帝拯救ê「佳音」。

第3節提起上帝ê「榮耀」、「偉大ê作為」等詞,lóng是teh表示上帝ê拯救ê意思。Á第4節ê「上主到大」,意思是teh指至koân、神聖ê意思。

第5節ê「列國ê神lóng不過是偶像」,表示虛無,m̄是真實ê,因為án-ne,根本就m̄是神(參考九十七:7)。Tī以賽亞書第四十章18到26節、第四十一章23到24節、第四十四章6到8節、第四十六章5到8節等等經文,先知以賽亞lóng有清楚提起虛假ê偶像神明之特色,chiah-ê偶像神明m̄-nā無法度知影teh beh發生ê事,家己連動mā bē,iáu需要別人來幫助,chit種神明koh怎樣ē-tàng拯救別人?無可能ê事!真正神,就是親像chit位詩人所講ê,是「創造諸天」ê神,chiah是真正神。

第6節ê「大能」是teh指上帝拯救ê氣力,而「華美」則是teh指上帝居所聖殿之美,是無tè比。

第7到9節,詩人tī第7節chia講「地上萬民lóng tio̍h頌讚上主;tio̍h o-ló祂ê榮耀kah大能」,然後tī第8節b句隨時提起「tio̍h帶供物,進入祂ê殿宇」。如果「殿宇」指ê是耶路撒冷聖殿,就有真特別ê意思。因為耶路撒冷聖殿獻祭ê祭壇所在,m̄是外邦人thang進入ê,只有猶太人chiah ē-tàng進入祭壇邊。因為án-ne,當詩人án-ne描述ê時chūn,真清楚teh說明一個心中ê期待:有án-ne ê一工,全世界所有ê人民lóng kā以耶和華上帝為主,lóng kā以耶路撒冷聖殿做中心敬拜上帝,而chit點是久長以來先知文獻中一再提出ê ǹg望。

第9節ê「坦覆 (thán-phak)敬拜」,表示用穿插聖潔ê衣飾來敬拜上帝,表示一種對上帝極高ê尊崇ê意思,ná親像參加婚宴ê歡喜一般。

第10到13節,chit段詩歌表明上帝chiah是真正審判者kah統治者。Tī祂ê治理之下,「公義」是治理ê基礎,信實是祂治理之下ê記號,因為án-ne,所有一切受造物,lóng teh beh tī chit兩個基本法則之下,顯現性命ê活力。


重新查詢 專卷研經 詩篇系列
錯誤回報,請聯繫comm[@]fhl.net