詩篇 79章1節 到 79章13節   背景資料  上一筆  下一筆
這是一首哀歌,而且是團體使用ê哀歌。主要teh為耶路撒冷聖殿被敵人褻瀆而唱ê哀歌。

第1到4節,「外族人侵入」,chit句話已經清楚說明主前第六世紀586年,巴比倫帝國ê軍隊攻陷耶路撒冷,並且摧毀了聖殿ê歷史事件為背景。Tùi第2到3節thang看出,城內死傷慘重,慘不忍睹ê景象thang tùi耶利米哀歌第二章20節、第四章10節看tio̍h。Tùi siōng興旺到衰微到滅亡,人民hông掠去做奴隸,hō͘人嘲(sau)笑、諷刺等,lóng是真正常ê事,因為無人會同情,而仇敵kan-taⁿ會幸災樂禍。

第5到7節,詩人呼喊上帝,祈求上帝息怒,m̄-thang繼續對祂所揀選ê子民發受氣。

第8節thang看出chit首詩ê特色,作者認為tú-tio̍h chit種災難,是上帝所允准ê,因為是「kah祖先ê犯罪有關」。Chia所講ê kah祖先犯罪有關,指ê是拜偶像,棄sak上帝。出埃及記第二十章5節kah耶利米哀歌第五章7節ê經文中,lóng提起拜偶像所帶來ê懲罰,是延禍到kiáⁿ孫,甚至是到三、四代。

第9到10節,詩人koh一pái祈求上帝ê拯救kah憐憫,án-ne敵人才bē一直問以色列人民ê上帝到底tī tó位,意思是in ê上帝根本就不ài in了chiah會發生chit種質疑地(參考詩篇四十二:3、10、一一五:2)。

第11到12節,詩人ê背景是hō͘掠到巴比倫去做奴隸,並呼求上帝懲罰hiah-ê侮辱上帝神聖ê名ê敵人。Chia詩人祈求上帝用「七倍」來回應hiah-ê侮辱上帝ê名ê人,意思是teh指m̄-thang憐憫chit種人。

第13節,詩人已經開始感受á是看見上帝ê拯救正teh顯明。因為án-ne,伊發出感謝ê詩歌,知影上帝teh beh伸出救助ê手來幫助in。

重新查詢 專卷研經 詩篇系列
錯誤回報,請聯繫comm[@]fhl.net