Chit篇詩篇kah詩篇第四十篇13到17節仝款。有趣味ê是，詩篇第四十篇是編輯tī詩篇第一集ê最後，而這第七十篇mā是編輯tī第二集ê最後，而且最後lóng是用仝款ê詩句做結尾。唯一無仝ê是：Chit篇所用ê上帝ê名是「以羅伊」，tī第四十篇是用「耶和華」。

這mā是屬tī哀歌ê詩篇，mā是哀歌詩篇中siōng短ê一篇。

第1節下半句ê「上主ah，求你快來幫助我」，kah第5節最後一句完全仝款。頭尾lóng teh祈求上帝幫助，tú好說明chit首詩篇ê詩人，是因tú-tio̍h性命ê困境而寫ê詩歌。

第2到3節，thang清楚看出詩人向上帝祈求幫助，是因為有人「beh殺害」伊，tī伊tú-tio̍h困難ê時，m̄-nā無人伸手幫助伊，iáu用幸災樂禍ê態度嘲（sau）笑伊，hō͘伊感覺非常ê難堪。Á這兩項lóng是上帝所無歡喜ê態度。

第4到5節kah詩篇第四十篇13到17節仝款。