這mā是一首感恩ê詩歌，特別用tī收割ê季節裡，mā就是專為五旬節節期歌唱ê詩歌。Mā有kóa詩篇學者認為chit首詩篇是採用對唱ê方式，ná親像今á日禮拜中ê會眾讀啟應文ê方式，親像領唱者先唱第1到2節，然後會眾唱第3節；續落來領唱者唱第4節，會眾回應唱第5節；領唱者唱第6節，會眾唱第7節回應。Á是領唱者kah會眾同齊唱第6到7節。

第1到2節，chit兩節詩歌ê內容kah民數記第六章24到26節內容仝款，是向上帝祈求賜福。

第3 kah 5節ê重複句是副歌。呼籲所有ê人lóng tio̍h來頌讚上帝。原因是第4節所提起ê，上帝是公義ê，祂ê審判絕對公正，án-ne chiah ē-tàng hō͘世間各國lóng遵照法則。

Tī第6節ê「土地生產穀物」chit句話中ê「生產」，是過去完成式，表示收割已經完畢，kah第六十五篇是teh期待豐收ê來臨有前後ê時差。以色列人民有兩個節期kah收割有密切關係，一是五旬節，是開始teh收割ê時chūn，二是Tòa棚節，這是收割完成ê時ê慶祝節期。Tī chit兩個節期中，in lóng會歡唱chit首詩。