詩篇 66章1節 到 66章20節   背景資料  上一筆  下一筆
這mā是一首o-ló ê詩歌。真明顯ê chit首詩是分做兩個部分,一是tùi第1到12節,作者lóng用複數ê「咱」,第13到20節詩人lóng是用單數ê 「我」。因為án-ne,有kóa詩篇ê學者認為這是兩首詩篇合併成做一首詩歌。

第1到4節,詩人一開始就呼籲「萬民tio̍h歡呼頌讚上帝」,表示這是全國人民吟唱ê詩歌。Tùi第3節thang看出詩人呼籲大家來頌讚上帝,是因為看見上帝行奇妙神跡,hō͘敵人來投降。這表示只要上帝一出手,就算siōng強猛ê埃及軍隊mā只有ē-tàng葬身紅海,而亞述西拿基立皇帝率領二十gōa萬ê軍隊tī主前701年圍耶路撒冷城,mā tī一夕之間死亡chē kah十八萬五千人,最後就是落荒而逃。類似chit種例真chē,只要想tio̍h chiah-ê,就真自然tek會唱出歌頌ê詩歌。

第5到7節,chit段詩歌提出出埃及過紅海ê歷史背景。詩人呼籲大家來看上帝「tī人間ê奇妙作為」,只要小khóa詳細想一下,就ē-tàng明白這是teh指人無論怎樣想lóng想bē到ê事,親像鳥怎樣會飛?蛇ná會無腳,卻ē-tàng tī沙土上快速移動?海水怎樣會家己搖動,掀起高浪?chia講上帝「Kā海變成陸地,hō͘咱ê祖先步行過去」,這真清楚是teh指上帝帶領以色列人民行過紅海,然後koh行過約旦河。

第7節是為第5到6節作簡單ê結語,講上帝ê目睭鑒察世間萬國。Chit-ê意思真清楚,上帝並m̄是不管世間ê事,祂創造ê宇宙kah人間世界,祂一定會管理,hō͘伊bē脫序,án-ne世人kah世間萬物ê性命chiah ē-tàng繼續保存落去。

第8到12節,這是一個新段落。第8節kah第1節仝款,呼籲大家來歌頌上帝。雖然在世間ê性命旅程中會tú-tio̍h真chē考驗、重擔、仇敵ê攻擊等,m̄-koh chiah-ê lóng是一種磨煉,上帝lóng是保守看顧。

第13到20節,tùi chit段詩歌開始,所用ê動詞lóng是單數,表示chit段詩歌是屬tī個人teh o-ló歌頌上帝ê詩歌。Tī chit段詩歌中,詩人真清楚表示上帝已經有回應伊所下ê願,因為án-ne,詩人一定會還願,表示對上帝ê感謝。Án-ne,向上帝祈禱chiah會蒙上帝垂聽。

重新查詢 專卷研經 詩篇系列
錯誤回報,請聯繫comm[@]fhl.net