詩篇 50章1節 到 50章23節   背景資料  上一筆  下一筆
如果有讀過先知ê文獻,尤其是先知以賽亞、耶利米、阿摩司、彌迦、何西阿等人ê詩歌,就會發見chiah-ê先知lóng提出一個共同ê觀念:m̄-thang認為上帝歡喜人ê獻祭,m̄是,上帝所kah意ê是人會遵行kah祂所立ê約,照約去行。因為án-ne,讀chit首詩歌ê時,就會發覺有先知教導ê信息內容,因為án-ne,有kóa詩篇ê學者持chit種看法,認為chit首詩是用tī禮拜ê時,主祭者提醒以色列人民一定tio̍h ân-ân記tiâu,無法度因為有獻祭,就ē-tàng隨便,á是想用獻祭來欺騙上帝,這是m̄-tio̍h ê,因為上帝並無歡喜人心中存有chit種態度á是意念。若無誠實ê心,即使用盡所有ê禮節mā是枉然。人會做惡多端,是因為bē記得上帝是會審判ê上帝。

第1到2節,chit段詩歌可能是由主禮者發出宣召ê聲音,ài大家用安靜kah敬虔ê心靈同齊敬拜上帝。

Chia用「全能ê上帝」,這mā是基督教信仰所認bat上帝ê三大特性之一,另外兩種就是上帝無所不在(參考一三九:7—10)、上帝無所不知(參考一三九:1—3)。

第3節,chit節表示上帝顯現ê時有三種現象:一是並m̄是「默默無聲」、二是「頭前有燄火」、三是「四周有暴風」。

第4到6節,特別強調上帝ê審判是公正ê,天地lóng是上帝公正ê證人。這mā表示人所有ê一切言行舉止,上帝手上lóng有清楚ê資料thang查,一點mā不冤枉。

第7到15節,chit段詩歌真清楚是上帝teh控告以色列人民用虛假ê態度敬拜祂,特別是以色列人民想beh用kāu枝葉ê宗教禮儀來掩蓋(khàm)所做ê邪惡ê tāi-chì。M̄-koh上帝bē看chiah-ê獻祭ê物,因為萬物lóng是上帝ê。因為án-ne,詩人呼籲所有ê人lóng tio̍h用真實感謝ê心,這比虛假ê獻祭koh-khah有用。

第16到23節,chit段詩歌講出上帝真清楚知影以色列人民ê罪狀:1.in是作惡ê人,表示in棄sak上帝,去拜偶像神明。2.討厭上帝ê管教,意思是不聽從上帝ê話。3.kah盜賊為友,kah淫亂ê仝伴。這表示in做kah上帝ê教導相違背ê事。4.是四界講白賊,等於講毀謗ê話,á是做假見證。5.認為上帝默許chiah-ê惡質ê行踏。

第22節,詩人koh一pái提醒大家,一定ài會記得上帝ê教導,tio̍h注意聽上帝ê話,若無,上帝進行審判kah毀滅ê時,就來不及。

第23節,chit節kah第14到15節是仝款ê意思。

重新查詢 專卷研經 詩篇系列
錯誤回報,請聯繫comm[@]fhl.net