詩篇 45章1節 到 45章17節   背景資料  上一筆  下一筆
這是一首慶祝王室親族結婚ê詩歌。有人認為chit首詩歌大概就是為所羅門王寫ê,因為伊娶真chē外族人做妻妾。不過亞哈王mā是娶外族人耶洗碧,約蘭王則娶亞伊利雅。後來chit首詩被看做是新郎就是彌賽亞,新娘就是以色列人民,而這是因為以色列人民ài用「夫妻」關係來形容in kah上帝之間ê關係,上帝就是以色列民族ê丈夫,in是上帝ê bó͘。

第1節,chit節是chit首詩歌ê踏話頭。

第2到9節是對新郎唱ê,而第10到15節是對新娘唱。其中第2到5節kah第10到12節,是對新婚ê新郎、新娘ê勸勉;第6到9節kah第13到15節是對in ê歌頌。因為án-ne,chit首詩mā是一首對稱體ê詩歌。

第2到9節,chia講述tio̍h歌頌chit位君王ê原因,是因為伊有「威嚴」、「維護真理正義」、「以公道治國」、「喜愛正義,憎恨邪惡」等,chiah-ê lóng是hō͘一個國家、社會穩定siōng重要ê氣力。Ná親像以賽亞書第九章7節、第十一章4到5節等等所提起ê君王仝款。

第8到9節,chit兩節講述國王加冕ê時會出現ê現象。Á第9節則講tio̍h有來自各國ê嬪妃聚集tī國王身邊,這mā teh暗示著有真chē國家ê國王kā in國家ê佳麗送來當禮物,慶賀chit位國王加冕,á是做王后ê hō͘女。

第10到15節,chit段詩歌是由新娘回應,有可能就是由王后唱出來。Tī chit段詩歌中,有幾點是teh勸勉chit位王后ê:

一是王后既然嫁hō͘國王,就一定tio̍h成做這國ê「老母」仝款。bē-tàng kan-taⁿ回想家己ê故鄉、親人,chit-ê國家ê人民chiah是伊ê親人。

二是王后一定會順服國王,因為國王是伊ê主人。

三是因為是王后,大家為tio̍h beh討國王ê歡喜,就會先討好王后。這會hō͘國王滿心歡喜。

四是王后ê súi、賢慧,hō͘ kui個王宮充滿歡喜。

第16到17節,chit兩節是所有來祝賀ê嘉賓之賀詞,表示siōng大ê祝福,就是君王會有真chē kiáⁿ孫,王位ê繼承thang永久延續落去,而且王權會繼續擴張到koh khah真闊ê區域,永遠hō͘人民懷念。

重新查詢 專卷研經 詩篇系列
錯誤回報,請聯繫comm[@]fhl.net