詩篇 39章1節 到 39章13節   背景資料  上一筆  下一筆
這是一首被列為「智慧文學」ê詩歌。因為chit首詩篇談及人ê生kah死,以及上帝對人性命主宰ê問題。詩人teh探討一個不時hō͘人提出來詢問ê問題:為甚麼人ê性命是án-ne脆弱。Chit首詩篇mā被列為是一首祈禱醫ê詩歌,kah第三十八篇仝款,是tī極大ê病痛中,向上帝發出祈求醫ê詩歌,充分表現出作者對性命ê體驗真深。所謂「人生如泡影」,chit種觀念Tī chit首詩歌中表露無遺。Mā tùi chit首詩歌中ē-tàng體會做者所描述以色列民族tī迦南地「寄居」ê性命觀。利未記第廿五章23節講:「地m̄ -thang 永遠賣斷,因為地是我ê;lín tī 我ê 面前是出外人,是寄腳ê。(全民版)」新約彼得前書mā án-ne寫講:「Lín在世間是寄居ê,是客旅!」(二:11a)chit首詩常tī教會舉行喪禮ê時使用。

第1到3節,短短三節詩歌,就thang看出詩人ê心內teh進行深切ê反省,mā因為án-ne,有詩篇學者kā chit首詩篇看做是一首懺悔ê詩歌。M̄-koh thang理解chit-ê詩人ná親像古代社會共有ê觀念:認為生大病,是因為得罪上帝所帶來ê懲罰。詩人一開始表示,雖然是極大重病,mā tio̍h約束家己ê嘴舌bē出怨言。就算有人講伊犯罪á是講毀謗伊ê話,伊mā不tńg來擊。M̄-koh jú是án-ne忍耐,jú是痛苦。

第4到6節,就án-ne詩人轉向上帝詢問性命到底有chē長?ná親像詩篇第九十篇12節所提起ê,祈求上帝教導怎樣數算性命ê年日。Chit位詩人mā是án-ne teh問上帝,伊iáu有jōa-chē年日thang活。伊感觸到「性命不過像做一睏息,人生如泡影」,chit種句話mā出現tī約伯記第七章7節、第十九章20節。另外在詩篇中mā一再出現,親像第八十九篇47節、第九十篇5到6節、9節、第一四四篇4節等等。

Tī chia,詩人mā表達一個普遍ê現象,就是大家lóng teh想出所有ê辦法累積財富,卻m̄知性命一結束,而且是chiah-ni̍h-á短暫就結束。Án-ne,則所累積chiah-ê財富koh有甚麼用?甚麼人享受?這kah路加福音第十二章20節耶穌ê譬喻中所提起ê仝款,當上帝kā人ê性命取tńg去ê時,人所累積起來ê財富lóng會歸hō͘甚麼人?

第5節ê「短促」,原文是teh指手掌。人ê手掌無論jōa大,lóng是thang量ê範圍。性命ná親像án-ne短促。

第7到11節,chit段詩歌清楚表示kā性命寄望tī創造性命ê主宰—上帝,chiah是正確ê態度。

Tī第7節,詩人講「只有仰望你」,意思是性命ê ǹg望是tī上帝,人無能力決定家己ê性命時間。

Tùi第8到10節thang看出詩人病情ê嚴重,伊認為若上帝bē出手救治,伊kā無法度生存落去,因為性命已經到à尾聲,奄奄一息ê狀態。
第8節ê「愚戇人」,是teh指hiah-ê teh嘲(sau)笑伊ê人,chit種人就是幸災樂禍ê人。

詩人tī第9節真清楚表示,伊之所以破病折磨受苦,是出tī上帝ê懲罰,因為án-ne,伊m̄敢有任何怨言,免得加重病情。伊只祈求上帝m̄-thang koh再繼續責罰伊,mā看出上帝ê責備ná親像看bē-tio̍h ê蛀蟲teh侵蝕性命仝款,不聲不響,m̄-koh真緊to̍h結束loh人ê性命(第10到11節)。

第12到13節,伊知影,無論怎樣祈求,siōng重要ê認bat,就是性命ná親像寄居在世間ê「人客」,是「過路旅客」。因為án-ne,伊祈求上帝幫助伊,「寬容伊」,hō͘伊tī往生chìn前享受「一點á安樂」。

所謂「寬容」,原文是講「對敵」ê意思。是teh指請求上帝m̄-thang kā伊當做仇敵án-ne teh攻擊,伊會承受不。因為án-ne,伊祈求上帝kā目睭轉向另外一邊,m̄-thang直視tio̍h伊。因為上帝若是用忿怒ê眼神看伊,伊所有ê罪狀lóng會顯露出來,這kah詩篇第九十篇8節詩人所講ê仝款。「寬容」iáu有另外一個意思,是請求上帝m̄-thang koh再責罰。


重新查詢 專卷研經 詩篇系列
錯誤回報,請聯繫comm[@]fhl.net