詩篇 38章1節 到 38章22節   背景資料  上一筆  下一筆
這是一首患重病ê人祈禱ê詩歌。Mā是hō͘列為七首悔改ê詩歌之一,另外ê六首是:第六篇、第三十二篇、第五十一篇、第一○二篇、第一三○篇kah第一四三篇。

古早人有一種認知:破病是因為犯罪ê緣故,病jú重,表示罪mā jú重。約翰福音第九章2節,耶穌ê門徒問伊有關hit位生落來就chheⁿ-mê-.ê人,講:「是甚麼人ê罪造成ê?是伊家己ê罪á是伊父母ê罪?」就thang看tio̍h chit種性命觀,即使tī現今ê社會mā是非常普遍。M̄-koh耶穌並無認為是án-ne,ná親像伊回答門徒所講ê:「Chit-ê 人無犯罪,伊ê父母mā 無;是beh 通過伊來顯明上帝ê 作為。(全民版)」(約翰福音九:3)

Chit首詩iáu有一個特點,就是分做三個段落,每一個段落lóng以稱呼上主ê名開始,就是第1、9、15節等等。Iáu有,就是用呼求上帝ê名開始,mā以呼求上帝ê名結束。

第1到2節,chit節詩歌kah第六篇1節ê詩歌完全仝款。詩人認為伊ê受苦,是因為上帝伸手懲罰伊ê緣故。如果講詩人chit-má是破病,án-ne,一定是病得真嚴重。詩人認為上帝懲罰伊,ná親像用「箭」深深刺傷伊仝款,hō͘伊承受差不多無法度呼吸般ê壓力。

第3到4節,詩人認為上帝對伊ê懲罰,已經超過伊所ē-tàng承受ê重,伊祈求上帝ē-tàng減輕,若無,伊kā無法度生存落去。Chia所用ê「體無完膚」、「粉身碎骨」,表示病情不輕。M̄-koh mā表示伊已經無法度繼續承受chit種重病之懲罰。

第5到8節,這4節詩歌lóng tī說明詩人ê痛苦。因為破病身軀已經開始有褥瘡ê現象,表示,詩人可能臥床甚久ê時間。詩人形容家己身上ê病況,chit-má已經痛到無法度伸直身軀,表示伊無法度khiā起來行動,mā因為chit-ê緣故,chiah會有臥床過久有褥瘡發生,而伊mā只有ē-tàng用彎腰ê方式,以祈減輕痛苦,m̄-koh卻是kui工目頭結結。

第6節chia用「悲愁」,意思是teh指非常哀傷ê意思。

第8節ê「痛苦haiⁿ-haiⁿ叫」,是teh指大聲hoah ê意思。原因是痛到無法度忍受,非常艱苦心ê意思。

第9到14節,這是詩人第二pái呼喊上帝ê名,祈求上帝拯救。
「我ê心願」,這表示心內懇切地ê哀求。

第10節,thang看出詩人已經會失去眼神,lóng無精神ê款。

第11節,chit-ê詩人真可能患有癩ko病ê款,連親朋好友lóng遠遠躲開伊,因為甚驚被傳染。

第12節,詩人感受tio̍h性命垂危,隨時lóng會有hō͘人害死ê可能。

第13到14節回應了第12節所講到ê危險。伊m̄知該怎樣說明,知影別人對伊竊竊私語,指指點點,m̄-koh伊卻無法度辯駁。

第15到20節,這是第三段詩歌,mā是由呼喊上帝ê名開始。詩人呼喊上帝,期待上帝回答伊ê呼叫。

第17節,詩人講痛苦總是跟tòe伊,形影不離,差不多hō͘伊無法度承受。

第18節是chit首詩歌ê中心,就是詩人承認家己ê過犯。並且為家己ê過犯「憂傷」,這表示懺悔ê意思。Ná親像詩篇第五十一篇17節,大衛ê詩歌中所講ê,憂傷痛悔ê心,上帝絕對bē拒絕。

第19到20節,詩人感受tio̍h性命沉重ê壓力,並無因為家己為過犯懺悔有減輕ê現象。卻是攻擊ê力道jú來jú強,特別是當詩人確實懺悔後,阻礙ê氣力iáu是增強。

第21到22節,chit兩節是chit首詩歌ê結語。詩人祈求上帝m̄-thang「放下伊」、不管伊。伊祈求上帝「m̄-thang遠離」伊,tio̍h救伊,若無,伊一定無法度生存落去。


重新查詢 專卷研經 詩篇系列
錯誤回報,請聯繫comm[@]fhl.net