詩篇 28章1節 到 28章9節   背景資料  上一筆  下一筆
Tùi第廿六到廿八篇,這三篇詩篇lóng有提起聖殿ê事。第廿六篇講上帝就tī聖殿中,tī hia有上帝ê榮耀(拯救ê意思),敬畏上帝ê人lóng thang看見上帝ê榮耀。第廿七篇詩人認為任何人只要khiā起tī聖殿中,就ē-tàng得tio̍h「平安」。第廿八篇chia詩人講伊tī聖殿「舉手求告」上帝,上帝一定會垂聽。這三篇詩歌lóng說明一個重要主題:一個人性命ê安危,lóng kah上帝有親密關係。甚至一個民族、國家mā lóng是án-ne,只要有上帝同在,就算tī siōng危險ê環境中,mā會有平安。

第1到5節,詩人一開始就深信上帝就是「保護」者。Chia ê「保護」意思是teh指石磐。是siōng安穩ê所在。詩人因為知影向上帝祈求救助,一定會蒙上帝垂聽,因為án-ne,伊特別講伊beh到聖殿去向上帝祈求。伊tī chia祈求上帝kā伊分別出來,就是tùi作惡ê人中間區別出來。意思是teh指伊是神聖上帝ê子民,kah hiah-ê心中狂傲,m̄承認有上帝ê人是無仝款ê。In是作惡者,心中「藐視上主ê作為」,而且看bē起上帝「創造」ê奇妙。伊相信上帝一定會懲罰chit種人。 

第6到9節,chit段詩歌是teh祈求上帝得tio̍h幫助了後,歌頌上帝ê恩典。伊相信只要是專心信靠上帝ê人,lóng會得tio̍h上帝ê「衛護」。比較khah特別ê所在是tī第8到9節,因為chit兩節是為大眾祈求ê詩歌,mā因為án-ne,chit首詩就tùi屬tī個人ê詩歌變成大眾公用ê詩。第9節提起求上帝「牧養」屬tī祂ê子民,這正kah-ná詩篇第廿三篇1節所講ê,上帝就是顧羊人,祂ê子民就是羊群仝款。

重新查詢 專卷研經 詩篇系列
錯誤回報,請聯繫comm[@]fhl.net