詩篇 27章1節 到 27章14節   背景資料  上一筆  下一筆
有bē少詩篇學者認為這是由兩首無仝ê詩歌編撰做伙ê,因為第1到6 節kah第7到14節ê題材kah內容完全無仝。原因是tī第一部分表明詩人ê信心,而第二部分則一首哀歌。M̄-koh mā有詩篇ê學者持無仝看法,認為這原本就是一首詩篇,因為詩人所用ê詞字並無差別。

第1到3節,詩歌ê開始,就講上帝是「亮光」、「拯救」、「保障」,縱然有「大軍圍困」、「打擊」tio̍h,mā m̄免驚惶,因為相信上帝就在身邊看顧、保守。

第4到6節,有bē少學者認為tùi第4節就thang看出chit首詩歌是出tī大衛王ê手筆。理由是大衛一心一意想beh蓋聖殿,因為上帝無仝意,改由伊kiáⁿ所羅門王建造完成。Chit位詩人講上帝kā伊安置tī「穩固ê石磐頂」,表示有上帝同在,就是siōng安穩。Án-ne,即使仇敵想出所有ê辦法beh攻擊伊,伊iáu是m̄驚,因為有上帝同在。伊beh tī聖殿歌頌上帝ê救恩。

第7到14節,頭前有提過,這部分真可能是另外一種詩歌ê形式kah內容。詩人teh走chhōe上帝ê幫助kah拯救。詩人teh呼求上帝垂聽伊ê祈禱。

第8節,chit節真清楚講tio̍h上帝對仰望祂救恩ê人,lóng會垂聽並看顧。因為祂是慈悲ê性命之主。

第9到10節,chit節thang kah詩篇第廿二篇1節對照來看,就ē-tàng發見聖經作者一貫ê思想:人若離開上帝,á是hō͘ 上帝所棄sak,性命就變成孤獨無助,陷入危險中。因為án-ne,伊祈求上帝縱然伊ê父母棄sak伊,上帝mā tio̍h看顧伊。

第11到14節,chit節是chit段詩歌ê中心思想:只有遵行上帝ê道路,chiah有性命ê ǹg望。人無法度óa靠家己ê能力贏過chit-ê世界,只有óa靠上帝ê帶領chiah ē-tàng贏過世間ê各種試探kah誘惑。因為án-ne,詩人發出聲音,祈求上帝指示伊人生ê道路。伊認為無論仇敵怎樣攻擊、恐嚇,伊lóng深信只要有上帝同在,一定會看見上帝tī伊性命中siōng美好ê旨意。伊beh堅信上帝,永bē改變。

重新查詢 專卷研經 詩篇系列
錯誤回報,請聯繫comm[@]fhl.net