詩篇 18章1節 到 18章50節   背景資料  上一筆  下一筆
Chit首詩歌主要是teh歌頌上帝拯救ê恩典。特別Tī chit首詩歌有清楚註明是kah大衛得救有關,背景是撒母耳記下第廿二章。

第1節,開始ê頌詞tī詩篇中真普遍。M̄-koh chit句「敬愛你」tī希伯來文中卻是少見。

第2到3節,「巖石」,kah「石磐」是仝款ê意思,表示永遠bē衰退ê氣力,thang做為人危難ê時ê保障。先知以賽亞án-ne講:「因為你bē 記得救你ê 上主,無記念做你氣力ê 石磐;所以,你栽真sim se kê 樹á 栽,mā 種別位來ê 種(全民版)。」(以賽亞書十七:10)tī chia詩人用了真chē軍事用詞,包括「堡壘」、「盾牌」、「要塞」等,chiah-ê lóng teh表明是防衛ê工具。上帝ná親像chiah-ê保護ê器具一般,堅固、穩定,bē受tio̍h侵犯。因為án-ne,上帝應該受tio̍h稱頌。

第4到5節,詩人用「毀滅」、「陰間」、「墳墓」等來描述kah死亡siōng接近ê狀況。

Tùi第6節開始一直到第15節,詩人用chit段詩歌來歌頌上帝ê拯救,表示上帝確實聽伊呼求ê聲音,並決定出手拯救。當上帝伸手出來救助ê時chūn,天地lóng會為tio̍h án-ne變色。類似chit種描述,tī詩篇中一再出現,親像第五十篇3節、第七十七篇16到19節、第九十七篇2到5節、第九十九篇1節等等,這lóng teh表示一個基本概念:上帝來ê時chūn,絕對m̄是靜默不語。

第10節ê「ki-lō͘-pek」,tī舊約聖經中時常常hông用來譬喻為守衛天使,親像創世記第三章24節,當人犯罪hō͘ 上帝逐出伊甸園ê時,上帝派「ki-lō͘-pek」守護伊甸園ê性命樹。Koh親像tī約櫃頂面蓋kòa ê兩端,各有一個「ki-lō͘-pek」,它有「翼股」,象徵守護tio̍h約櫃(參考出埃及記廿五:17—22)。

第16到19節,說明已得tio̍h上帝ê拯救。第16節講上帝「tùi深水中kā我khiú出來」,以色列文化中有一個觀念:深水,是邪惡ê氣力匯集ê所在。因為án-ne,用「深水」來說明一個人掉tī內面,表示性命就teh要滅亡,上帝真緊koh及時地kā伊救出,若無,必死無疑。Tī chia「深水」表示仇敵,力量之大ná親像大水仝款,只有上帝chiah有能力拯救。

第20到25節,chit段詩歌mā是詩人ê信仰告白。詩人清楚表示伊對上帝有絕對ê信心,因為上帝會為受冤屈ê人伸冤,bē hō͘受冤屈ê白白受難。另外一方面,chit段詩歌mā teh說明上帝是「信實」ê主,祂必定會照所立ê約,拯救kah祂立約ê子民。「信實」mā指上帝ê慈愛,對忠於祂旨意ê人,上帝一定會賜福hō͘伊。

第26到29節,Tī chit段詩歌中lóng是用相對句型。第26節用「純潔」kah「邪惡」;第27節「卑微」kah「高傲」;第28節「點亮了我ê燈」kah「為我驅除烏暗」;第29節「攻擊」kah「防禦」等,chiah-ê lóng tī說明上帝ê慈愛,會加倍賜福teh遵行祂旨意ê子民身上,當in tú-tio̍h危急ê時,上帝一定會隨時伸手來幫助。

第30節,chit節表示上帝ê信息是絕對可靠,一定會óa靠祂。

第31到36節,頌讚上帝是全能者,mā是siōng好ê庇護者,是完全ê óa靠。

第31節表示除了chit位創造主之外,無任何ê神是真正,thang做保護者。

第32到36節詩人紹介chit位拯救ê上帝,就是賞賜力量ê來源。祂帶領人行ê路lóng真安穩,而穩定ê腳步ná親像母鹿tī高山頂跳躍仝款。Mā因為有上帝賞賜ê氣力,ē-tàng giú siōng強硬ê弓,án-ne赴戰場ê時,lóng ē-tàng成做勇猛ê兵丁。

第37到42節,因為有上帝保佑kah支持,hō͘對敵ê氣力lóng因為án-ne瓦解了,困境無koh出現。Tī第41節說明上帝bē垂聽欺壓者ê聲音。過去chiah-ê欺壓人ê人,chit-má變成被報仇ê對象ê時,換in呼叫上帝,m̄-koh上帝bē垂聽。

第43到50節,chit段詩歌是當仇敵lóng降服了後,詩人向上帝表達心中siōng大ê感謝。

Tī第43節特別提起「外族人民mā lóng歸順」過來,這表示tī上帝帶領下,chit-ê國家á是君王所得tio̍h ê上帝賞賜,chē過過去所有ê。

第44到45節,講出敵人只有順服,實在chhōe bē-tio̍h koh-khah好ê途徑,因為in已經完全無力量thang抵抗à。

第46到50節,是chit首詩ê結論,君王以歌頌上主ê恩典作chit首詩ê結束。注意第49節君王講「tio̍h tī列國中頌讚」上主,chit句話回應了第43到45節,因為列國lóng歸順了chit位君王ê統治,因為án-ne,君王mā kā命hō͘伊治理之下ê列國lóng tio̍h歌頌上主。因為ē-tàng統治列國m̄是君王家己ê能力,卻是來自上主ê同在kah支持。

重新查詢 專卷研經 詩篇系列
錯誤回報,請聯繫comm[@]fhl.net