詩篇 143章1節 到 143章12節   背景資料  上一筆  下一筆
這是詩篇中七首懺悔詩中ê最後一首懺悔詩(其它六篇是:第六篇、第三十二篇、第三十八篇、第五十一篇、第一○二篇、第一三○篇等)。雖然講是懺悔詩,m̄-koh,除了第2節「因為tī你面前無無辜ê人」是懺悔詩句外,其餘lóng是屬tī哀歌ê內容。

第1到2節,詩人一開始用詩篇中不時出現ê祈求句,祈求上帝「垂聽」伊ê「呼求」。Ná親像真chē詩人所歌頌ê,chit位救助性命ê上帝,是一個「信實」、「公義」ê上帝。M̄-koh續落來第2節,是詩篇中比較khah少出現ê句話,就是詩人祈求上帝m̄-thang「審判」伊,因為伊知影無任何一個人tī上帝面前是「無辜」ê人。換句話講,無一個人ē-tàng自認是「義人」(參考詩篇十四:3a,羅馬書三:20,加拉太書二:16),如果上帝chiâⁿ實追究,必定無人ē-tàng khiā立得tòa。

第3到4節,chit兩節詩歌thang看出詩人tú-tio̍h ê性命境遇是真悽慘,包括伊被「囚禁」tī烏牢中,性命無koh存任何ǹg望,ē-sái講是「悲愁」到極點。

第5到6節,詩人Tī頂面所講chit種環境中,一再回顧過去行過ê日子,知影上帝是伊唯一ê ǹg望,ná親像乾旱teh渴望甘霖ê降臨仝款。「舉手祈禱」,這是chē種祈禱ê方式之一(參考詩篇廿八:2、七十七:2)。

第7到12節,詩人Tī chit段詩歌中koh khah明確表明,伊需要上帝ê拯救,chiah ē-tàng脫離仇敵beh置伊tī死地ê危險。

Tī第10節,詩人chit句「你是我ê上帝」,kah最後一節最後一句ê「因為我是你ê奴僕」,tú好表明出作者心內ê順服。這mā是以色列人民表明in kah上帝之間ê關係,就ná親像chia詩人所講ê,是主人kah奴僕ê關係。Á奴僕只有聽從主人ê命令。Chit位詩人表示伊beh「遵行」上帝ê旨意,án-ne,必定ē-tàng行上「平坦」ê道路。


重新查詢 專卷研經 詩篇系列
錯誤回報,請聯繫comm[@]fhl.net