詩篇 132章1節 到 132章18節   背景資料  上一筆  下一筆
這是詩篇第一二○到一三四篇等十五篇ê「登階之歌」中siōng長ê一篇。Chit首詩ê特點是teh祈求上帝保護大衛王朝,以及立約ê約櫃。

第1到5節,chia提起請求上帝會記得大衛「忍受ê一切辛勞」,這可能是teh指伊tī繼任王位chìn前所tú-tio̍h ê各種苦難,尤其是hō͘掃羅追殺ê經歷。Á詩人講大衛王bat「下願」、「chiù-chōa」,為tio̍h是beh替上帝「chhōe-tio̍h khiā家」,表示大衛beh為上帝建造聖殿。大衛王bat對先知拿單表示,伊tòa tī香柏木ê宮殿,卻hō͘上帝ê約櫃tòa tī帳棚裡(參考撒母耳記下七:2),這hō͘伊感覺心內不安。

第6到9節,前段詩歌lóng用單數ê「我」,chit段詩歌則用大多數ê「咱」,表示另外一組詩班ê人teh吟唱。當大衛tī伯利恆ê時chūn,聽tio̍h講約櫃是tī基列耶琳,mā就是《現代中文譯本》ê「雅珥」,就派人beh去kā約櫃帶入耶路撒冷(參考撒母耳記下六:2—12),這雅珥可能是tī基列耶琳郊外ê小村落。第8節是引用民數記第十章35到36節,約櫃teh代表上帝,每pái喊一pái「上主ah,起來!」,以色列人民就beh大聲hoah、歡呼。然後祭司就kā約櫃往前移動一段路程。

第10節,chia稱大衛是上帝ê「奴僕」,表示上帝kah大衛之間有特別ê揀選關係。既然是上帝親自揀選ê奴僕,詩人祈求上帝m̄-thang拒絕大衛。

第11到18節,chit段詩歌lóng teh表示上帝應允hō͘大衛kah伊ê kiáⁿ孫「永遠繼承」伊ê王位(參考撒母耳記下七:16)。另外一方面,上帝選錫安當做「永遠tī chit所在khiā起」ê所在,án-ne,大衛kah伊治理ê國度,會因為有上帝kah伊以及以色列人民同在,而永遠「昌盛」。

後來tī所羅門王ê手中聖殿建造完成,in用真隆重ê方式kā teh象徵上帝同在ê約櫃運入聖殿ê至聖所。以色列人民一直有一個看法:只要有約櫃tī-.teh,就表示上帝tī in中間。約櫃tī聖殿中,就表示上帝tī聖殿中。有約櫃ê所在,就有上帝ê約ê記號。上帝必定會實踐祂kah人所立ê約。

重新查詢 專卷研經 詩篇系列
錯誤回報,請聯繫comm[@]fhl.net