Chit首詩歌kah第十二首仝款，lóng是屬tī哀歌，詩人teh呼求上帝ê拯救。這是詩人ê身心受tio̍h重創，向上帝發出求救ê詩歌。

第1節，chit節thang對照第廿二篇第1節：「我ê上帝，我ê上帝，你為甚麼棄sak我？我哀號求助，你為甚麼m̄來幫助我？」兩個所beh表達ê意義仝款。

Chit首詩tī第1到2節以四個問題發出：「bē記得」、「不理睬」、「悲愁」、「敵人耀武揚威」等等等chiah-ê詞，lóng thang感受出詩人哀嚎ê聲音。

Chia ê「不理睬」，kah「掩面」是仝款ê意思，類似chit種詞tī詩篇中一再出現（參考廿七：9、三十：7、四十四：24、六十九：17、八十八：14、一○二：2、一四三：7）。詩人beh表達一個重要觀念：若是上帝m̄-chhap，性命就會失去ǹg望。

	第3到4節，詩人祈求上帝「看顧」伊，因為伊知影只有上帝ê引chhōa、扶持，chiah ē-tàng看見性命ê亮光。

第5到6節，chit兩節表示對上帝有絕對ê信心，第6節所講ê「你施恩厚待我」，mā thang翻譯成「你用厚厚ê恩典補償了我」，表示上帝確實有聽伊ê祈禱，並且「補足」了所有ê一切需要，而且超過所需要ê一切。