詩篇 117章1節 到 118章29節   背景資料  上一筆  下一筆
這是詩篇全部一五○篇中siōng短ê一首詩歌,mā是o-ló詩歌。主要是teh宣召民眾來o-ló上帝ê恩典。因為kan-taⁿ有簡短ê兩節kah四句詩句,因為án-ne,mā有學者認為這應該m̄是獨立ê一首詩歌,卻是kah第一一六篇連結,而且是屬tī第一一六篇ê結語。M̄-koh有ê人mā認為kah第一一八篇連結做伙吟唱會khah好。不過,無論是kah前á是後同齊吟唱,lóng顯現出它ê特色,就是chit首詩teh呼召全體民眾來敬拜、o-ló上帝。伊呼召ê對象m̄-nā是以色列人民,mā是呼召全世界所有ê人民tio̍h敬拜上帝、歌頌 上帝ê慈愛。

Chit首詩篇mā是凸顯整部詩篇ê中心信息:上帝ê慈愛kah信實。上帝ê慈愛是豐富ê,而且是永bē改變ê。因為祂信守kah祂子民所立ê約,beh永遠成做以色列人民ê上帝,而in就是上帝ê子民,會kah in同在,救in脫離敵人加hō͘ in ê鎖枷,保守in免受敵人ê威脅kah迫害,chit點一直tī以色列民族ê歷史中呈現出來,tùi古到chit-má都無改變。

Chit首詩篇kah-ná是tùi真chē詩人所寫ê詩歌中取材,經過一段時間了後,編撰而成ê一首詩歌。讀chit首詩歌,真緊會想起宗教改革ê先驅馬丁路德,伊siōng喜愛chit首詩歌。Tī伊所寫ê詩歌中,會發見kah chit首詩ê內容非常接近(參考長老教會台語聖詩320首「上帝是咱安全要塞」)。因為chit首詩是描述tùi仇敵手中得tio̍h解脫ê感恩詩歌。因為án-ne,可能是teh表明以色列人民tùi埃及出來,á是tùi巴比倫奴隸之地回鄉tńg去重建家園。

第1到4節,宣召所有ê人來敬拜上帝,為tio̍h是beh感謝上帝ê慈愛永遠長存、至善。第1節ê詩句mā同時出現tī第一○六篇1節、第一○七篇1節等等。

Chia koh一pái提起「以色列人」、「祭司」、「敬畏上主ê人」等,就是teh指所有認bat上帝,知影敬拜上帝,mā會帶領人來敬拜上帝ê人,chit種人lóng會清楚知影上帝是仁慈ê。

第5到9節,chit段詩歌表示詩人tī危難中,祈求上帝ê救助,上帝就伸手救助了伊。詩人見證講,只要祈求上帝ê幫助,就ē-tàng贏過任何其他ê氣力。只要有上帝同在,就m̄免驚惶任何對性命威脅ê氣力。

第10到14節,詩人Tī chit段詩歌中描述敵人ê chē ná親像tùi蜂窩中飛出來ê蜜蜂仝款,tùi四面八方圍起來beh攻擊,m̄-koh詩人知影只有上帝chiah是救主,因為án-ne,伊求上帝,上帝救助了伊,hō͘伊tùi被攻擊倒tī土腳,mā ē-tàng khiā起來,脫離險境。

第15到18節,這是一段詩人teh歌頌上帝ê詩歌,詩人表示hō͘ 上帝嚴厲ê懲罰á是管教,差一點á就喪生,m̄-koh上帝憐憫,展現祂拯救ê大能力,hō͘伊tùi死亡中脫離出來。

第19到21節,tùi第19節開始,就是一種啟應ê方式,當領詩ê人帶領群眾來到聖殿chìn前,伊大聲hoah聖殿管理者開啟聖殿ê門,然後就唱出「開啟聖殿ê門」,群眾續落來回應「我beh入去頌讚上主」,續落來依序領唱者一句,群眾回應一句。

第22到23節,tī新約聖經中,耶穌kah眾使徒lóng引用過(參考馬太福音廿一:42,馬可福音十二:10,路加福音二十:17,使徒行傳四:11,以弗所書二:20,彼得前書二:7)。表示人看bē起ê,卻是上帝所重視ê。詩人用chit種方式teh表達,當敵人輕視伊ê時chūn,上帝看顧敬畏祂ê人。

第24到25節,chit兩節teh說明上帝出手拯救,就得tio̍h勝利。這是值得慶祝ê時刻。第25節「上主ah,救阮,拯救阮」,chit句詩歌mā就是大家所熟悉ê「和散那」ê意思。這mā就是耶穌騎驢á入耶路撒冷城ê時,民眾hoah出ê o-ló詩(參考馬可福音十一:9—10)。

第26到29節,當群眾lóng來到聖殿門口,祭司就宣告上帝賜福所有參與敬拜歌頌行列ê群眾。第27節「the̍h樹枝向(ǹg)祭壇行入」chit句詩詞,有學者認為chit首詩是用tī Tòa棚節ê詩歌。第29節kah第1節仝款。

重新查詢 專卷研經 詩篇系列
錯誤回報,請聯繫comm[@]fhl.net